மத்தியப் பிரதேச சட்டப்பேரவைத் தேர்தலில் பாஜக கோட்டையாக திகழும் தொகுதிகளில் பாஜகவுக்கு எதிராக பாஜக குடும்பத்தைச் சேர்ந்தவர்களையே காங்கிரஸ் களமிறக்கியுள்ளது. 

மத்தியப் பிரதேசத்தில் காங்கிரஸால் வெல்ல முடியாத இரண்டு தொகுதிகளில் பிரித்து ஆளும் கொள்கையை தந்திரமாகப் பயன்படுத்திய காங்கிரஸ், அத்தொகுதிகளில் பாஜக சார்பில் வென்றவர்களின் குடும்பத்தைச் சேர்ந்தவர்களையே வேட்பாளர்களாக முன்னிறுத்தியுள்ளது.

230 தொகுதிகளைக் கொண்ட மத்தியப் பிரதேச மாநிலத்திற்கு நவம்பர் 17ஆம் தேதி சட்டப்பேரவைத் தேர்தல் நடைபெறவுள்ளது. இதில் முதல்கட்டமாக 144 வேட்பாளர்களை காங்கிரஸ் அறிவித்தது. அதனைத் தொடர்ந்து 4 நாள்கள் கழித்து இரண்டாவது கட்டமாக 88 வேட்பாளர்கள் பட்டியலை வெளியிட்டுள்ளது. 

அதில், பாஜக முன்னாள் தலைவர்கள் 5 பேர் இடம்பெற்றுள்ளனர். அதில், பாஜக முன்னாள் எம்.எல்.ஏ.க்களான கிரிஜா சங்கர் ஷர்மா, பன்வர் சிங், ஷெகாவத் மற்றும் அபய் மிஸ்ரா ஆகியோரும் அடக்கம். 

காங்கிரஸ் கட்சியால் வெல்ல முடியாத விந்த்யா மற்றும் புந்தேல்கண்ட் ஆகிய தொகுதிகளில் பாஜக மாறி மாறி ஆட்சியமைத்துள்ளது. இந்தத் தொகுதிகளில் இம்முறை பாஜக குடும்பத்தைச் சேர்ந்தவர்களையே காங்கிரஸ் வேட்பாளர்களாக முன்னிறுத்தியுள்ளது. மேலும் புதிதாக பிரித்து உருவாக்கப்பட்ட மவுகஞ்ச் மாவட்டத்தின் தியோதலாப் தொகுதியிலும் பத்மேஷ் கெளதம் என்பவரை காங்கிரஸ் நிறுத்தியுள்ளது. இவர் மூன்று முறை எம்.எல்.ஏ.வான பாஜகவைச் சேர்ந்த கிரிஷ் கெளதமின் உறவினர். 

உள்ளாட்சித் தேர்தலில் பத்மேஷ் கெளதம் தனது உறவினரை எதிர்த்து போட்டியிட்டு வெற்றி பெற்றவர் என்பதால் காங்கிரஸ் அவரைத் தேர்வு செய்துள்ளது. 

புந்தேல்கண்ட் சாகர் மாவட்டத்தில் மூன்று முறை பாஜக மட்டுமே வெற்றி பெற்றுள்ளது. அங்கும் இதே சூழ்ச்சியை காங்கிரஸ் கையாண்டுள்ளது. அந்தத் தொகுதியில் மூன்று முறை எல்.எல்.ஏ.வான சைலேந்தர் ஜெயின். அவருக்கு எதிராக அவரின் மருமகளான நிதி ஜெயினை (தம்பி மனைவி) காங்கிரஸ் நிறுத்தியுள்ளது. 

கடந்த முறை நடைபெற்ற உள்ளாட்சித் தேர்தலில் நிதி ஜெயின் தோல்வி அடைந்திருந்தாலும், 58,000 வாக்குகளைப் பெற்றார். அதனால், காங்கிரஸ் கட்சி நிதி ஜெயினை முன்னிறுத்தியுள்ளது.