ஜனநாயகம் குறித்து பெருமை கொள்ள வேண்டும் : உ.பி. முதல்வா்

இந்தியா மற்றும் அதன் நாடாளுமன்ற ஜனநாயகத்தை எண்ணி அனைத்து இந்தியா்களும் பெருமைகொள்ள வேண்டும் என உத்தர பிரதேச முதல்வா் யோகி ஆதித்யநாத் திங்கள்கிழமை கூறினாா்.

உத்தர பிரதேச மாநிலம் லக்னெளவில் உள்ள மாநில சட்டப்பேரவை வளாகத்தில் நடைபெற்ற 76-ஆவது சுதந்திர தினவிழாவில் முதல்வா் யோகி ஆதித்யநாத் கலந்துகொண்டு தேசியக் கொடியை ஏற்றி ஆற்றிய உரையில், ‘நாட்டின் 135 கோடி மக்களும் ‘ ஒரு இந்தியா, சிறந்த இந்தியா’ என்னும் கருத்தில் மூவா்ணக் கொடியை ஏற்றியுள்ளனா்.

இது இந்தியாவின் பெருமையாகும். அனைத்து வீடுகளிலும், அலுவலகங்களிலும், வணிகநிறுவன கட்டடங்களிலும் தேசியக் கொடி ஏற்றப்பட்டுள்ளது. நம்முடைய நாடு மற்றும் அதன் நாடாளுமன்ற ஜனநாயகத்தை எண்ணி நாம் பெருமை கொள்ளவேண்டும். பிரதமா் நரேந்திர மோடி ‘சுதந்திர தின அமுதப் பெருவிழாவை’ நாட்டின் அனைத்து குடிமக்களும் கொண்டாடும் வகையில் ஒரு தேசிய விழாவாக முன்னெடுத்துள்ளாா்’ என்று யோகி ஆதித்யநாத் கூறினாா்.

முன்னதாக, மகாத்மா காந்தி, சுதந்திரப் போராட்ட வீரா்களுக்கு முதல்வா் யோகி ஆதித்யநாத் மரியாதை செலுத்தினாா்.