சான் பிரான்ஸிஸ்கோ: பயனாளர்கள் தங்களது செல்லிடப்பேசியில் பதிவு செய்யும் மிகக் குறுகிய விடியோக்களையும், நேரலை விடியோக்களையும் பதிவேற்றம் செய்யும் வசதிகளை யூடியூப் சோதனை முறையில் முயற்சித்து வருகிறது.

இந்த குறு விடியோ என்பது 5 வினாடிகள் முதல் 60 வினாடிகள் நீளம் கொண்டதாக இருக்கும் வகையில் சோதனை செய்யப்பட்டு வருகிறது.

இதன் மூலம் ஒருவர் தனது மிகக் குறுகிய விடியோவை யூடியூப்பில் பதிவேற்றம் செய்து, அதனை ஏராளமானோர் பார்வையிட வாய்ப்பு ஏற்படுத்தப்படும். அந்த விடியோவை பதிவேற்றம் செய்து, அதனை மற்ற சமூக வலைத்தளங்கள் வாயிலாக பயனாளர்கள் பகிர்ந்து கொள்ளவும் முடியும்.

அதே நிலையில், ஒருவர் தான் பதிவேற்றம் செய்யும் விடியோவின் அளவையும் மாற்றியமைத்துக் கொள்ளும் வசதியும் ஏற்படுத்தப்படுகிறது. தற்போது இந்த விடியோவுடன் பதிவான ஆடியோ மட்டுமே ஒலிக்கும், எதிர்காலத்தில், ஆடியோவை இணைக்கும் வாய்ப்பும் ஏற்படுத்தப்படும் என்று தெரிவிக்கப்பட்டுள்ளது.