பெங்களூரு மாநகராட்சி: ரூ. 9,291.33 கோடிக்கு நிதிநிலை அறிக்கை தாக்கல்

பெங்களூரு மாநகராட்சி 2021-22-ஆம் ஆண்டுக்கு ரூ. 9,291.33 கோடி மதிப்பிலான நிதிநிலை அறிக்கையைத் தாக்கல் செய்துள்ளது.

பெங்களூரு, மல்லேஸ்வரத்தில் உள்ள ஐபிபி பயிற்சி மையத்தில் சனிக்கிழமை பெங்களூரு மாநகராட்சியின் 2021-22-ஆம் நிதியாண்டுக்கான நிதிநிலை அறிக்கையை தாக்கல் செய்து சிறப்பு ஆணையா் (நிதி) துளசி மத்தினேனி பேசியது: நிதி ஆதாரங்களை விவேகத்தோடு பயன்படுத்துவது பெரும் சவாலாக இருந்துவந்துள்ளது.

இதை சீா்செய்ய 3 திட்டங்கள் வகுக்கப்பட்டுள்ளன. அதன்படி, நிதி ஆதாரங்கள் பரவலாக்கப்படும்; மண்டலம் மற்றும் வாா்டு அளவில் நிதிசெலவினங்களுக்கு பொறுப்பேற்கும் நிலை உருவாக்கப்படும். பெங்களூரு நகர நிா்வாகத்துக்காக பெங்களூரு மாநகராட்சி சட்டம், 2020 கொண்டுவரப்பட்டுள்ளது. இந்தச் சட்டத்தின் வாயிலாக அதிகாரத்தைப் பரவலாக்க வகை செய்யபட்டுள்ளதோடு பெங்களூரு மாநகரின் 1.2 கோடி மக்களின் எதிா்பாா்ப்புகளை நிறைவேற்றவும், நலனைப் பேணி காக்கவும் முடியும்.

பகுதிக் குழு, வாா்டு குழு, சட்டப்பேரவை தொகுதி ஆலோசனைக் குழு, மண்டலக் குழுக்களை அமைக்க புதிய சட்டம் வகை செய்துள்ளது. மாநகராட்சியின் சொத்துகள், பொது பயன்பாட்டு இடங்களைப் பராமரிப்பது தொடா்பான வேலைகள் குறித்து முடிவெடுக்கும் அதிகாரம், மண்டல அளவில் விடப்படுகிறது. ரூ. 2 ஆயிரம் கோடி மதிப்பிலான நிதி ஆதாரம் குறித்த செலவினங்களை மண்டல அளவில் தீா்மானிக்கலாம். இது மிகப்பெரிய நிா்வாக சீா்த்திருத்தமாகும்.

இந்த வகையில் முடிவுகளை எடுக்கும் அதிகாரம் மக்களிடம் ஒப்படைக்கப்படும்.

நிதி ஆதாரத்தை ஒதுக்குவது தொடா்பாக முதல்வா், ‘பெங்களூரு தொலைநோக்கு-2022’ திட்டத்தை அறிவித்துள்ளாா்.

கரோனாவால் மாநில அரசின் நிதி ஆதாரம் குறைந்துள்ளது. எனினும், உலகின் முக்கிய நகரமாக பெங்களூரை மாற்றுவதற்கு போதுமான நிதி ஒதுக்கப்பட்டுள்ளது. பிரதான வெளிவட்ட சாலையை தரம் உயா்த்த உயா் வாகனங்கள் செல்லும் தடத்தை அமைக்க முதல்வா் உத்தரவிட்டுள்ளாா். இதற்காக 191கி.மீ. நீள சாலையை அமைப்பதற்காக ரூ. 473.50 கோடி நிதி ஒதுக்கப்பட்டுள்ளது. பொலிவுறு நகரம் திட்டம், முதல்வரின் நகரவளா்ச்சித் திட்டம் போன்றவற்றால் சாலையின் கட்டமைப்பு மேம்படுத்தப்படும்.

பெங்களூரு மாநகராட்சியின் அனைத்து சேவைகளையும், தகவல்களையும் குடிமக்கள் அறிந்துகொள்ள ஒருங்கிணைந்த இணையதளம் உருவாக்கப்படும். நிதி ஆதாரங்கள் பரவலாக்கப்பட்டாலும், அதுகுறித்து கண்காணிக்க தேசிய நகராட்சி கணக்கியல் வழிகாட்டியின்படி மாநகராட்சி கணக்கியல் மற்றும் நிதிநிலை அறிக்கை மேலாண்மை விதிகள் வகுக்கப்பட்டு, மாநில அரசின் ஒப்புதலுக்காக அனுப்பப்பட்டுள்ளது.

மாநகராட்சியின் எல்லா வேலைகளுக்கும் எண் வழங்கும்முறை புதுப்பிக்கப்பட்டுள்ளது. ஆணையரின் தலைமையில் இயங்கும் தொழில்நுட்ப கண்காணிப்பு மையத்தின் வாயிலாக எல்லா கட்டுமானப் பணிகளையும் நேரில் ஆய்வுசெய்ய முடிவு செய்யப்பட்டுள்ளது. இது ஏப்ரல் 1-ஆம் தேதிமுதல் அமலாக்கப்படும். இதன்மூலம் மாநகராட்சியின் நிதி மேலாண்மை மேம்படும்.

ஏற்கெனவே செயல்படுத்தப்பட்ட பணிகளுக்காக ரூ. 3 ஆயிரம் கோடி ஒப்பந்ததாரா்களுக்கு வழங்க வேண்டியுள்ளது. தற்போது நடைபெறும் பணிகளுக்கு ரூ. 7 ஆயிரம் கோடி அளிக்க வேண்டியுள்ளது. இதுபோன்ற நிலுவைத் தொகை இல்லாதவாறு நிதி மேலாண்மை சீா்செய்யப்படும்.

ஸ்டேட்பேங்க் ஆஃப் இந்தியாவில் மாநகராட்சியின் சொத்துகளை அடமானம் வைத்து கடன் பெறப்பட்டிருந்தது. அந்தக் கடன்கள் படிப்படியாக தீா்ந்து கடைசி கடனை தீா்த்து, கே.ஆா்.சந்தையை மீட்போம். எதிா்காலத்தில் நிதி ஆதாரங்களைத் திரட்ட மாநகராட்சி சாா்பில் கடன் பத்திரங்கள் வெளியிடப்படும். நிா்வாகத்தை சீரமைக்க முன்னாள் ஐஏஎஸ் அதிகாரிகள் பயன்படுத்திக் கொள்ளப்படுவா் என்றாா்.