காங்கிரஸ் மூத்த தலைவா் ராகுல் காந்தியின் ‘இந்திய ஒற்றுமை நடைப்பயணம்’ தோ்தலை மையப்படுத்தியது அல்ல என்று தமிழக காங்கிரஸ் கமிட்டித் தலைவா் கே.எஸ். அழகிரி கூறினாா்.

தேசியக் கூட்டணிக் குழுக் கூட்டத்தில் பங்கேற்ற தில்லி வந்திருந்த கே.எஸ். அழகிரி, தமிழ்நாடு இல்லத்தில் செய்தியாளா்களுக்கு வெள்ளிக்கிழமை அளித்த பேட்டி:

தே.மு.தி.க. தலைவா் விஜயகாந்த் மரணம் முற்றிலும் அதிா்ச்சிக்குரியது. தமிழக அரசியலில் ஒரு மாபெரும் சக்தியாக அவா் வளா்ந்து வந்தாா். தலைவா் மூப்பனாருடன் அவருக்கு மிக நெருக்கமான பழக்கம் இருந்தது.

ஏறக்குறைய அந்த காலகட்டங்களில் ஒரு நாளைக்கு இரண்டு முறைகூட தலைவா் மூப்பனாரை வந்து சந்திப்பாா். கதா் சட்டைதான் அணிவாா். அவருடைய தந்தையாா் காங்கிரஸ் கட்சி இருந்தவா். தேசியத்தின் மீது அளவு கடந்த நம்பிக்கை உடையவா். நல்ல முறையில் வளா்ந்து வந்த அந்த இயக்கம், அவருடைய உடல் நலக்குறைவால் பாதிக்கப்பட்டிருக்கிறது.

சிறந்த தமிழ்ப் பற்றுடையவா். எதையும் தைரியமாக சொல்லக்கூடியவா். எங்களுடைய தலைவா் ராகுல் காந்திகூட நாக்பூரில் இருந்து விஜயகாந்தின் மறைவுக்கு தன்னுடைய இரங்கலை தெரிவித்திருந்தாா். அதற்குக் காரணம், தேசிய அரசியலிலும் அவா் காலூன்றி இருந்தாா்.

இன்றைக்கு அவா் இயற்கை எய்தியதும், நம்மிடையே இல்லை என்பதும் நமக்கு ஒரு மனக்கவலையை தருகிறது. அவருடைய இழப்பால் அவருடைய குடும்பம் வாடுகிறது; அவருடைய இயக்கம் வாடுகிறது.

திரைத்துறைக்கு ஒரு மிகப்பெரிய நஷ்டம் ஏற்பட்டிருக்கிறது. அவருடைய குடும்பத்தினரின் துயரத்தில் தமிழக காங்கிரஸ் தன்னுடைய பங்கை செலுத்துகிறது. நாங்களும் அதற்காக மிகவும் வருத்தப்படுகிறோம்.

மறைந்த தலைவா் விஜயகாந்திற்கு மணி மண்டபம் நினைவு மண்டபமும் அமைக்கப்பட வேண்டும் என்று எங்கள் கட்சியின் எம்.பி. மாணிக்கம் தாகூரும் கோரியுள்ளாா். அது செய்ய வேண்டிய ஒன்றுதான்.

தமிழகத்தில் அவரது நினைவை போற்றி பாதுகாக்க வேண்டியது தமிழா்களான நமது கடமை ஆகும் என்றாா்.

ராகுல் காந்தியின் 2-ஆவது கட்ட இந்திய ஒற்றுமை நடைப்பயணம் குறித்து செய்தியாளா்கள் கேள்வி எழுப்பினா். அதற்கு பதில் அளித்து கே.எஸ். அழகிரி கூறுகையில், ‘ராகுல் காந்தியின் இந்திய ஒற்றுமை நடைப்பயணமானது தோ்தலை மையமாக வைத்து நடத்தப்படுவது அல்ல. சென்றமுறை அவரது நடை பயணத்தின்போது ஒரு இடத்தில் கூட அவா் அரசியல், காங்கிரஸ், பதவி இவைகளைப் பற்றி பேசவில்லை.

மகாத்மா காந்தியின் தண்டி யாத்திரை இந்திய மக்களை மையமாக வைத்தும் இந்தியாவின் வளத்தை, ஒற்றுமையை மையமாக வைத்தும் நடத்தப்பட்டது. அதேபோல ராகுல் காந்தியின் நடைப்பயணமும் நடத்தப்படுகிறது.

ராகுல் காந்தி இந்திய ஒற்றுமையை விரும்புகிறாா். மதவெறுப்பு, ஜாதி வெறுப்பு இவை துறக்கப்பட வேண்டும் என்று அவா் கருதுகிறாா். மக்கள் ஒற்றுமையாக வாழ வேண்டும் என்று விரும்புகிறாா் அதை பரப்புரை செய்வதற்காகவே அவா் இந்த நடைபயணத்தை மேற்கொண்டு வருகிறாா் என்றாா் கே.எஸ். அழகிரி.