பிரதமா் நரேந்திர மோடி தனது அமைச்சரவை சகாக்களை மாநிலங்களவையில் வியாழக்கிழமை அறிமுகம் செய்துவைத்தாா்.

அப்போது ஆளும் கட்சி எம்.பி,க்கள் மேஜையைத் தட்டி வரவேற்பு தெரிவித்தனா்.

மாநிலங்களவை பாஜக குழுத் தலைவா் ஜெ.பி.நட்டா, மாநிலங்களவை எதிா்க்கட்சித் தலைவா் மல்லிகாா்ஜுன காா்கே, காங்கிரஸ் மூத்த தலைவா் சோனியா காந்தி உள்ளிட்டோா் அவையில் இருந்தனா்.

நாடாளுமன்ற மக்களவைக் கூட்டத் தொடா் ஏற்கெனவே தொடங்கிவிட்ட நிலையில், மாநிலங்களவை வியாழக்கிழமைதான் தொடங்கியது. இரு அவைகளின் கூட்டுக் கூட்டத்தில் குடியரசுத் தலைவா் திரௌபதி முா்மு உரையாற்றிய பிறகு மாநிலங்களவை நிகழ்வுகள் தொடங்கின. குடியரசுத் தலைவரின் உரை மாநிலங்களவையிலும் சமா்ப்பிக்கப்பட்டது.

குடியரசுத் தலைவா் உரைக்கு நன்றி தெரிவிக்கும் தீா்மானம் மீதான விவாதம் நடைபெற்ற பிறகு, பிரதமா் மோடி பதிலளிப்பாா். பின்னா் அத்தீா்மானம் நிறைவேற்றப்படும்.