மகளிருக்கான புதிய சேமிப்புத் திட்டத்தை நிதியமைச்சா் நிா்மலா சீதாராமன் பட்ஜெட்டில் அறிவித்துள்ளாா். இதன்படி மகளிா் பெயரில் தொடங்கப்படும் 2 ஆண்டு நிரந்தர வைப்புக்கு 7.5 சதவீதம் வட்டி வழங்கப்பட இருக்கிறது.

‘மகிளா சம்மான் சேமிப்பு பத்திரம்’ என பெயரிடப்பட்டுள்ள இத்திட்டத்தில் மகளிா் மற்றும் பெண் குழந்தைகள் பெயரில் நிரந்தர வைப்பு தொடங்க முடியும். அதிகபட்சமாக ரூ.2 லட்சம் வரை வைப்புத்தொகை இருக்கலாம். இதில் முதிா்வு காலம் 2 ஆண்டுகள் ஆகும். முதிா்வு காலத்துக்கு முன்பு பகுதியளவில் தொகையைத் திரும்பப் பெற்றுக் கொள்ளும் வசதியும் உள்ளது.

இதன்மூலம் குடும்பத் தலைவிகள் பெயரிலும், பெண் குழந்தைகள் பெயரிலும் பணத்தை சேமிப்புத் திட்டத்தில் வைப்பது அதிகரிக்கும் வாய்ப்பு ஏற்பட்டுள்ளது. 2025 மாா்ச் மாதம் வரை அதாவது 2 ஆண்டுகள் வரை இந்த சேமிப்புத் திட்டத்தில் பயனடைய முடியும்.

இது தவிர பெண்கள் மேம்பாட்டுக்கான திட்டங்கள் குறித்து பட்ஜெட் உரையில் பேசிய நிா்மலா சீதாராமன், ‘தீனதயாள் அந்தியோதயா யோஜனா’ தேசிய கிராமப்புற மக்கள் மேம்பாட்டுத் திட்டத்தில் 81 லட்சம் மகளிா் சுய உதவிக் குழுக்கள் உருவாக்கப்பட்டுள்ளன. இதன்மூலம் மகளிருக்கு சமுகத்தில் உரிய அங்கீகாரம் அளித்து அவா்களைப் பொருளாதாரரீதியாக வலுவாக்கும் நோக்கம் எட்டப்பட்டுள்ளது.

பிரதமா் கிஸான் சம்மான் நிதி திட்டத்தில் சிறு விவசாயிகளுக்கு வழங்கப்பட்ட ரூ.2.25 லட்சம் கோடி நிதியுதவியில் பயனடைந்தவா்களில் 3 கோடி போ் பெண் விவசாயிகள் ஆவா். அவா்களுக்கு மட்டும் ரூ.54,000 கோடி இத்திட்டத்தின்கீழ் வழங்கப்பட்டுள்ளது’ என்றாா்.