மாநிலங்களவையில் பிரதமா் மோடி மற்றும் ஆா்எஸ்எஸ் அமைப்பை விமா்சித்து, எதிா்க்கட்சித் தலைவா் மல்லிகாா்ஜுன காா்கே தெரிவித்த சில கருத்துகள் அவைக் குறிப்பில் இருந்து நீக்கப்பட்டன.

மாநிலங்களவையில் குடியரசுத் தலைவா் உரைக்கு நன்றி தெரிவிக்கும் தீா்மானம் மீதான விவாதம் திங்கள்கிழமை நடைபெற்றது. இதில், மாநிலங்களவை எதிா்க்கட்சித் தலைவா் மல்லிகாா்ஜுன காா்கே சுமாா் 90 நிமிஷங்கள் பேசினாா். அவா் கூறியதாவது:

மக்களவைத் தோ்தல் பிரசாரத்தின்போது, ‘தனது 10 ஆண்டுகால ஆட்சி, வெறும் முன்னோட்டம்தான்; அடுத்த ஆட்சிதான் உண்மையான படம்’ என்று பிரதமா் மோடி பலமுறை குறிப்பிட்டாா்.

ஆனால், பிரதமா் மோடியின் மூன்றாவது ஆட்சி எப்படி இருக்கும் என்பதை கடந்த ஒருமாத கால நிகழ்வுகளின் மூலம் ஊகிக்க முடிகிறது.

கடந்த ஒருமாதத்தில் வினாத்தாள் கசிவுகள், போட்டித் தோ்வுகள் ரத்து, ஜம்மு-காஷ்மீரில் பயங்கரவாத தாக்குதல்கள், மேற்கு வங்க ரயில் விபத்து, மூன்று விமான நிலையங்களில் கட்டட விபத்து, பாலங்கள் இடிந்து விபத்து, சுங்க வரி உயா்வு, அயோத்தி ராமா் கோயிலில் மழைநீா் கசிவு, ரூபாய் மதிப்பு வீழ்ச்சி போன்றவை நிகழ்ந்துள்ளன என்றாா் காா்கே.

மேலும், மக்களவைத் தோ்தல் பிரசாரத்தில் சிறுபான்மையினா் மற்றும் பாகிஸ்தானைக் குறிப்பிட்டு, பிரதமா் எத்தனை முறை பேசினாா் என்ற புள்ளிவிவரங்களையும் காா்கே எடுத்துரைத்தாா். ஊடக செய்திகள் அடிப்படையிலான அந்த புள்ளிவிவரங்களை ஏற்காத அவைத் தலைவா் ஜகதீப் தன்கா், அவற்றை அவைக்குறிப்பில் இருந்து நீக்கினாா்.

இதேபோல், ஆா்எஸ்எஸ் அமைப்பு குறித்து காா்கே தெரிவித்த கருத்துகளும் அவைக்குறிப்பில் இருந்து நீக்கப்பட்டன.

‘தேசத்துக்காக இடையறாது பணியாற்றும் ஆா்எஸ்எஸ் அமைப்பு மீது குற்றச்சாட்டுகளை சுமத்துவது நியாயமல்ல. அந்த அமைப்பில் உறுப்பினராக இருப்பது ஒரு குற்றமா?’ என்று காா்கேவிடம் தன்கா் கேள்வியெழுப்பினாா்.