உக்ரைனுக்கு எதிரான போரில் ரஷிய ராணுவத்தில் பணியாற்றி வந்த ஹரியாணாவைச் சோ்ந்த 22 வயது இளைஞரான ரவி மௌன் உயிரிழந்தாா்.

ஹரியாணா மாநிலம், கைதால் மாவட்டத்தில் உள்ள மாதௌா் கிராமத்தைச் சோ்ந்தவரான ரவி மௌன், வேலைக்காக கடந்த ஜனவரியில் ரஷியா சென்றுள்ளாா். போக்குவரத்துப் பணியில் சேருவதற்காக அழைத்துச் செல்லப்பட்ட இவா், ராணுவப் பணிகளில் ஈடுபடுத்தப்பட்டிருக்கிறாா்.

ரவி மௌனின் தகவல் கிடைக்காததால் மாஸ்கோவில் உள்ள இந்திய தூதரகத்தை அவரது குடும்பத்தினா் கடந்த 21-ஆம் தேதி அணுகியுள்ளனா்.

ரவி மௌன் உயிரிழந்துவிட்டதாகவும் அவரது உடலைக் கண்டறிந்து உறுதிப்படுத்த நெருங்கிய உறவினரின் ‘டிஎன்ஏ’ அறிக்கையை அனுப்புமாறும் கோரியுள்ளதாக தூதரகம் பதிலளித்துள்ளது.

ரவி மௌனின் சகோதரா் அஜய் மௌன் கூறுகையில், ‘உக்ரைன் படைகளுக்கு எதிராகப் போரிடுமாறு ரஷிய ராணுவம் எனது சகோதரரைக் கட்டாயப்படுத்தியது. இல்லையெனில், 10 ஆண்டுகள் சிறைத்தண்டனை அனுபவிக்க வேண்டும் எனவும் அவா் மிரட்டப்பட்டாா்.

முதலில், போா் பகுதிகளில் வீரா்கள் பதுங்கும் சுரங்கங்கள் தோண்டும் பணியை அவா் செய்து வந்தாா். பின்னா், நேரடி போா் நடவடிக்கைகளில் அவா் ஈடுபடுத்தப்பட்டாா். கடந்த மாா்ச் மாதம் நாங்கள் அவருடன் தொடா்பில் இருந்த வரையிலும், பெரும் மன உளைச்சலில் அவா் இருந்தாா்.

ஒரு ஏக்கா் நிலத்தை விற்று, அதில் கிடைத்த ரூ.11.50 லட்சத்தைக் கொண்டுதான் எனது சகோதரரை ரஷியாவுக்கு அனுப்பி வைத்தோம். இப்போது அவரது உடலை இந்தியா கொண்டு வர போதுமான பணம் எங்களிடம் இல்லை. எனவே, இவ்விவகாரத்தில் பிரதமா் நரேந்திர மோடி எங்களுக்கு உதவ வேண்டும்’ என்றாா்.

கடந்த 2 ஆண்டுகளாக நீடித்து வரும் ரஷியா-உக்ரைன் போரில் ரஷிய ராணுவத்தின் துணைப் பணிகளில் ஏராளமான இந்தியா்கள் வலுகட்டாயமாக ஈடுபடுத்தப்பட்டிருப்பதாக செய்திகள் பரவின. இந்த மாத தொடக்கத்தில், ரஷிய பயணம் மேற்கொண்ட பிரதமா் மோடி, அதிபா் புதினிடம் இப்பிரச்னையை எழுப்பினாா்.

இதையடுத்து, ரஷிய ராணுவத்தில் பணிபுரியும் இந்தியா்களை விரைவில் வெளியேற்றுவதாக உறுதியளிக்கப்பட்டது.