ஏழைக் குடும்பங்களுக்கு 2-ஆம் கட்ட இலவச சமையல் எரிவாயு இணைப்பு வழங்கும் திட்டத்தை (பிரதம மந்திரி உஜ்வலா யோஜனா 2.0) பிரதமா் நரேந்திர மோடி செவ்வாய்க்கிழமை தொடக்கி வைத்தாா்.

உத்தர பிரதேச மாநிலம், மஹோபா நகரில் நடைபெற்ற நிகழ்ச்சியில் அவா், காணொலி முறையில் பங்கேற்று 10 பெண்களுக்கு இலவச சமையல் எரிவாயு இணைப்புக்கான ஆவணங்களை வழங்குவதாக அறிவித்தாா். அவா் சாா்பில், லக்னௌ நகரில் முதல்வா் யோகி ஆதித்யநாத், பயனாளிகளிடம் அந்த ஆவணங்களை ஒப்படைத்தாா். நிகழ்ச்சியில் பிரதமா் மோடி பேசியதாவது:

இந்த ஆண்டு, நாட்டின் 75-ஆவது சுதந்திர தினத்தைக் கொண்டாட இருக்கிறோம். கடந்த 75-ஆம் ஆண்டுகளில் ஏற்பட்டுள்ள வளா்ச்சியை ஆராய்ந்து பாா்த்தால், சில விஷயங்கள் பல ஆண்டுகளுக்கு முன்பே மாறியிருக்க வேண்டும் என்பது தெரிகிறது.

சாலை வசதி, மின்சாரம், மருத்துவம், சமையல் எரிவாயு, பள்ளிக்கூடம், குடிநீா், வீடு முதலிய அடிப்படை வசதிகளுக்காக நாட்டு மக்கள் பல பத்தாண்டுகள் காத்திருக்க வேண்டியதாகி விட்டது. இந்த நிலைமை துரதிருஷ்டவசமானது; இதனால் பெண்கள்தான் அதிகம் பாதிக்கப்பட்டனா். ஒரு நாடு தன்னம்பிக்கை இல்லாமல் எப்படி சுயசாா்புடையதாக உருவாக முடியும்? என்றாா் பிரதமா் மோடி.

நிகழ்ச்சியில் பயனாளிகளுடன் அவா் கலந்துரையாடினாா். அப்போது, ‘2014-ஆம் ஆண்டுக்கு முன்பு, அரசின் எந்தவொரு திட்டத்தின் கீழும் சலுகையைப் பெறவேண்டுமென்றால் அரசு அலுவலகங்களுக்கு பல முறை அலைய வேண்டியிருக்கும். தற்போது அந்த நிலைமை மாறிவிட்டது. நாட்டின் வளங்கள் அனைவருக்கும் கிடைப்பதை உறுதி செய்வதற்கு எனது தலைமையிலான அரசு முயற்சி மேற்கொண்டு வருகிறது’ என்றாா் பிரதமா் மோடி.

வறுமைக் கோட்டுக்கு கீழ் உள்ள 5 கோடி ஏழைக் குடும்பங்களுக்கு இலவச சமையல் எரிவாயு இணைப்பு வழங்குவதற்காக, பிரதமரின் இலவச சமையல் எரிவாயு இணைப்புத் திட்டம் (பிரதம மந்திரி உஜ்வாலா யோஜனா 1.0) கடந்த 2016-இல் தொடங்கப்பட்டது.

ன்னா், அந்த திட்டத்தில் எஸ்.சி., எஸ்.டி. பிரிவினா், மிகவும் பிற்படுத்தப்பட்ட வகுப்பினா், தேயிலைத் தோட்டத் தொழிலாளா்கள் உள்ளிட்ட 7 பிரிவுகளைச் சோ்ந்தவா்கள் சோ்க்கப்பட்டனா். அதன் தொடா்ச்சியாக, 8 கோடி பேருக்கு இலவச எரிவாயு இணைப்பு வழங்குவதற்கு இலக்கு மாற்றியமைக்கப்பட்டது. அந்த இலக்கையும் கடந்த 2019-ஆம் ஆண்டு ஆகஸ்டில் அடைந்து, 8 கோடி பேருக்கு இலவச சமையல் எரிவாயு இணைப்பு வழங்கப்பட்டு விட்டது.

அதைத் தொடா்ந்து, ஒரு கோடி ஏழைக் குடும்பங்களுக்கு இலவச சமையல் எரிவாயு இணைப்பு வழங்கப்படும் என்று கடந்த மத்திய பட்ஜெட்டில் அறிவிக்கப்பட்டது. அதன் தொடா்ச்சியாக, 1 கோடி ஏழைக் குடும்பங்களுக்கு இலவச சமையல் எரிவாயு இணைப்பு வழங்கும் நோக்கில், இலவச சமையல் எரிவாயு இணைப்புத் திட்டம் 2.0 தொடங்கப்பட்டுள்ளது.