புகைப்பனியின் தாக்கத்தைக் குறைக்க இந்தியாவுடன் காற்று மாசுபாடு பேச்சுவாா்த்தைக்கு பாகிஸ்தானின் பஞ்சாப் மாகாண முதல்வா் மரியம் நவாஸ் அழைப்பு விடுத்துள்ளாா்.

புகையால் ஏற்படும் காற்றுமாசு மற்றும் பனிமூட்டத்தின் கலவையான ‘புகைப்பனி’ என்பது குறிப்பிட்ட ஒரு நிகழ்வாகும். சில மாசுபடுத்தும் நுண் துகள்கள் குளிா்ந்த, ஈரமான காற்றுடன் கலந்து காற்றில் இருப்பதால் அது பல உடல்நலப் பிரச்னைகளை ஏற்படுத்துகிறது. மேலும், காற்று மாசுபாட்டால் நகரங்களில் மக்களின் பாா்வைத் திறன் பாதிக்கப்படுகிறது. இது பெரும்பாலும் தொழிற்சாலைகள், வாகனங்கள் மற்றும் விவசாய கழிவு எரிப்பால் ஏற்படுகிறது.

இது குறித்து பாகிஸ்தானின் லாகூரில் புதன்கிழமை நடைபெற்ற கூட்டத்தில் அந்நாட்டின் பஞ்சாப் முதல்வா் மரியம் நவாஸ் கலந்துகொண்டு பேசியதாவது:

பாகிஸ்தானின் பஞ்சாப் மாகாணம் மட்டுமல்லாமல் இந்தியாவில் உள்ள பஞ்சாப் மாநிலம் உள்பட பல்வேறு வட இந்திய மாநிலங்களிலும் இந்த புகைப்பனி பிரச்னையை ஒவ்வொரு ஆண்டும் அக்டோபா் முதல் பிப்ரவரி வரை எதிா்கொள்கின்றனா். உலகின் மிகவும் காற்று மாசுபாடுள்ள நகரங்களின் பட்டியலில் ஒவ்வொரு ஆண்டும் லாகூா் மற்றும் தில்லி இடம்பெறுகிறது.

இரு தரப்பினரும் இணைந்து இந்தப் பிரச்னையை எதிா்கொள்ள கூட்டு முயற்சிகள் மேற்கொள்ள வேண்டும். இந்தியாவின் பஞ்சாபில் விவசாயிகள் வேளாண் கழிவுகள் எரிப்பது காற்றின் திசை காரணமாக பாகிஸ்தான் பஞ்சாபில் அதன் தாக்கத்தை ஏற்படுத்துகிறது. எனவே, இரு நாடுகள் இடையே காலநிலை குறித்த பேச்சுவாா்த்தை நடத்தப்பட வேண்டும்.

இந்த புகைப்பனியை முடிவுக்குக் கொண்டு வருவது மிகவும் அவசியமான ஒன்று. இது நம் குழந்தைகளின் ஆரோக்கியம் மற்றும் வாழ்வாதாரத்தை பாதிக்கிறது. இந்த விவகாரம் தொடா்பான முறையான பேச்சுவாா்த்தைக்கு இந்திய வெளியுறவு அமைச்சகம் ஒப்புக்கொள்ள வேண்டும் என்றாா்.