இந்தியாவில் திறமை இருந்தாலும், இளைஞர்களுக்கு வேலைவாய்ப்பு அளிக்க புதிய தொழில்நுட்பத்தில் தொழில்துறை வலிமையை வளர்க்க வெற்று வார்த்தைகள் அல்ல, வலுவான உற்பத்தித் தளம் தேவை என்று காங்கிரஸ் தலைவர் ராகுல் காந்தி சனிக்கிழமை தெரிவித்தார்.

இதுதொடர்பாக அவருடைய எக்ஸ் பதிவில்,

உலகெங்கிலும் போரில் புரட்சியை ஏற்படுத்தும் ட்ரோன்களை சீனா எவ்வாறு தயாரிக்கத் தொடங்கியுள்ளது என்பதை ராகுல் எடுத்துரைத்தார், இந்தப் பகுதியில் போட்டித்தன்மையுடன் இருக்க இந்தியா ஒரு உத்தியை உருவாக்க வேண்டும் என்று கூறினார்.

ட்ரோன்கள் போரில் புரட்சியை ஏற்படுத்தியுள்ளன, பேட்டரிகள், மோட்டார்கள் மற்றும் ஒளியியல் ஆகியவற்றை இணைத்து போர்க்களத்தில் முன்னெப்போதும் இல்லாத வகையில் சூழ்ச்சி செய்து தொடர்பு கொள்கின்றன. ஆனால் ட்ரோன்கள் ஒரு தொழில்நுட்பம் மட்டுமல்ல - அவை ஒரு வலுவான தொழில்துறை அமைப்பால் உருவாக்கப்பட்ட அடிமட்டத்திலிருந்து வரும் கண்டுபிடிப்புகள்.

துரதிர்ஷ்டவசமாக, பிரதமர் மோடி இதைப் புரிந்துகொள்ளத் தவறிவிட்டார். அவர் ஏஐ-யில் டெலிப்ராம்ப்டர் உரைகளை வழங்கும்போது, ​​நமது போட்டியாளர்கள் புதிய தொழில்நுட்பங்களில் தேர்ச்சி பெறுகிறார்கள்.

இந்தியாவிற்கு வெற்று வார்த்தைகள் அல்ல, வலுவான உற்பத்தித் தளம் தேவை என்று அவர் பதிவில் பிரதமர் நரேந்திர மோடியைக் கடுமையாகச் சாடினார்.

இந்தியா மகத்தான திறமை, அளவு மற்றும் உந்துதலைக் கொண்டுள்ளது. நமது இளைஞர்களுக்கு வேலைவாய்ப்புகளை வழங்கவும், இந்தியாவை எதிர்காலத்தில் வழிநடத்தவும் நமக்குத் தெளிவான தொலைநோக்கு பார்வை இருக்க வேண்டும். உண்மையான தொழில்துறை வலிமையை உருவாக்க வேண்டும். 

காங்கிரஸ் தலைவர் இந்தப் பதிவோடு, ட்ரோன் தொழில்நுட்பம் குறித்த ஒன்பது நிமிட விடியோ பதிவையும் இணைத்துள்ளார். எதிர்காலத்திற்காக இதுபோன்ற தொழில்நுட்பத்தை உருவாக்க இந்தியா திறமை மற்றும் பொறியியல் திறன்களைக் கொண்டுள்ளது என்று அவர் பதிவிட்டுள்ளார்.