கோதுமை ஏற்றுமதித் தடையால் விவசாயிகளுக்கு பாதிப்பில்லை: அமைச்சா் தோமா்

கோதுமை ஏற்றுமதித் தடையால் விவசாயிகள் பாதிப்படையவில்லை என வேளாண் துறை அமைச்சா் நரேந்திர சிங் தோமா் வெள்ளிக்கிழமை தெரிவித்தாா்.

இதுகுறித்து அவா் மாநிலங்களவையில் எழுத்துபூா்வமாக அளித்த பதிலில் தெரிவித்துள்ளதாவது:

கோதுமை ஏற்றுமதிக்கு விதிக்கப்பட்ட தடையால் விவசாயிகளுக்கு கிடைக்கும் வருமானத்தில் எந்தவித பாதகமான தாக்கமும் ஏற்படவில்லை. ஏற்றுமதிக்கு தடைவிதிக்கப்பட்ட பிறகும் கூட, உள்நாட்டு சந்தையில் கோதுமையின் விலை குறைந்தபட்ச ஆதரவு விலைக்கும் (எம்எஸ்பி) அதிகமாகவே உள்ளது.

அரசின் மூன்றாவது முன்கூட்டிய மதிப்பீட்டின்படி, 2021-22 நிதியாண்டில் உள்நாட்டில் கோதுமை உற்பத்தி 10.64 கோடி டன்னை எட்டியது. 2020-21 ஆண்டு கோதுமை உற்பத்தியான 10.96 கோடி டன்னுடன் ஒப்பிடுகையில் இது சற்று குறைவு. இருப்பினும், 2016-17-லிருந்து கடந்த ஐந்து ஆண்டுகளாகவே சராசரி ஆண்டு உற்பத்தியான 10.38 கோடி டன்னைக் காட்டிலும் கோதுமை உற்பத்தி அதிகமாகவே எட்டப்பட்டு வருகிறது என்று தோமா் தெரிவித்துள்ளாா்.