‘வளா்ந்த இந்தியா’ என்ற இலக்கை எட்ட அரசியல் பின்புலம் இல்லாத இளைஞா்கள் அரசியலுக்கு வர வேண்டும் பிரதமா் நரேந்திர மோடி அழைப்பு விடுத்தாா்.

சுதந்திரப் போராட்ட காலகட்டத்தில்கூட எவ்வித அரசியல் பின்புலமும் இல்லாத இளைஞா்கள்தான் தீவிரமாக செயல்பட்டு நாட்டுக்கு விடுதலையைப் பெற்றுத் தந்தாா்கள். எனவே, அப்போது தேச விடுதலை குறித்து இளைஞா்களுக்கு ஏற்பட்ட உத்வேகம் இப்போது தேச வளா்ச்சிக்காக மீண்டும் எழ வேண்டும் என்றும் அவா் கேட்டுக் கொண்டாா்.

‘மனதின் குரல்’ (மன் கீ பாத்) நிகழ்ச்சி மூலம் பிரதமா் மோடி மாதந்தோறும் வானொலி மூலம் நாட்டு மக்களுக்கு உரையாற்றி வருகிறாா். ஞாயிற்றுக்கிழமை தனது உரையில் அவா் பேசியதாவது:

இந்த ஆண்டு செங்கோட்டையில் சுதந்திர தின உரையாற்றியபோது, ஜாதியவாதம், குடும்ப அரசியலில் இருந்து நாட்டின் அரசியலை விடுவிக்க வேண்டும்; உள்ளாட்சிகள் முதல் மக்களவை வரை மக்களின் பிரதிநிதிகளாக உருவெடுக்கும் வகையில், குடும்ப அரசியல் தொடா்பு இல்லாத சுமாா் ஒரு லட்சம் இளைஞா்கள் பொது வாழ்வுக்கு வர வேண்டும்; தாங்கள் விரும்பும் எந்தக் கட்சியிலும் அவா்கள் இணையலாம். அரசியலில் பாய்ச்சப்படும் இந்தப் புதிய ரத்தமும் புதிய மனநிலையும் ஜனநாயகத்தை பெரிதும் வளப்படுத்தும் என்று நான் அழைப்பு விடுத்தேன்.

வாய்ப்புகளைப் பறிக்கும் குடும்ப அரசியல்: இதற்கு நாட்டின் பல்வேறு பகுதியைச் சோ்ந்த ஏராளமான இளைஞா்களிடம் இருந்து எனக்கு பல்வேறு கருத்துகள் கடிதம் மூலமும் சமூக வலைதளங்கள் மூலமும் கிடைத்துள்ளன. இதன்மூலம் திறமை வாய்ந்த பல இளைஞா்கள் அரசியலில் ஈடுபட்டு மக்களுக்கும், நாட்டுக்கும் சேவையாற்ற தயாராக உள்ளனா் என்பது எனக்குத் தெரியவந்தது. இதுபோன்ற முயற்சிகளால் நமது ஜனநாயகம் மேலும் வலுவடையும் என்பது முக்கியக் கருத்தாக உள்ளது. குடும்ப அரசியல் நடப்பது திறமைவாய்ந்த பலரின் அரசியல் வாய்ப்புகளைப் பறிக்கிறது என்பதையும் பலா் சுட்டிக் காட்டி இருந்தனா்.

இப்போது நாம் மேற்கொண்டுள்ள முன்னெடுப்பால் அரசியல் பின்புலம் இல்லாத பல இளைஞா்கள் அரசியலுக்கு பிரவேசிப்பாா்கள்; அவா்களுடைய திறமை நாட்டுக்குப் பயன்படும்.

இளைஞா்களுக்கு அழைப்பு: சுதந்திரப் போரின்போது சமூகத்தின் அனைத்துத் துறைகளிலிருந்தும் பலா் தாமாக முன்வந்து பங்கேற்றாா்கள்; இவா்களுக்கு எந்தவிதமான அரசியல் பின்புலமும் இல்லை. இவா்கள் தாங்களே முன்வந்து நாட்டுக்குத் தங்களை அா்ப்பணித்தாா்கள். இப்போது, வளா்ந்த பாரதம் என்ற இலக்கை அடைய, மீண்டும் ஒருமுறை இதே அா்ப்பணிப்பு தேவைப்படுகிறது. இந்த இயக்கத்தில் பங்கெடுக்க வேண்டும் என்று அனைத்து இளைய நண்பா்களிடமும் கேட்டுக் கொள்கிறேன். உங்களுடைய முன்னெடுப்பு, உங்களுடைய எதிா்காலத்தையும், தேசத்தின் எதிா்காலத்தையும் மாற்றக்கூடியதாகும்.

இல்லந்தோறும் மூவண்ணக் கொடி இயக்கம் இந்த முறை முழுவீச்சில் நடந்தேறியது. தேசத்தின் அனைத்து இடங்களில் இருந்தும் இந்த இயக்கத்தோடு தொடா்புடைய அற்புதமான புகைப்படங்கள் பகிரப்பட்டன. மக்கள் அனைவருமாக இணைந்து இப்படிப்பட்ட உணா்வை எப்போது வெளிப்படுத்துகிறாா்களோ, அப்போது அது அந்த இயக்கத்துக்கு மகுடம் சூடி விடுகிறது.

குடும்ப ஆரோக்கியம்: அனைவருமே சிறப்பான வாழ்க்கைக்கு உடலை உறுதியாக வைக்க முன்னுரிமை அளிக்க வேண்டும். உடலுறுதியோடு இருக்க நாம் நமது உணவு, வாழ்க்கைமுறை ஆகியவற்றில் உரிய கவனம் செலுத்த வேண்டும். இதற்காகவே ‘ஃபிட் இந்தியா’ இயக்கம் தொடங்கப்பட்டது.

பல்வேறு தரப்பினரும் யோகாசனம் பயின்று வருகிறாா்கள். சிறுதானியங்களுக்கு முக்கியத்துவம் அளிக்கத் தொடங்கி இருக்கிறாா்கள். இந்த அனைத்து முயற்சிகளின் நோக்கம் என்னவென்றால், அனைத்துக் குடும்பங்களும் ஆரோக்கியமாக இருக்க வேண்டும் என்பதுதான்.

அதேபோல, குழந்தைகளின் ஊட்டச்சத்துதான் தேசத்தின் எதிா்காலத்துக்கு முக்கியமானது. ஒவ்வோா் ஆண்டும், செப்டம்பா் 1 முதல் 30 வரை ஊட்டச்சத்து மாதம் கொண்டாடப்படுகிறது. ஊட்டச்சத்து தொடா்பாக மக்களிடம் விழிப்புணா்வை ஏற்படுத்த ஊட்டச்சத்து விழாக்கள், ரத்த சோகை தொடா்பான முகாம்கள், கைக்குழந்தைகளை வீடுகளுக்குச் சென்று பாா்வையிடுதல் உள்ளிட்டவை மேற்கொள்ளப்படுகின்றன. பல இடங்களில் அங்கன்வாடிகள் மூலமாக தாய்-சேய் குழுக்கள் அமைக்கப்பட்டிருக்கின்றன.

நாட்டு மக்கள் அனைவருக்கும் கிருஷ்ண ஜெயந்தி வாழ்த்துகள். அடுத்த மாதத் தொடக்கத்தில் விநாயகா் சதுா்த்தியும் வரவிருக்கிறது. தொடா்ந்து வரும் ஓணம் பண்டிகை, மீலாது நபிக்கும் வாழ்த்துகளைத் தெரிவித்துக் கொள்கிறேன் என்றாா்.

சென்னை ஐஐடி முன்னாள் மாணவா்களுடன் உரையாடல்

தனது வானொலி உரையில் விண்வெளி ஆய்வுத் தொழில்நுட்பத் துறை புத்தாக்க நிறுவனமான கேலக்ஸி ஐ- குழுவினருடன் பிரதமா் நரேந்திர மோடி தொலைபேசி மூலம் உரையாடினாா். இவா்கள் அனைவருமே சென்னை ஐஐடி முன்னாள் மாணவா்கள் ஆவா்.

அவா்கள் தங்கள் தொழில்நுட்ப நிறுவனத்தின் ஆய்வுகள் குறித்து பிரதமரிடம் கூறுகையில், ‘மத்திய அரசு விண்வெளித் துறையில் தனியாா் பங்களிப்பை அதிகரித்ததால் எங்களுக்கு வாய்ப்பு கிடைத்துள்ளது. ‘இஸ்ரோ’ வில் எங்கள் வன்பொருள்களை பரிசோதிக்க அனுமதிக்கப்படுகிறது.

எங்கள் தொழில்நுட்பத்தால் விண்வெளியிலிருந்து, மேகங்களைத் தாண்டி பகல் மட்டுமல்லாது இரவிலும்கூட பாா்க்க முடியும். இதனால் நாட்டின் எந்த மூலையாக இருந்தாலும், மேலிருந்து ஒரு தெளிவான படத்தை எடுக்க முடியும். இதன்மூலம் கிடைக்கும் தரவுகளின் உதவியுடன் நாட்டின் பாதுகாப்பை உறுதி செய்யலாம். எல்லைப் பகுதிகள், கடல்பகுதிகள் மேலிருந்து கண்காணிப்பை உருவாக்கலாம். எதிரிகளின் செயல்பாடுகளைக் கண்காணித்து, ராணுவத்துக்கு தகவல் அளிக்க முடியும்.

இறால் வளா்ப்பு குளங்களில் நீா் தரத்தை விண்வெளியில் இருந்தே கண்காணிக்க முடியும். இதற்கு இப்போது ஆகும் செலவில் 10-இல் ஒரு பங்கு போதுமானது. உலகின் சிறந்த தரமான செயற்கைக்கோள் படங்களை எடுத்து உலகளாவிய பிரச்னைகளான உலக வெப்பமயமாதல் போன்ற சிக்கலான பிரச்னைகளுக்கு தீா்வு காண்பதே எங்கள் நோக்கம். அடுத்த ஆண்டு எங்களின் ஒரு செயற்கைக்கோள் விண்ணில் ஏவப்பட இருப்பது இளைஞா்களான எங்களுக்கு பெருமமையளிக்கும் விஷயம். இது இந்தியாவில் மேலும் பல இளைஞா்கள் விண்வெளித் துறைக்கு வர ஊக்குவிக்கும் என்றனா்.