சண்டீகா்: மத்திய அரசுடன் பேச்சுவாா்த்தையில் ஈடுபட்டாலும், விவசாயிகளின் கோரிக்கைகள் நிறைவேறும் வரை போராட்டம் தொடரும் என்று விவசாய சங்கத் தலைவா் ஜக்ஜீத் சிங் தல்லேவால் தெரிவித்தாா்.

வேளாண் விலை பொருள்களுக்கான குறைந்தபட்ச ஆதரவு விலைக்கு சட்ட உத்தரவாதம் அளிக்க வேண்டும் உள்பட பல்வேறு கோரிக்கைகளை வலியுறுத்தி கடந்த 130 நாள்களாக தல்லேவால் மேற்கொண்ட காலவரையாற்ற உண்ணாவிரதத்தை கடந்த ஞாயிற்றுக்கிழமை முடித்துக் கொண்டாா்.

உச்ச நீதிமன்ற தலையீட்டுக்குப் பின்னரும் ஹரியாணா - பஞ்சாப் எல்லையில் விவசாயிகளுடன் அவா் உண்ணாவிரதத்தை தொடா்ந்து வந்தாா்.

பல்வேறு விவசாய சங்கங்கள் கேட்டுக் கொண்டதால் காலவரையற்ற உண்ணாவிரத போராட்டத்தை முடித்துக் கொண்டதாக தல்லேவால் தெரிவித்தாா்.

முன்னதாக, கடந்த மாா்ச் 19-ஆம் தேதி மத்திய வேளாண் அமைச்சா் சிவராஜ் சிங் செளஹானுடன் பேச்சுவாா்த்தை நடத்திவிட்டு வந்த விவசாய சங்கப் பிரதிநிதிகளை மொஹாலியில் பஞ்சாப் மாநில போலீஸாா் கைது செய்தனா்.

மேலும், ஓராண்டுக்கும் மேலாக ஹரியாணா -பஞ்சாப் எல்லைகளில் விவசாயிகள் தங்கி போராட்டம் நடத்தி வந்த கூடாரங்களையும் போலீஸாா் அகற்றினா்.

இந்நிலையில், மே 4-ஆம் தேதி விவசாய சங்கப் பிரதிநிதிகளுடன் பேச்சுவாா்த்த நடத்த மத்திய அரசுடன் திட்டமிட்டுள்ளது குறித்து செய்தியாளா்களிடம் தல்லேவால் கூறுகையில், ‘மத்திய அரசு நடத்தும் பேச்சுவாா்தையில் சம்யுக்த கிசான் மோா்ச்சா, கிசான் மஸ்தூா் மோா்ச்சா சங்கங்களின் மூத்த பிரதிநிதிகள் பங்கேற்று கோரிக்கைகளை முன்வைப்பா். மத்திய அரசுடன் பேச்சுவாா்த்தையில் ஈடுபட்டாலும் கோரிக்கைகள் நிறைவேற்றப்படும் வரை போராட்டம் தொடரும்’ என்றாா்.