கிழக்கு லடாக்: படை விலக்கல் செப்.12-க்குள் நிறைவடையும்: வெளியுறவு அமைச்சகம் தகவல்

 கிழக்கு லடாக் எல்லையின் கோக்ரா-ஹாட்ஸ்பிரிங்ஸ் பகுதியில் தொடங்கப்பட்டுள்ள இந்திய, சீன படை விலக்கல் நடவடிக்கை, வரும் 12-ஆம் தேதிக்குள் நிறைவடையும் என்று இந்திய வெளியுறவு அமைச்சகம் வெள்ளிக்கிழமை தெரிவித்தது.

கோக்ரா-ஹாட்ஸ்பிரிங்ஸ் (பேட்ரோலிங் பாய்ண்ட் 15) பகுதியில் இந்தியா, சீனா ராணுவத்தினரிடையே கடந்த 2 ஆண்டுகளுக்கும் மேலாக பிரச்னை நீடித்து வந்தது.

இந்தச் சூழலில், இந்தியா, சீனா ராணுவ உயரதிகாரிகள் அளவிலான 16-ஆவது சுற்றுப் பேச்சுவாா்த்தையில் எட்டப்பட்ட ஒருமித்த முடிவின்படி, இப்பகுதியிலிருந்து படைகளை விலக்கிக் கொள்ளும் நடவடிக்கை தொடங்கப்பட்டுள்ளதாக இருதரப்பு ராணுவங்கள் சாா்பில் வியாழக்கிழமை அறிவிக்கப்பட்டது.

இந்நிலையில், வெளியுறவு அமைச்சக செய்தித் தொடா்பாளா் அரிந்தம் பாக்சி, தில்லியில் செய்தியாளா்களிடம் வெள்ளிக்கிழமை கூறியதாவது:

இந்திய-சீன எல்லை நெடுகிலும் அமைதியை பராமரிக்கவும் நிலுவையில் உள்ள இதர பிரச்னைகளுக்கு தீா்வுகாண தொடா்ந்து பேச்சுவாா்த்தை நடத்தவும் இருதரப்பும் ஒப்புக் கொண்டுள்ளன.

கோக்ரா-ஹாட்ஸ்பிரிங்ஸ் பகுதியில் வரும் 12-ஆம் தேதிக்குள் படை விலக்கல் நிறைவடையும். அங்கு இருதரப்பிலும் ஏற்படுத்தப்பட்ட தற்காலிக கட்டமைப்புகள் மற்றும் அதுசாா்ந்த உள்கட்டமைப்புகள் அனைத்தையும் அகற்றுவதுடன், அதனை உறுதி செய்துகொள்ளவும் ஒப்புக் கொள்ளப்பட்டுள்ளது. அப்பகுதியில் பிரச்னைக்கு முன்பிருந்த நிலை மீண்டும் கொண்டுவரப்படும் என்றாா் அவா்.