மேற்கு வங்க மாநிலத்தில் உள்ள ஆா்.ஜி.கா் அரசு மருத்துவக் கல்லூரியில் பயிற்சி பெண் மருத்துவா் பாலியல் வன்கொடுமை செய்யப்பட்டு கொலை செய்யப்பட்ட சம்பவத்தில் விரிவான விசாரணை நடத்தக் கோரி, அவரது பெற்றோா் உச்சநீதிமன்றத்தில் செவ்வாய்க்கிழமை மனு தாக்கல் செய்தனா்.

முன்னதாக, இந்த வழக்கை விசாரித்த சிபிஐ, காவல் துறையில் தன்னாா்வலராகப் பணியாற்றிய சஞ்சய் ராய் மட்டுமே பாலியல் வன்கொடுமையில் ஈடுபட்டதாகத் தெரிவித்தது. இந்நிலையில், சிபிஐ விசாரணை அதிருப்தி அளிப்பதாகக் கூறி உச்சநீதிமன்றத்தில் பெண் மருத்துவரின் பெற்றோா் மனு தாக்கல் செய்துள்ளனா்.

கடந்த 2024-ஆம் ஆண்டு ஆகஸ்ட் மாதம் ஆா்.ஜி.கா் அரசு மருத்துவக் கல்லூரியின் மைய அரங்கில் அந்தப் பயிற்சி பெண் மருத்துவா் பாலியல் வன்கொடுமை செய்யப்பட்டு கொலை செய்யப்பட்டாா்.

இந்தச் சம்பவம் நாடு முழுவதும் அதிா்வலைகளை ஏற்படுத்தியது. குற்றச் செயலில் ஈடுபட்ட நபா்களை கண்டறிந்து கடும் நடவடிக்கை எடுக்க வலியுறுத்தி மாணவா்கள், பெண்கள் என பல்வேறு தரப்பினரும் நாடு முழுவதும் போராட்டத்தில் ஈடுபட்டனா். மேற்கு வங்கத்தில் பயிற்சியில் உள்ள மருத்துவா்கள் தொடா் உண்ணாவிரதப் போராட்டத்தில் ஈடுபட்டனா்.

மருத்துவக் கல்லூரி வளாகத்தில் இருந்த சிசிடிவி காட்சிகளின் அடிப்படையில் சஞ்சய் ராய் காவல் துறையால் கைது செய்யப்பட்டாா். பின்னா் கொல்கத்தா உயா்நீதிமன்ற உத்தரவின்படி இந்த வழக்கு சிபிஐ-க்கு மாற்றப்பட்டது. இதைத் தொடா்ந்து, சஞ்சய் ராய் குற்றவாளி என உறுதி செய்த நீதிமன்றம் அவருக்கு கடந்த 2025-ஆம் ஆண்டு வாழ்நாள் சிறைத் தண்டனை விதித்து உத்தரவிட்டது. அவா் தற்போது சிறையில் அடைக்கப்பட்டுள்ளாா்.

இந்நிலையில், இந்த வழக்கு தொடா்பாக விரிவான விசாரணை நடத்தக் கோரி பெண் மருத்துவரின் பெற்றோா் உச்சநீதிமன்றத்தில் செவ்வாய்க்கிழமை மனு தாக்கல் செய்தனா்.

சிபிஐ மீது குற்றச்சாட்டு: மருத்துவரின் தந்தை செய்தியாளா்களிடம் கூறுகையில், ‘எங்களது மகள் கொலை செய்யப்பட்ட சம்பவத்தில் சஞ்சய் ராய் மட்டுமே ஈடுபட்டுள்ளாா் என்பதை ஏற்க முடியவில்லை. இரவுப் பணியில் இருந்தபோதுதான் எங்கள் மகள் கொலை செய்யப்பட்டுள்ளாா். எனவே, சஞ்சய் ராய் மட்டுமன்றி காவல் துறை அதிகாரி உள்பட மேலும் சிலா் இந்த கொடூர செயலில் ஈடுபட்டிருக்க வாய்ப்புள்ளது. சிபிஐ எங்களுக்கு உரிய நியாயத்தை வழங்கவில்லை. வழக்கின் முக்கிய ஆதாரங்களை அழிக்க சிபிஐ முயற்சி செய்தது.

எங்கள் மகளுக்கு நீதி கிடைக்கும் வரை தொடா்ந்து போராடுவோம். குற்றவாளிகள் அனைவருக்கும் கடும் தண்டனை கிடைக்க வேண்டும். எங்களது மனுவை உச்சநீதிமன்றம் பரிசீலிக்க வேண்டும்’ என்றாா்.