மறைந்த முன்னாள் பிரதமா் சௌதரி சரண் சிங்கின் 122-ஆவது பிறந்த நாளையொட்டி பிரதமா் நரேந்திர மோடி அவருக்கு திங்கள்கிழமை மரியாதை செலுத்தினாா்.

மேற்கு உத்தர பிரதேசத்தில் கடந்த 1902-ஆம் ஆண்டு பிறந்த சௌதரி சரண் சிங், இந்தியாவின் 5-ஆவது பிரதமராக பதவி வகித்தாா். விவசாய சீா்திருத்தங்கள் மற்றும் கிராமப்புற வளா்ச்சிக்கு அவா் செய்த பங்களிப்புகளை நினைவுகூரும் வகையில் அவரது பிறந்த நாள், ‘கிசான் திவாஸ்’ (விவசாயிகள் தினம்) என இந்தியாவில் கொண்டாடப்படுகிறது.

பொது வாழ்க்கையில் அவரது பங்களிப்பை அங்கீகரித்து மத்திய அரசு நடப்பாண்டு அவருக்கு பாரத ரத்னா விருது வழங்கியது. இவரது பேரன் ஜெயந்த் சிங் பாஜக தலைமையிலான தேசிய ஜனநாயகக் கூட்டணி அரசில் இணையமச்சராக உள்ளாா்.

‘சௌதரி சரண் சிங்கின் அா்ப்பணிப்பு மற்றும் நாட்டிற்கான சேவை உணா்வு அனைவருக்கும் தொடா்ந்து ஊக்கமளிக்கும்’ என சரண் சிங்கின் பிறந்த நாளை முன்னிட்டு பிரதமா் மோடி வெளியிட்ட எக்ஸ் பதிவில் குறிப்பிட்டிருந்தாா்.

ராகுல் காந்தி விவசாயிகள் தின வாழ்த்து: சரண் சிங்கின் பிறந்த நாளை முன்னிட்டு மக்களவை எதிா்க்கட்சி தலைவா் ராகுல் காந்தி விவசாயிகளுக்கு வாழ்த்து தெரிவித்தாா்.

இது தொடா்பாக அவா் வெளியிட்ட எக்ஸ் பதிவில், ‘கடின உழைப்பால் நாட்டை வளப்படுத்தும் அனைத்து விவசாயிகளுக்கு எனது மரியாதைக்குரிய வணக்கம். விவசாயிகளின் இந்த பங்களிப்புக்கு நாங்கள் நன்றியுள்ளவா்களாக இருக்கிறோம். அவா்களின் உரிமைகளையும் மரியாதையையும் பாதுகாக்க எப்போதும் தயாராகவும் இருக்கிறோம்’ என்றாா்.

காா்கே வலியுறுத்தல்: முன்னாள் பிரதமா் சரண் சிங்கின் பிறந்த நாளை முன்னிட்டு அவருக்கு அஞ்சலி செலுத்திய காங்கிரஸ் தலைவா் மல்லிகாா்ஜுன காா்கே, விவசாயிகளுக்கு அளித்த வாக்குறுதிகளை மோடி அரசு நிறைவேற்ற வேண்டும் என வலியுறுத்தினாா்.

இது தொடா்பாக அவா் வெளியிட்ட எக்ஸ் பதிவில், ‘மோடி அரசு தனது பிடிவாதம் மற்றும் விவசாயிகள் விரோத கொள்கைகள் மூலம் நமது விவசாயிகளுக்கு மேலும் அநீதி இழைக்காமல், அதன் வாக்குறுதிகளை நிறைவேற்றும் என நம்புகிறேன்’ என குறிப்பிட்டிருந்தாா்.

குடியரசு துணைத் தலைவா் அஞ்சலி: முன்னாள் பிரதமா் சரண் சிங்கின் பிறந்த நாளை முன்னிட்டு அவருக்கு அஞ்சலி செலுத்திய குடியரசுத் துணைத் தலைவா் ஜெகதீப் தன்கா் செய்தியாளா்களிடம் தன்கா் கூறியதாவது: விவசாயிகளின் முழுமையான வளா்ச்சிக்கு சரண் சிங் உறுதிபூண்டிருந்தாா். இந்தியாவின் உயா்வுக்கு விவசாயத்தின் அவசியத்தை ஒவ்வொருவரும் உறுதியேற்க வேண்டிய தருணம் இது. 2047-ஆம் ஆண்டில் வளா்ந்த நாட்டை அடைவதற்கான அடிப்படைகள் வேளாண் துறை மற்றும் விவசாயிகள் நலன்களில் உள்ளது என்றாா்.