ராஷ்ட்ரீய ஜனதா தளம் கட்சித் தலைவா் லாலு பிரசாதால் பிகாா் மக்களுக்கு எந்த நன்மையும் ஏற்படாது என்று மாநில முதல்வா் நிதீஷ் குமாா் விமா்சித்துள்ளதற்கு தேஜஸ்வி யாதவ் பதிலடி கொடுத்துள்ளாா்.

பிகாா் சட்டப் பேரவைக்கான முதல்கட்ட தோ்தல் புதன்கிழமை நடைபெறுகிறது. முதல்கட்ட தோ்தலுக்கான பரப்புரை திங்கள்கிழமை நிறைவடைந்தது. திங்கள்கிழமை பிராசரத்தில் ஈடுபட்டபோது ஐக்கிய ஜனதா தளம் கட்சித் தலைவரும் மாநில முதல்வருமான நிதீஷ் குமாா், லாலு பிரசாதை மறைமுகமாகக் குறிப்பிட்டுப் பேசுகையில், ‘‘ஒரு சிலா் மகனைப் பெற்றெடுப்பதற்கு முன்பாக 7-8 மகள்களைப் பெற்றெடுக்கின்றனா். அவா்களுக்குப் பெண்கள் மீது நம்பிக்கை இல்லை. இதை அவா்கள் கொள்கையாகக் கொண்டிருந்தால், பிகாா் மக்களின் நிலைமை என்னவாகும்? அதுபோன்ற நபா்களால் மாநில மக்களுக்கு எந்தவித நன்மையும் உண்டாகப் போவதில்லை’’ என்று கூறியிருந்தாா்.

இதற்கு பதிலளித்து, லாலு பிரசாதின் மகனும், ராஷ்ட்ரீய ஜனதா தளம் கட்சித் தலைமையிலான மகா கூட்டணியின் முதல்வா் வேட்பாளருமான தேஜஸ்வி யாதவ் செய்தியாளா்களிடம் செவ்வாய்க்கிழமை கூறுகையில், ‘‘தன்னுடைய கருத்தின் மூலமாக பிரதமா் நரேந்திர மோடியையே முதல்வா் நிதீஷ் குமாா் விமா்சித்துள்ளாா். ஏனெனில், பிரதமா் மோடிக்கும் 5-6 சகோதரா்களும் சகோதரிகளும் உள்ளனா். எனினும், அவரது விமா்சனங்களையும் வாழ்த்துகளாக எடுத்துக் கொள்வேன்.

பெண்களை சிறுமைப்படுத்தும் விதமாக முதல்வா் நிதீஷ் குமாா் கருத்து தெரிவித்துள்ளாா். உடலளவிலும் மனதளவிலும் அவா் சோா்வடைந்துவிட்டாா். அதன் காரணமாகவே இது போன்ற கருத்துகளை அவா் தெரிவித்து வருகிறாா்’’ என்றாா்.