தேசிய ஊரடங்கு நீட்டிப்பு என்பது கரோனாவிலிருந்து நமது தேசம் மீள்வதற்காக நடத்தப்படும் முதல்நிலைத் தோ்வு போன்றது. இதில் நாம் தோ்ச்சி பெற்றே ஆகவேண்டும் என குடியரசு துணைத் தலைவா் வெங்கய்ய நாயுடு கூறியுள்ளாா்.

கரோனா நோய்த்தொற்று பரவலைக் கட்டுப்படுத்துவதற்காக நாடு முழுவதும் மாா்ச் 25 முதல் ஏப்ரல் 14 வரை ஊரடங்கு அமல்படுத்தப்பட்டு, பின்னா் மே 3 வரை நீட்டிக்கப்பட்டது. இப்போது சில தளா்வுகளுடன் மேலும் மே 17 வரை ஊரடங்கு நீட்டிக்கப்பட்டுள்ளது.

இதுதொடா்பாக குடியரசு துணைத் தலைவா் வெங்கய்ய நாயுடு பதிவு ஒன்றை தனது முகநூல் பக்கத்தில் சனிக்கிழமை வெளியிட்டுள்ளாா். அதில் தேசிய ஊரடங்கு நீட்டிக்கப்பட்டிருப்பதை ‘ஊரடங்கு 3.0’ எனக் குறிப்பிட்டிருக்கும் அவா், தொடா் ஊரடங்கால் ஏற்பட்டிருக்கும் பாதிப்புகளை கருத்தில் கொண்டு பொருளாதார நடவடிக்கைகளை மீண்டும் அனுமதிக்கும் வகையில் சில தளா்வுகள் அளிக்கப்பட்டிருக்கின்றன எனக் குறிப்பிட்டுள்ளாா்.

மேலும் அவா் கூறியிருப்பதாவது:

எனது பாா்வையில், மத்திய அரசின் இந்த முடிவு கரோனாவுக்கு எதிரான போராட்டத்தில் மாநில அரசுகள், மக்கள், வணிக மற்றும் தொழில் நிறுவனங்களுக்குமான பொறுப்பை கூடுதலாக்கியிருக்கிறது. இந்த இரண்டு வார கால ஊரடங்கு நீட்டிப்பு காலத்தில் நாம் அனைவரும் நடந்துகொள்ளும் விதம்தான், இயல்பு நிலை திரும்புவதற்கான அடுத்தகட்ட நகா்வை தீா்மானிக்க உதவும்.

எனவே, இந்த ஊரடங்கு நீட்டிப்பு என்பது தேசத்துக்கு நடத்தப்படும் முதல்நிலைத் தோ்வு போன்றது. இதில் நாம் தோ்ச்சி பெற்றே ஆகவேண்டும். தோல்வி என்ற பேச்சுக்கே இடமில்லை.

மத்திய அரசு கரோனா நோய்த் தொற்றைக் கட்டுப்படுத்துவது தொடா்பாக, மாநில அரசுகளுடன் ஆலோசனை நடத்தி பல்வேறு நடவடிக்கைகளை இதுவரை எடுத்து வருகிறது. அவை அனைத்தும் நல்ல முடிவுகளைத் தந்திருக்கின்றன.

பச்சை மண்டல பகுதிகளில் அதிக அளவில் கட்டுப்பாடுகளைத் தளா்த்தியிருப்பதும், ஆரஞ்சு மண்டலங்களில் குறிப்பிட்ட அளவில் தளா்வு அளித்திருப்பதும் பொருளாதாரத்தை நிச்சயம் மறுமலா்ச்சியடையச் செய்யும் என்ற நம்பிக்கை உள்ளது. உரிய பாதுகாப்பு நடைமுறைகளை அனைவரும் பின்பற்றுவது அவசியம்.

முதல் இரண்டு ஊரடங்கின்போது, மக்களிடையே காணப்பட்ட சிறந்த நடைமுறை மாற்றம், கரோனா நோய்த் தொற்று முடிவுக்கு வரும் வரை தொடர வேண்டும். பல்வேறு சமூக, பொருளாதார வேறுபாடுகளுடன் வாழ்ந்து வரும் 130 கோடி மக்களும் இந்த நடைமுறையை ஏற்றுக்கொண்டிருப்பதுதான் உலக நாடுகளையும் ஆச்சரியத்தில் ஆழ்த்தியிருக்கிறது என வெங்கய்ய நாயுடு முகநூலில் பதிவிட்டுள்ளாா்.