உ.பி.யில் பாஜக எம்.எல்.ஏ. மனைவிக்கே மருத்துவமனையில் இடமில்லை

உத்தரப் பிரதேசத்தில் கரோனா தொற்று உறுதி செய்யப்பட்ட மனைவிக்கு மருத்துவமனையில் இடம் கிடைக்காமல் பாஜக எம்.எல்.ஏ. ராம்கோபால் லோதி 3 மணி நேரம் திணறியுள்ளார்.

பாஜக எம்.எல்.ஏ. லோதிக்கு கரோனா தொற்று இருப்பது உறுதி செய்யப்பட்டு மே 7-ம் தேதி குணமடைந்து வீடு திரும்பினார். இதைத் தொடர்ந்து, அவரது மனைவிக்கும் நோய்த் தொற்று இருப்பது உறுதி செய்யப்பட்டது.

இதையடுத்து, மனைவியை மருத்துவமனையில் சேர்க்க எம்.எல்.ஏ. லோதி முயற்சித்துள்ளார். ஆக்ரா மருத்துவமனையில் 3 மணி நேரம் போராடியும் அவரது மனைவிக்கு இடம் கிடைக்கவில்லை. மருத்துவமனையில் போதிய படுக்கை வசதி இல்லாததாக அதிகாரிகள் தெரிவித்தனர்.

இதைத் தொடர்ந்து, இந்த விவகாரம் குறித்து சமூக ஊடகங்களில் விடியோ வெளியிட்டார் லோதி. இந்த விடியோ மே 8-ம் தேதி சமூக ஊடகங்களில் பரவலாகப் பகிரப்பட்டது. இதையடுத்து, மாவட்ட ஆட்சியரின் தலையீட்டுக்குப் பிறகு அவரது மனைவிக்கு மருத்துவமனையில் இடம் வழங்கப்பட்டது.