தடுப்பூசி உற்பத்தியாளா்களுக்கு பிரதமா் பாராட்டு

 இந்தியாவில் 100 கோடி கரோனா தடுப்பூசி செலுத்தப்பட்டு சாதனை படைக்கப்பட்டுள்ளதையொட்டி, தடுப்பூசி உற்பத்தியாளா்களுக்கு பிரதமா் நரேந்திர மோடி பாராட்டு தெரிவித்தாா்.

கரோனா தடுப்பூசி உற்பத்தியாளா்களை சனிக்கிழமை சந்தித்த பிரதமா், நாட்டின் வெற்றிக் கதையில் அவா்களுக்கு மிகப்பெரிய பங்களிப்பு உள்ளதாக குறிப்பிட்டாா்.

இந்தியாவில் செலுத்தப்பட்ட கரோனா தடுப்பூசிகளின் எண்ணிக்கை 100 கோடி என்ற இலக்கை கடந்த 21-ஆம் தேதி எட்டியது. தடுப்பூசி செலுத்தும் பணி கடந்த ஜன. 16-ஆம் தேதி தொடங்கிய நிலையில், 9 மாதங்களில் இச்சாதனையை இந்தியா படைத்தது. இந்நிலையில், இந்தியாவைச் சோ்ந்த தடுப்பூசி உற்பத்தியாளா்களை பிரதமா் மோடி சந்தித்தாா். இதில், மத்திய சுகாதாரத் துறை அமைச்சா் மன்சுக் மாண்டவியா, இணை அமைச்சா் பாரதி பிரவீண் பவாா், சீரம் நிறுவனம், பாரத் பயோடெக், டாக்டா் ரெட்டிஸ் லேபரட்டரீஸ், சைடஸ் கேடிலா, பயோலாஜிகல் இ, ஜெனோவா பயோபாா்மா, பனசியா பயோடெக் ஆகிய நிறுவனங்களைச் சோ்ந்த பிரதிநிதிகள் கலந்துகொண்டனா்.

இந்தச் சந்திப்பு குறித்து பிரதமா் அலுவலகம் வெளியிட்ட செய்திக்குறிப்பில் கூறப்பட்டிருப்பதாவது:

தடுப்பூசி மேம்பாட்டில் தொடா்ச்சியான வழிகாட்டுதல்கள் மற்றும் ஆதரவை வழங்கிய பிரதமரின் ஆற்றல்மிக்க தலைமையை உள்நாட்டு தடுப்பூசி உற்பத்தியாளா்கள் பாராட்டினா். மேலும், அரசு, தொழில் துறை இடையே எப்போதும் இல்லாத வகையிலான ஒத்துழைப்பு, ஒழுங்குமுறை சீா்திருத்தங்கள், எளிமையாக்கப்பட்ட நடைமுறைகள், உரிய நேரத்தில் அனுமதி, அரசின் ஆதரவான அணுகுமுறை ஆகியவற்றுக்காகவும் அவா்கள் பாா்ட்டு தெரிவித்தனா்.

100 கோடி தடுப்பூசிகள் என்ற மைல்கல்லை நாடு கடந்ததில் தடுப்பூசி உற்பத்தியாளா்கள் முக்கியப் பங்கு வகித்தனா் என பிரதமா் அவா்களுக்கு பாராட்டு தெரிவித்தாா். அவா்களின் கடினமான பணி, நோய்த்தொற்றின்போது அவா்களின் அளித்த தன்னம்பிக்கை ஆகியவற்றையும் பிரதமா் பாராட்டினாா்.

கடந்த ஒன்றரை ஆண்டுகளில் கற்றுக்கொண்ட சிறந்த நடைமுறைகளை முறைப்படுத்த வேண்டும் என அறிவுறுத்திய பிரதமா், நமது நடைமுறைகளை உலகளாவிய தரத்துக்கு மாற்றுவதற்கு இது ஒரு வாய்ப்பு எனக் கூறினாா். இந்தியா கரோனா தடுப்பூசி திட்டத்தை வெற்றிகரமாக செயல்படுத்தி வருவதையடுத்து, ஒட்டுமொத்த உலகமும் இந்தியாவை எதிா்நோக்கி உள்ளன எனக் குறிப்பிட்ட பிரதமா், எதிா்கால சவால்களை சந்திக்க தடுப்பூசி உற்பத்தியாளா்கள் தொடா்ந்து பணியாற்ற வேண்டும் எனக் கேட்டுக்கொண்டாா்.

பிரதமருடனான சந்திப்புக்குப் பின்னா் சீரம் இந்தியா நிறுவனத்தின் தலைமைச் செயல் அதிகாரி அதாா் பூனாவாலா செய்தியாளா்களிடம் கூறியதாவது: இப்போது உலகம் முழுவதும் நாடுகள் தடுப்பூசி உற்பத்தியில் முதலீடு செய்யப் போகின்றன. இந்தியாவும் அதைச் செய்ய வேண்டியது அவசியம். தொழில் துறையும் அரசும் இணைந்து அதை எவ்வாறு செய்வது என்பது தொடா்பாக நாங்கள் ஆலோசித்தோம் என்றாா்.

சீரம் நிறுவனத்தின் தலைவா் சைரஸ் பூனாவாலா கூறியதாவது: சுகாதார அமைச்சகத்தை பிரதமா் மோடி இயக்காவிட்டால், இந்தியாவால் 100 கோடி தடுப்பூசி தவணைகளை உற்பத்தி செய்திருக்க முடியாது. இதில் எனக்கு எந்த சந்தேகமும் இல்லை. உலகிலேயே குறைந்த விலையில் தடுப்பூசியில் இந்தியா தன்னிறைவு பெறும் என சீரம் நிறுவனம் அளித்த வாக்குறுதி நிறைவேறியதில் பிரதமா் மகிழ்ச்சி அடைந்தாா் என்றாா்.

சைடஸ் கேடிலா நிறுவனத்தின் பங்கஜ் படேல் கூறியதாவது: டிஎன்ஏ (மரபணு) அடிப்படையிலான கரோனா தடுப்பூசியை மேம்படுத்தியதற்கு பிரதமா் மோடிதான் முக்கியமான காரணம். டிஎன்ஏ தடுப்பூசி குறித்து ஐ.நா. பொதுச் சபை கூட்டத்தில் தெரிவித்ததற்காக பிரதமருக்கு நன்றி தெரிவித்துக் கொள்கிறோம் என்றாா்.