பள்ளிகளைத் திறக்க மாநில அரசு யோசனை: திங்கள்கிழமை ஆலோசனைக் கூட்டம்

பள்ளிகளைத் திறக்க மாநில அரசு யோசித்து வருகிறது. இதுகுறித்து விவாதிக்க ஜூன் 28-ஆம் தேதி பள்ளிக் கல்வித் துறை உயரதிகாரிகளுடன் அமைச்சா் எஸ்.சுரேஷ்குமாா் ஆலோசனை நடத்த இருக்கிறாா்.

கரோனா இரண்டாவது அலை படிப்படியாக ஓய்ந்து வரும் நிலையில், 2021-22-ஆம் கல்வி ஆண்டுக்காக பள்ளிகளைத் திறக்க கா்நாடக அரசு யோசித்து வருகிறது. கடந்த ஆண்டு கரோனா தொற்று பரவியதைத் தொடா்ந்து, பள்ளிகள் மூடப்பட்டன. அதன்பிறகு, இணைய வழியில் வகுப்புகள் நடத்தப்பட்டன. கடந்த ஆண்டின் இறுதியில், அதுவும் 8 முதல் 10-ஆம் வகுப்பு மாணவா்களுக்கு மட்டும் கட்டுப்பாடுகளுடன் பள்ளிகள் திறக்கப்பட்டன. மாா்ச் மாதத்தில் கரோனா இரண்டாவது அலையைத் தொடா்ந்து, பள்ளிகள் மீண்டும் மூடப்பட்டன.

இந்நிலையில், இரண்டாமாண்டு பியூசி தோ்வுகள் ரத்துசெய்யப்பட்டுள்ளன. 10-ஆம் வகுப்புக்கான பொதுத்தோ்வை எளிமையான முறையில் ஜூலை இறுதி வாரத்தில் நடத்த திட்டமிட்டுள்ளன. ஜூலை 1-ஆம் தேதி முதல் 2021-22-ஆம் ஆண்டுக்கான கல்வியாண்டை தொடங்க பள்ளிக் கல்வித் துறை திட்டமிட்டுள்ளது.

பெங்களூரு, பள்ளிக் கல்வித் துறை ஆணையரகத்தில் வெள்ளிக்கிழமை இணைய வழியில் மாவட்ட காவல் துறை உயரதிகாரிகளுடன் பள்ளிக் கல்வித் துறை அமைச்சா் எஸ்.சுரேஷ்குமாா் ஆலோசனை நடத்தினாா். இந்தக் கூட்டத்தில், பள்ளிக் கல்வித் துறை ஆணையா் வி.அன்புக்குமாா் உள்ளிட்ட முக்கிய அதிகாரிகள் உடனிருந்தனா்.

இதில், பள்ளிகளை மீண்டும் திறக்க தேவையான நடவடிக்கைகளை எடுக்கும்படி மாவட்ட அதிகாரிகளை அமைச்சா் சுரேஷ்குமாா் கேட்டுக்கொண்டாா். முதல்கட்டமாக, 7 முதல் 10-ஆம் வகுப்புகளையும், அடுத்தகட்டமாக, 5, 6-ஆம் வகுப்புகளையும் தொடங்க அரசு யோசித்து வருகிறது. இதுகுறித்து ஜூன் 28-ஆம் தேதி உயரதிகாரிகளுடன் ஆலோசனை நடத்த பள்ளிக் கல்வித் துறை அமைச்சா் எஸ்.சுரேஷ்குமாா் திட்டமிட்டுள்ளாா்.

இதுபற்றி அமைச்சா் சுரேஷ்குமாா் கூறியதாவது:

பள்ளிகளை மீண்டும் திறப்பது குறித்து ஜூன் 28-ஆம் தேதி அதிகாரிகள், கல்வி அறிஞா்களுடன் ஆலோசனை நடத்த இருக்கிறேன். இந்தக் கூட்டத்தில் வெளிப்படும் கருத்துகளை முதல்வா் எடியூரப்பாவிடம் தெரிவிப்போம். அதன்பிறகு, பள்ளிகள் திறப்பது குறித்து முதல்வா் எடியூரப்பா முடிவு செய்வாா்.

பள்ளிகளை திறப்பதைக் காட்டிலும், கல்வி நடவடிக்கைகளை தொடங்குவதே எங்களது நோக்கமாகும். உச்சநீதிமன்றத்தின் உத்தரவுப்படி, ஜூலை 31-ஆம் தேதிக்குள் இரண்டாமாண்டு பியூசி தோ்வு முடிவுகள் அறிவிக்கப்படும். வெகுவிரைவில் எஸ்.எஸ்.எல்.சி. பொதுத்தோ்வுக்கான தேதிகள் வெளியிடப்படும் என்றாா்.