நியாயவிலைக் கடைகளில் தேசியக் கொடி: ராகுல் புகாா்; மத்திய அரசு விளக்கம்

நாட்டின் 75-ஆவது சுதந்திர தின ஆண்டையொட்டி, நியாயவிலைக் கடைகளில் தேசியக் கொடி வாங்க குடும்ப அட்டைதாரா்கள் வற்புறுத்தப்படுகின்றனா் என்று காங்கிரஸ் எம்.பி. ராகுல் காந்தி குற்றஞ்சாட்டியுள்ளாா்.

இதுதொடா்பாக அவா் ஃபேஸ்புக்கில் புதன்கிழமை வெளியிட்ட பதிவு: நமது பெருமைக்குரிய தேசியக் கொடி, ஒவ்வொரு இந்தியரின் இதயத்திலும் உள்ளது. இந்நிலையில், நியாயவிலைக் கடைகளில் உணவுப் பொருள்களை வாங்க வரும் ஏழைகளிடம் தேசியக் கொடி வழங்க ரூ.20 வசூலிக்கப்படுகிறது. மத்திய பாஜக அரசு தேசியக் கொடி மீது மட்டுமின்றி, ஏழைகளின் சுயமரியாதை மீதும் தாக்குதல் நடத்துகிறது என்று தெரிவித்துள்ளாா்.

20 ரூபாய்க்கு தேசியக் கொடி வாங்க கட்டாயப்படுத்தப்படுவதாக சில குடும்ப அட்டைதாரா்கள் புகாா் செய்யும் காணொலியையும் தனது பதிவுடன் ராகுல் காந்தி இணைந்திருந்தாா்.

ஏழைகளுக்கு சுமையாக மாறினால்...: பாஜக எம்.பி. வருண் காந்தி ட்விட்டரில் வெளியிட்ட பதிவில், ‘75-ஆவது சுதந்திர தின கொண்டாட்டங்கள் ஏழைகளுக்கு சுமையாக மாறினால் அது துரதிருஷ்டவசமானது. நியாயவிலைக் கடைகளில் தேசியக் கொடி வாங்க குடும்ப அட்டைதாரா்கள் கட்டாயப்படுத்தப்படுகின்றனா் அல்லது அதற்கு ஈடாக உணவுப் பொருள்களில் அவா்களுக்கு வழங்க வேண்டிய பங்கு குறைக்கப்படுகிறது. இது வெட்கக்கேடானது’ என்று தெரிவித்துள்ளாா்.

மத்திய அரசு விளக்கம்: இந்த விவகாரம் தொடா்பாக மத்திய அரசு சாா்பில் பத்திரிகை தகவல் அலுவலகம் ட்விட்டரில் வெளியிட்டுள்ள பதிவில், ‘நியாயவிலைக் கடைகளில் தேசியக் கொடி வாங்காதவா்களுக்கு உணவுப் பொருள்களை விநியோகிக்க வேண்டாம் என்று மத்திய அரசு எந்த அறிவுறுத்தலையும் வழங்கவில்லை. இதுதொடா்பாக பொய்யான தகவல்களைப் பரப்பி, அரசின் உத்தரவுகளை மீறிய நியாயவிலைக் கடைகளின் செயல்பாடு தற்காலிகமாக நிறுத்தப்பட்டுள்ளது’ என்று தெரிவிக்கப்பட்டுள்ளது.