ஊட்டச்சத்து குறைபாட்டை போக்குவது அவசியம்

ஊட்டச்சத்து குறைபாட்டைப் போக்குவதற்கான நடவடிக்கைகளில் மக்கள் கவனம் செலுத்த வேண்டும் என்று ‘மனதின் குரல்’ நிகழ்ச்சியில் பிரதமா் நரேந்திர மோடி வலியுறுத்தினாா்.

மாதந்தோறும் கடைசி ஞாயிற்றுக்கிழமையில் பிரதமா் மோடி ‘மனதின் குரல்’ என்ற நிகழ்ச்சியில் வானொலி வாயிலாக உரையாற்றி வருகிறாா். நடப்பு மாதத்துக்கான நிகழ்ச்சியில் அவா் கூறியதாவது:

நாடு சுதந்திரமடைந்து 75 ஆண்டுகள் நிறைவடைந்ததையொட்டி பல்வேறு நிகழ்ச்சிகள் நடத்தப்பட்டன. அதில் மக்கள் பெருந்திரளாகக் கலந்துகொண்டனா். அந்நிகழ்ச்சிகளில் நாட்டின் பன்முகத்தன்மையும் வெளிப்பட்டது. நாட்டில் பல்வேறு வேறுபாடுகள் இருந்தாலும், தேசியக் கொடியை ஏற்றுவதில் அனைவரும் ஒருங்கிணைந்தனா். நாட்டின் பல்வேறு பகுதிகளில் மக்கள் ஆா்வத்துடன் தேசியக் கொடியைப் பறக்கவிட்டனா்.

‘மனதின் குரல்’ நிகழ்ச்சிக்காக பிரதமா் அலுவலகத்துக்கு அனுப்பப்பட்ட அனைத்துக் கடிதங்களிலும் தேசியக் கொடி, விடுதலைப் போராட்டம் என்ற சொற்கள் காணப்பட்டன. அச்சொற்கள் இல்லாத கடிதங்களே காணப்படவில்லை.

செப்டம்பா் மாதமானது ‘ஊட்டச்சத்துக்கான மாதமாக’ கடைப்பிடிக்கப்பட்டு வருகிறது. நாட்டில் ஊட்டச்சத்து குறைபாட்டை ஒழிப்பது மிகவும் அவசியம். அதற்கு சமூக வலைதளங்கள் வாயிலாக மக்களிடையே விழிப்புணா்வு ஏற்படுத்தப்பட வேண்டும். மக்களிடையே ஊட்டச்சத்து குறைபாட்டைப் போக்குவதற்காக அரசும் பல்வேறு நடவடிக்கைகளை மேற்கொண்டு வருகிறது.

ஊட்டச்சத்து குறைபாட்டைப் போக்குவதற்குப் பல மாநிலங்களும் புதுமையான வழிமுறைகளைக் கையாண்டு வருகின்றன. தகவல் தொழில்நுட்பத்தின் சிறப்பான பயன்பாடும், மக்களின் பங்கேற்பும் ‘போஷண் இந்தியா’ திட்டத்தின் முக்கியப் பகுதியாக மாறியுள்ளன. வீடுதோறும் குழாய் மூலமாகக் குடிநீா் விநியோகிக்கும் ‘ஜல் ஜீவன்’ திட்டமானது, ஊட்டச்சத்து குறைபாட்டைப் போக்குவதில் முக்கியப் பங்கு வகிக்கும்.

சிறுதானியங்களின் முக்கியத்துவம்: இந்தியாவின் கோரிக்கையை ஏற்று, 2023-ஆம் ஆண்டை ‘சா்வதேச சிறுதானியங்கள் ஆண்டு’ என ஐ.நா. அறிவித்துள்ளது. உடல்நலனைப் பாதுகாப்பதில் சிறுதானியங்கள் முக்கியப் பங்கு வகிக்கின்றன. இந்தியாவுக்கு சுற்றுப்பயணம் மேற்கொள்ளும் வெளிநாட்டுப் பயணிகளுக்கு சிறுதானியங்களில் செய்யப்பட்ட உணவுப் பொருள்களை வழங்க வேண்டும்.

பழங்காலத்தில் இருந்தே சிறுதானியங்களை இந்தியா்கள் பயன்படுத்தி வந்துள்ளனா். தற்போது அதுகுறித்து விழிப்புணா்வு ஏற்படுத்தப்படும்போது, சிறுதானியங்களின் நன்மை உலக மக்களுக்குச் சென்றடையும்.

கிராமங்களிலும் இணைய வசதி: நாட்டில் உள்ள தொலைதூரப் பகுதிகளுக்கும் இணைய சேவைகள் கிடைத்து வருகின்றன. அருணாசல பிரதேசத்தின் ஜோா்சிங் கிராமத்தில் சுதந்திர தினத்தில் இருந்து 4ஜி இணையசேவை தொடங்கப்பட்டுள்ளது. இதன்மூலமாக தொலைதூரப் பகுதிகளில் வசிக்கும் மக்களுக்கும் எண்ம (டிஜிட்டல்) தொழில்நுட்பத்தின் பலன்கள் கிடைத்து வருகின்றன.

முன்பெல்லாம் இணைய வசதியானது பெருநகரங்களில் மட்டுமே காணப்பட்டது. தற்போது ‘எண்ம இந்தியா’ திட்டத்தின் வாயிலாக நாட்டில் உள்ள பல்வேறு கிராமங்களும் இணைய வசதியைப் பெற்றுள்ளன. கிராமங்களில் உள்ள மக்களும் இணைய வசதியைப் பயன்படுத்தி தங்கள் தொழில் சூழலை மேம்படுத்தி வருகின்றனா். அதனால், கிராமங்களில் இருந்தும் தொழில்முனைவோா் உருவாகி வருகின்றனா்.

அறியப்படாத வீரா்கள்: நாட்டின் விடுதலைக்காகப் போராடிய, மக்களால் பெரிதும் அறியப்படாத வீரா்கள் குறித்து தூா்தா்ஷனில் (பொதிகை) நிகழ்ச்சி ஒளிபரப்பாகிறது. அதை மக்கள் தவறாமல் காண வேண்டும். நாட்டு விடுதலைக்கான வீரா்களின் தியாகம் குறித்து மக்கள் அறிந்துகொள்ள வேண்டும். அவா்களைப் பற்றி தெரிந்துகொள்வது இளைஞா்களுக்கும் ஊக்கத்தை அளிக்கும்.

சுதந்திர தினக் கொண்டாட்டம்: நாட்டின் சுதந்திர தினத்தை பலரும் பல்வேறு விதமாகக் கொண்டாடியுள்ளனா். மத்திய பிரதேசத்தின் இந்தூரில் இந்திய வரைபட வடிவில் மனிதச் சங்கிலியை ஏற்படுத்தி கொண்டாடியுள்ளனா். சண்டீகரில் நூற்றுக்கணக்கான மக்கள், தேசியக் கொடியை பிரதிபலிக்கும் வகையில் ஒன்றுதிரண்டு சுதந்திர தினத்தைக் கொண்டாடியுள்ளனா். இவை கின்னஸ் சாதனை புத்தகத்தில் இடம்பிடித்துள்ளன.

வெளிநாடுவாழ் இந்தியா்களும் சுதந்திர தினத்தை சிறப்பாகக் கொண்டாடினா். போட்ஸ்வானா நாட்டில் உள்ள உள்ளூா் பாடகா்கள் இந்திய சுதந்திரத்தின் 75-ஆவது சுதந்திர ஆண்டையொட்டி 75 நாட்டுப்பற்று மிக்க பாடல்களைப் பாடினா். அப்பாடல்கள் ஹிந்தி, தமிழ், தெலுங்கு, பஞ்சாபி, குஜராத்தி, வங்கம், கன்னடம், சம்ஸ்கிருதம் உள்ளிட்ட இந்திய மொழிகளில் பலவற்றிலும் பாடப்பட்டது மேலும் சிறப்புக்குரியது.

மக்கள் இயக்கம்: இந்திய சுதந்திரத்தின் 75-ஆவது ஆண்டைக் கொண்டாடும் வகையில் ஒவ்வொரு மாவட்டத்திலும் 75 நீா்நிலைகளை அமைப்பதற்கு அழைப்பு விடுக்கப்பட்டது. அது தற்போது மக்கள் இயக்கமாக மாறியுள்ளது. ஏரிகள், குளங்கள் உள்ளிட்ட நீா்நிலைகளை அமைப்பதற்குத் திரளான மக்கள் ஆதரவு தெரிவித்து வருகின்றனா்.

அந்த நீா்நிலைகள் மக்கள் தற்போது சந்தித்து வரும் பல்வேறு பிரச்னைகளுக்குத் தீா்வாக அமைவதோடு மட்டுமல்லாமல், வருங்கால சந்ததியினருக்கும் பெருமளவில் உதவும். இந்த இயக்கத்தின் கீழ் ஏற்கெனவே உள்ள நீா்நிலைகளும் புனரமைக்கப்பட்டு வருகின்றன. அந்த நீா்நிலைகள் வேளாண்மைக்கு மட்டுமல்லாமல் விலங்குகளுக்கும் பயன்பட்டு வருகின்றன. அதே வேளையில், நீரை சிக்கனமாகப் பயன்படுத்துவதிலும் மக்கள் கவனம் செலுத்த வேண்டும் என்றாா் பிரதமா் மோடி.