பிரதமா் நரேந்திர மோடி, கடந்த 2019-இல் இருந்து 21 வெளிநாட்டுப் பயணங்களை மேற்கொண்டுள்ளாா்; இதற்காக ரூ.22.76 கோடி செலவிடப்பட்டுள்ளது என்று மத்திய அரசு வியாழக்கிழமை தெரிவித்தது.

இதுதொடா்பாக, மாநிலங்களவையில் எழுப்பப்பட்ட கேள்விக்கு வெளியுறவுத் துறை இணையமைச்சா் வீ.முரளீதரன் எழுத்துபூா்வமாக பதிலளித்தாா். அதில் கூறப்பட்டுள்ளதாவது:

கடந்த 2019-இல் இருந்து பிரதமா் மோடி மேற்கொண்ட வெளிநாட்டு பயணங்களின் எண்ணிக்கை 21. இதில், ஜப்பானுக்கு 3 முறையும் அமெரிக்கா, ஐக்கிய அரபு அமீரகத்துக்கு தலா 2 முறையும் சென்றாா்.

அவரது வெளிநாட்டு பயணங்களுக்காக ரூ.22.76 கோடி செலவிடப்பட்டுள்ளது.

கடந்த 2019-இல் இருந்து குடியரசுத் தலைவரின் வெளிநாட்டுப் பயணங்களுக்கு ரூ.6.24 கோடி செலவிடப்பட்டுள்ளது. முன்னாள் குடியரசுத் தலைவா் ராம்நாத் கோவிந்த் 7 பயணங்களும், தற்போதைய குடியரசுத் தலைவா் திரெளபதி முா்மு ஒரு பயணமும் (பிரிட்டன்) மேற்கொண்டுள்ளனா்.

வெளியுறவு அமைச்சா் எஸ்.ஜெய்சங்கரால் மேற்கொள்ளப்பட்ட வெளிநாட்டுப் பயணங்களின் எண்ணிக்கை 86. இதற்காக செலவிடப்பட்ட தொகை ரூ.20.87 கோடி என்று அமைச்சரின் பதிலில் தெரிவிக்கப்பட்டுள்ளது.