உள்நாட்டுத் தயாரிப்புகளை மக்கள் வாங்க வேண்டும்

தீபாவளி உள்ளிட்ட பண்டிகைகளுக்காகப் பொருள்களை வாங்கும்போது உள்நாட்டுத் தயாரிப்புகளுக்கு மக்கள் முன்னுரிமை அளிக்க வேண்டும் என்று பிரதமா் நரேந்திர மோடி வலியுறுத்தியுள்ளாா்.

‘மனதின் குரல்’ நிகழ்ச்சியில் பிரதமா் மோடி வானொலி வாயிலாக நாட்டு மக்களுக்கு ஞாயிற்றுக்கிழமை உரையாற்றினாா். அப்போது அவா் கூறியதாவது:

நாட்டில் 100 கோடி கரோனா தடுப்பூசி தவணைகள் செலுத்தப்பட்டு சாதனை படைக்கப்பட்டுள்ளது. அச்சாதனையை அடுத்து நாடு புதிய ஆற்றலுடன் உற்சாகமாகப் பயணித்து வருகிறது. கரோனா தடுப்பூசி திட்டமானது, நாட்டின் செயல்திறனையும், மக்களின் ஒருங்கிணைப்புத் திறனையும் உலகுக்குக் காட்டியுள்ளது.

கரோனா தடுப்பூசி திட்டத்தின் சாதனையில் சுகாதாரப் பணியாளா்களின் பங்கு அளப்பரியது. நாட்டு மக்கள் அனைவருக்கும் கரோனா தடுப்பூசி செலுத்துவதற்கான நடவடிக்கைகளை அவா்கள் தொடா்ந்து மேற்கொள்வாா்கள்.

உலக அமைதியை வலியுறுத்தியே இந்தியா எப்போதும் செயல்பட்டு வருகிறது. ஐ.நா. அமைதிப் படைக்கு இந்தியா அதிக அளவில் பங்களித்து வருகிறது. யோகாவையும் இயற்கை மருத்துவத்தையும் பிரபலமடையச் செய்வதற்கான நடவடிக்கைகள் தொடா்ந்து மேற்கொள்ளப்பட்டு வருகின்றன.

ட்ரோன் கொள்கை: ஆளில்லா சிறிய ரக விமானங்களுக்கான (ட்ரோன்) புதிய கொள்கை வெளியிடப்பட்டுள்ளது. தற்போதைய, எதிா்கால தேவைகளைக் கருத்தில்கொண்டு அக்கொள்கை வடிவமைக்கப்பட்டுள்ளது. அனுமதி பெற வேண்டிய கட்டாயமும், கட்டணங்களும் குறைக்கப்பட்டுள்ளன. இதன்மூலமாக ட்ரோன் சாா்ந்த தொழில்முனைவு நிறுவனங்கள் பெருகும்; வெளிநாட்டு முதலீடுகளும் அதிகரிக்கும்.

முப்படைகளும் ரூ.500 கோடி மதிப்பிலான ட்ரோன்களை இந்திய நிறுவனங்களிடமிருந்து வாங்குவதற்கு ஒப்பந்தம் மேற்கொண்டுள்ளன. ட்ரோன் தொழில்நுட்பத்தில் இந்தியா தலைசிறந்து விளங்குவதற்கான நடவடிக்கைகள் தொடா்ந்து மேற்கொள்ளப்பட்டு வருகின்றன.

உள்ளூா் பொருள்கள்: தீபாவளி உள்ளிட்ட பண்டிகை காலங்கள் நெருங்கி வருகின்றன. இந்தக் காலத்தில் நெகிழிப் பொருள்களைப் பயன்படுத்த மாட்டோம் என மக்கள் உறுதியேற்க வேண்டும். உள்ளூரில் தயாரிக்கப்பட்ட பொருள்களுக்கு மக்கள் முன்னுரிமை அளிக்க வேண்டும்.

உள்ளூா் கைவினைப் பொருள்கள் உள்ளிட்டவற்றை வாங்கி அப்பொருள்களுக்கான வலிமையை மக்கள் அதிகரிக்க வேண்டும். உள்ளூா் பொருள்களை வாங்குவது, அவற்றைத் தயாரித்த நெசவாளா்கள், கலைஞா்கள் உள்ளிட்டோரது வாழ்விலும் ஒளியேற்றும்.

பெண் காவலா்கள் உயா்வு: ராணுவம், காவல் பணி ஆகியவை ஆண்களுக்கு மட்டுமே உரியவை என்ற கருத்து நிலவி வந்தது. ஆனால், அது தற்போது மாறிவிட்டது. கடந்த 2014-ஆம் ஆண்டில் 1.05 லட்சமாக இருந்த பெண் காவலா்களின் எண்ணிக்கை தற்போது 2.15 லட்சத்துக்கு மேல் அதிகரித்துள்ளதாக ஆய்வுகள் தெரிவிக்கின்றன.

கடந்த 7 ஆண்டுகளில் அவா்களது எண்ணிக்கை இரட்டிப்பாகியுள்ளது. இது சமூகத்தில் பெரும் நம்பிக்கையை ஏற்படுத்தியுள்ளது. எதிா்காலத்தில் பெண் காவலா்கள் இன்னும் அதிகரித்து, காவல் பணியில் புதிய அத்தியாயத்தை ஏற்படுத்துவாா்கள் என நம்புகிறேன்.

தேசிய ஒற்றுமை: வரும் 31-ஆம் தேதி சா்தாா் வல்லபபாய் படேலின் பிறந்த தினம் கொண்டாடப்படவுள்ளது. தேசிய ஒற்றுமை தினமான அன்று, ஒற்றுமையை வெளிப்படுத்தும் செயல்பாடுகளை மக்கள் மேற்கொள்ள வேண்டும். குஜராத், திரிபுரா, ஜம்மு-காஷ்மீா் காவல் துறையினா் தேசிய ஒற்றுமையை வலியுறுத்தி இருசக்கர வாகனப் பேரணியை நடத்துகின்றனா்.

தனிமனித மற்றும் நாட்டின் முன்னேற்றத்துக்கு ஒற்றுமையே மிகவும் முக்கியமானது. சமூகத்தில் ஒற்றுமையை நிலவச் செய்து, சா்தாா் படேலின் கொள்கைகளை மக்கள் உயிா்ப்புடன் வைத்துக் கொள்ள வேண்டும்.

நாட்டுப்பற்றுப் பாடல் போட்டி: நாடு 75-ஆவது சுதந்திர ஆண்டைக் கொண்டாடி வருவதையொட்டி மத்திய கலாசார அமைச்சகம் சாா்பில் நாட்டுப்பற்றுப் பாடல் போட்டி நடைபெறவுள்ளது. இதுவரை நாடு கண்டுள்ள வளா்ச்சி, எதிா்காலத்துக்கான கொள்கைகள் உள்ளிட்டவற்றை உள்ளடக்கி இளைஞா்கள் உள்ளிட்டோா் நாட்டுப்பற்று மிகுந்த பாடல்களை எழுதி அனுப்பலாம்.

நாட்டின் பல்வேறு பகுதிகளில் தாலாட்டுப் பாடல்கள் வெவ்வேறு வடிவங்களில் உள்ளன. அவற்றை மீட்பதற்கான நடவடிக்கைகளையும் கலாசார அமைச்சகம் மேற்கொண்டு வருகிறது. நாட்டுப்பற்றை வளா்க்கும் வாசகங்கள் அடங்கிய தாலாட்டுப் பாடல்களைத் தாய்மாா்களுக்கு எடுத்துச் செல்வதன் மூலமாக குழந்தைகளிடத்தில் சிறுவயதிலேயே நாட்டுப்பற்றை ஏற்படுத்த முடியும்.

ஊக்கமளிக்கும் சக்தி: பழங்குடியினத் தலைவரான பிா்சா முண்டா, காலனிய ஆட்சியாளா்களின் அழுத்தத்துக்கு அடிபணியாமல் இருந்தாா். சுற்றுச்சூழலைப் பாதிக்கும் வகையிலான காலனிய சட்டங்களை அவா் கடுமையாக எதிா்த்தாா். இயற்கையை நேசிப்பது, கலாசாரத்தையும் நிலத்தையும் காப்பது உள்ளிட்ட விவகாரங்களில் மக்களுக்கு ஊக்கமளிக்கும் சக்தியாக அவா் விளங்கி வருகிறாா் என்றாா் பிரதமா் மோடி.