உணவகங்கள் சேவைக் கட்டணம் வசூலிக்கக் கூடாது

வாடிக்கையாளா்களிடம் இருந்து சேவைக் கட்டணத்தை உணவகங்கள் வசூலிக்கக் கூடாது என்று மத்திய வா்த்தகத் துறை அமைச்சா் பியூஷ் கோயல் தெரிவித்துள்ளாா்.

உணவகங்கள் மற்றும் வாடிக்கையாளா்களின் கூட்டமைப்பைச் சோ்ந்த பிரதிநிதிகளுடனான சிறப்பு கூட்டத்துக்கு மத்திய வா்த்தகத் துறை அமைச்சகம் ஏற்பாடு செய்திருந்தது. அதில் அமைச்சா் பியூஷ் கோயல் கூறுகையில், ‘‘பல உணவகங்கள் வாடிக்கையாளா்களிடம் இருந்து சேவைக் கட்டணம் வசூலித்து வருவதாகப் புகாா்கள் எழுந்துள்ளன.

பணியாளா்களுக்கான ஊதியத்தை உயா்த்துவதற்காக சேவைக் கட்டணத்தை விதிப்பதாகக் கூறுகிறீா்கள். அந்தச் சுமையை வாடிக்கையாளா்கள் மீது உணவகங்கள் திணிக்கக் கூடாது. வாடிக்கையாளா்களிடம் இருந்து சேவைக் கட்டணம் வசூலிப்பதற்கு எந்தவித முகாந்திரமும் இல்லை. உணவகங்கள் சேவைக் கட்டணத்தை வசூலிக்க முடியாது.

பணியாளா்களுக்கு ஊதிய உயா்வு வழங்க வேண்டுமெனில், உணவுப் பொருள்களின் விலையை உயா்த்திக் கொள்ளலாம். அதைக் கட்டுப்படுத்துவதற்கு எந்தச் சட்டமும் இல்லை. உணவகத்தின் சேவை வாடிக்கையாளா்களுக்குப் பிடித்திருந்தால், அவா்கள் வெகுமதி (டிப்ஸ்) அளிக்கலாம். அதில் எந்தவிதத் தடையும் இல்லை. ஆனால், வாடிக்கையாளா்கள் உணவு உட்கொண்டதற்கான கட்டணத்தில் சேவைக் கட்டணத்தை இணைக்கக் கூடாது’’ என்றாா்.

கூட்டத்துக்குப் பிறகு வா்த்தகத் துறைச் செயலா் ரோகித் குமாா் செய்தியாளா்களிடம் கூறுகையில், ‘‘சேவைக் கட்டணம் விதிக்கும் நியாயமற்ற நடைமுறையால் வாடிக்கையாளா்களின் உரிமை பாதிக்கப்படுகிறது. சேவைக் கட்டணம் விதிக்கக் கூடாது என்ற விதிமுறை கடந்த 2017-ஆம் ஆண்டு முதல் உள்ளது. ஆனால், அதை உணவகங்கள் முறையாக அமல்படுத்தவில்லை. சேவைக் கட்டணம் விதிக்கும் உணவகங்கள் மீது சட்டப்படி நடவடிக்கை எடுப்பதற்கான வழிமுறைகள் விரைவில் உருவாக்கப்படும்’’ என்றாா்.

போலி ஆவணங்கள் மீது நடவடிக்கை:

கோதுமை ஏற்றுமதிக்கு மத்திய அரசு தடை விதித்துள்ள நிலையில், அமைச்சா் பியூஷ் கோயல் செய்தியாளா்களிடம் வெள்ளிக்கிழமை கூறுகையில், ‘‘பழைய ஆவணங்களைக் காட்டி சில ஏற்றுமதியாளா்கள் கோதுமை ஏற்றுமதிக்கு அனுமதி கோரி வருகின்றனா். அதுபோன்ற போலியான ஆவணங்களைச் சமா்ப்பிப்போா் மீது அரசு கடும் நடவடிக்கை எடுக்கும்.

கோதுமை ஏற்றுமதிக்கு ஏற்கெனவே அனுமதி பெற்றுள்ளோரின் ஆவணங்களையும் ஆராய அமைச்சகம் முடிவெடுத்துள்ளது. அண்டை நாடுகளின் கோரிக்கையை ஏற்று அவா்களுக்கு கோதுமை ஏற்றுமதி செய்வது தொடா்பாக ஆராய்வதற்கு உணவு, வேளாண்மை, வெளியுறவு ஆகிய அமைச்சகங்களைச் சோ்ந்த அதிகாரிகளைக் கொண்ட குழு அமைக்கப்பட்டுள்ளது’’ என்றாா்.