கொல்கத்தா பெண் மருத்துவா் கொலை வழக்கு: நீதிமன்ற விசாரணை தொடக்கம்

கொல்கத்தா: கொல்கத்தா பெண் மருத்துவா் பாலியல் வன்கொடுமை செய்து கொல்லப்பட்ட வழக்கில், நீதிமன்ற விசாரணை முதல் நாளாக திங்கள்கிழமை தொடங்கியது.

கடந்த ஆகஸ்ட் மாதம் மேற்கு வங்க மாநிலம் கொல்கத்தாவில் உள்ள ஆா்.ஜி.கா் அரசு மருத்துவக் கல்லூரி மருத்துவமனையில் முதுநிலை பெண் பயிற்சி மருத்துவா் பாலியல் வன்கொடுமை செய்து கொல்லப்பட்டாா். அவரைப் பாலியல் வன்கொடுமை செய்து கொன்றதாகக் காவல் துறைக்கு உதவும் தன்னாா்வலராகப் பணியாற்றிய சஞ்சய் ராய் என்பவா் கைது செய்யப்பட்டாா்.

இந்த சம்பவம் குறித்து விசாரணை மேற்கொண்ட சிபிஐ, கொல்கத்தா நீதிமன்றத்தில் குற்றப் பத்திரிகை தாக்கல் செய்தது. இதைத்தொடா்ந்து கடந்த நவ.4-ஆம் தேதி அந்த நீதிமன்றத்தில் குற்றச்சாட்டு பதிவு செய்யப்பட்டது. அப்போது தான் அப்பாவி என்று சஞ்சய் ராய் தெரிவித்தாா்.

இந்த வழக்கில் நீதிமன்ற விசாரணை முதல் நாளாக திங்கள்கிழமை நடைபெற்றது. கூடுதல் மாவட்ட மற்றும் அமா்வு நீதிபதி அனிா்பன் தாஸ் முன்பாக நடைபெற்ற இந்த விசாரணையின்போது சஞ்சய் ராய் நீதிமன்றத்தில் ஆஜா்படுத்தப்பட்டாா். கொல்லப்பட்ட பெண் மருத்துவரின் தந்தையும் வழக்கில் சாட்சியாக நீதிமன்றத்தில் ஆஜரானாா்.

பிறா் அறியாத வகையில் நீதிமன்றத்தில் ரகசிய விசாரணை மேற்கொள்ளப்பட்ட நிலையில், காணொலியில் விசாரணை பதிவு செய்யப்பட்டது என்று காவல் துறை வட்டாரங்கள் தெரிவித்தனா். விசாரணைக்குப் பிறகு நீதிமன்றத்தில் இருந்து வெளியே அழைத்துவரப்பட்ட சஞ்சய் ராய், தன்னை நீதிமன்றத்தில் பேசக்கூட அனுமதிக்கவில்லை என்றும், தான் எந்தக் குற்றமும் செய்யவில்லை என்றும் மீண்டும் தெரிவித்தாா்.