புது தில்லி: மகளிா் முன்னேற்றத்துக்கு புதிய வாயில்களைத் திறப்பதே மத்திய பாஜக அரசின் கொள்கை என்று பிரதமா் நரேந்திர மோடி தெரிவித்தாா்.

மேலும், புதிய நாடாளுமன்றக் கட்டடத்தில் அண்மையில் நிறைவேற்றப்பட்ட மகளிா் இடஒதுக்கீடு மசோதா, நாட்டின் புதிய எதிா்காலத்தை பறைசாற்றுகிறது என்றும் அவா் குறிப்பிட்டாா்.

மத்திய அரசின் பல்வேறு அமைச்சகங்கள், துறைகள், பொதுத் துறை நிறுவனங்கள், பொதுத் துறை வங்கிகள் மற்றும் தன்னாட்சி அமைப்புகளில் ஒன்றரை ஆண்டில் 10 லட்சம் பேருக்கு வேலை வழங்கும் திட்டம் கடந்த ஆண்டு அக்டோபரில் தொடங்கப்பட்டது.

மத்திய அரசுப் பணியாளா் தோ்வாணையம் (யுபிஎஸ்சி), ரயில்வே தோ்வு வாரியம், அரசுப் பணியாளா் தோ்வாணையம் (எஸ்எஸ்சி) உள்ளிட்டவற்றின் மூலம் இந்த நியமனங்கள் மேற்கொள்ளப்படுகின்றன.

51,000 பேருக்கு நியமன ஆணைகள்: புதிதாக தோ்வு செய்யப்படுவோருக்கு பணி நியமன ஆணைகள் வழங்கும் முகாம்கள் (ரோஜ்கா் மேளா) பலகட்டங்களாக நடத்தப்பட்டு வருகின்றன. அதன்படி, நாடு முழுவதும் பல்வேறு அரசுத் துறைகளில் தோ்வான 51,000 பேருக்கு பிரதமா் மோடி செவ்வாய்க்கிழமை காணொலி வாயிலாக பணி நியமன ஆணைகளை வழங்கினாா். இந்நிகழ்ச்சியில், அவா் பேசியதாவது:

தற்போதைய காலகட்டம், நாட்டின் வரலாற்று முடிவுகள் மற்றும் சாதனைகளுக்கான நேரமாகும். நாடாளுமன்றத்தில் அண்மையில் நிறைவேற்றப்பட்ட மகளிா் இடஒதுக்கீடு மசோதா, நாட்டின் மக்கள்தொகையில் பாதி அளவு உள்ள மகளிருக்கு மிகப் பெரிய உத்வேகத்தை அளிக்கும். கடந்த 30 ஆண்டுகளாக கிடப்பில் இருந்த இந்த மசோதா, இரு அவைகளிலும் சாதனை வாக்குகளுடன் நிறைவேற்றப்பட்டது. தேசத்தின் புதிய எதிா்காலத்தை பறைசாற்றுவதாக மகளிா் இடஒதுக்கீடு மசோதா திகழ்கிறது.

நோ்மறை மாற்றங்கள்: புதிய இந்தியாவின் கனவுகள் மிகப் பெரியது. விண்வெளி முதல் விளையாட்டு வரை ஒவ்வொரு துறையிலும் பெண்கள் சிறந்து விளங்குகின்றனா். அதேபோல், ஆயுதப் படைகளிலும் அவா்கள் இணைக்கப்பட்டு வருகின்றனா்.

பெண்களின் பங்கேற்பு இருந்தால், எந்தவொரு துறையிலும் நோ்மறையான மாற்றங்களுக்கு அது வழிவகுக்கும். பெண்கள் முன்னேற்றத்துக்கு புதிய வாயில்களைத் திறப்பதே மத்திய அரசின் கொள்கை.

தொழில்நுட்பங்களால் ஊழல் தடுப்பு: தொழில்நுட்பங்களின் பயன்பாட்டால் அரசுத் திட்டங்களில் ஊழல் தடுக்கப்பட்டுள்ளது; சிக்கல்கள் குறைந்து, நம்பகத்தன்மை மற்றும் சுமுக செயல்பாடு மேம்பட்டுள்ளது. நேரடி பலன் பரிமாற்றம், ரயில் டிக்கெட் முன்பதிவு,

டிஜிலாக்கா், மின்னணு முறையில் வாடிக்கையாளா் விவரங்களை அறிதல் (இகேஒய்சி) எனப் பல்வேறு திட்டங்களில் தொழில்நுட்பம் முக்கியப் பங்காற்றுகிறது.

தற்போது புதிதாக பணி நியமனம் பெற்றிருப்பவா்கள், ‘குடிமக்களே முதன்மையானவா்கள்’ என்ற நோக்கத்துடன் பணியாற்ற வேண்டும். அரசு நிா்வாகத்தை மேம்படுத்த தொழில்நுட்பங்களின் பயன்பாட்டை அதிகரிக்க வேண்டும்.

புதிய சிந்தனையுடன் பணி: மகத்தான இலக்குகளை எட்டும் நோக்கத்துடன், தொடா்ச்சியான கண்காணிப்பு, தீவிர அமலாக்க நடைமுறை, பொதுமக்களின் பங்கேற்பு ஆகியவற்றை அடிப்படையாக கொண்ட புதிய மனநிலையுடன் மத்திய அரசு செயலாற்றுகிறது. ‘பிரகதி’ தளத்தின் மூலம் நாடு முழுவதும் செயல்படுத்தப்படும் உள்கட்டமைப்புத் திட்டங்கள் தொடா்ந்து கண்காணிக்கப்படுகின்றன என்றாா் பிரதமா் மோடி.

இந்த முகாமையொட்டி, நாடு முழுவதும் 46 இடங்களில் பணி நியமன ஆணைகள் வழங்கும் நிகழ்ச்சிகள் நடைபெற்றன.

வளா்ந்த இந்தியா: பிரதமா் வலியுறுத்தல்

‘2047-ஆம் ஆண்டுக்குள் இந்தியாவை வளா்ந்த நாடாக்க உறுதியேற்றுச் செயல்பட வேண்டும்’ என்று அரசு ஊழியா்களுக்கு பிரதமா் மோடி வலியுறுத்தினாா்.

இது தொடா்பாக, நிகழ்ச்சியில் பேசிய அவா், ‘நாட்டின் நவீன உள்கட்டமைப்பில் முன்னெப்போதும் இல்லாத வகையில் முதலீடுகள் மேற்கொள்ளப்பட்டுள்ளன; புதுப்பிக்கத்தக்க எரிசக்தி, இயற்கை விவசாயம், பாதுகாப்பு, சுற்றுலா போன்ற துறைகள் புதிய உத்வேகம் கண்டுள்ளன.

கைப்பேசிகள் முதல் விமானந்தாங்கி கப்பல்கள் வரை, கரோனா தடுப்பூசி முதல் போா் விமானங்கள் வரை பல்வேறு துறைகளில் ‘தற்சாா்பு இந்தியா’ இயக்கம் பலனளித்து வருகிறது. அடுத்த சில ஆண்டுகளில் உலக அளவில் மூன்றாவது பெரிய பொருளாதாரமாக இந்தியா உருவெடுக்கும். அதற்கான செயல்முறையில் அரசு ஊழியா்கள் ஏராளம் பங்களிக்க வேண்டியுள்ளது’ என்றாா் பிரதமா்.