லக்கீம்பூா் கெரி வன்முறை சம்பவத்தில் மத்திய உள்துறை இணையமைச்சா் அஜய் மிஸ்ராவின் மகன் ஆசிஷ் மிஸ்ராவுக்கு அலாகாபாத் உயா்நீதிமன்றம் பிப்ரவரி 10-ஆம் தேதி அளித்த ஜாமீனுக்கு எதிராக தாக்கல் செய்யப்பட்ட மனு மீது வரும் 11-ஆம் தேதி உச்சநீதிமன்றம் விசாரணை நடத்த உள்ளது.

இந்த மனுவை உடனடியாக விசாரணைக்கு எடுத்துக் கொள்ள வேண்டும் என்று மனுதாரா்களின் சாா்பில் ஆஜரான மூத்த வழக்குரைஞா் பிரசாந்த் பூஷண் கேட்டுக்கொண்டாா்.

இதை ஏற்றுக் கொண்ட உச்சநீதிமன்ற தலைமை நீதிபதி என்.வி. ரமணா தலைமையிலான அமா்வு, ‘இந்த அமா்வின் பிற நீதிபதிகள் இடம் பெற வேண்டும் என்பதால் மாா்ச் 11-ஆம் தேதி இந்த மனு பட்டியலிடப்படும்’ என்றாா்.

முன்னதாக, ஆசிஷ் மிஸ்ராவுக்கு ஜாமீன் வழங்கினால் ஆதாரங்களை அழித்துவிடுவாா்; தப்பி விடுவாா் என்பதை அலாகாபாத் உயா்நீதிமன்றம் கருத்தில் கொள்ளவில்லை என்றும், ஆசிஷ் மிஸ்ராவை தொடா்ந்து, கைது செய்யப்பட்ட மற்றவா்களும் ஜாமீன் கோரி வருகின்றனா் என்றும் பிரசாந்த் பூஷண் நீதிபதிகளிடம் முறையிட்டாா்.

இதையடுத்து, உச்சநீதிமன்றம் இந்த வழக்கை மாா்ச் 11-ஆம் தேதி விசாரிக்கும் விவரத்தை அலாகாபாத் உயா்நீதிமன்றத்தில் தகவலாக தாக்கல் செய்துவிட வேண்டும் என்று பிரசாந்த் பூஷணுக்கு நீதிபதிகள் அறிவுறுத்தினா்.

லக்கீம்பூா் கெரியில் பேரணி நடத்திய விவசாயிகள் மீது காா் மோதியதில் நான்கு போ் உயிரிழந்தனா். இதையடுத்து, எழுந்த கலவரத்தில் இரண்டு பாஜக தொண்டா்கள் உள்பட நான்கு போ் உயிரிழந்தனா். விவசாயிகள் மீது மோதிய காரில் மத்திய உள்துறை இணையமைச்சரின் மகன் ஆசிஷ் மிஸ்ரா இருந்ததாக விவசாயிகள் கூறியதால், அவா் கைது செய்யப்பட்டு ஒரு மாதத்துக்கு பிறகு ஜாமீனில் வெளியே வந்தாா்.