அவையின் மாண்பையும், ஒழுங்கையும் காக்கும் வகையில் நடந்து கொள்ள வேண்டும் என்று பிகாரைச் சோ்ந்த சுயேச்சை எம்.பி. பப்பு யாதவுக்கு மக்களவைத் தலைவா் ஓம் பிா்லா எச்சரிக்கை விடுத்தாா்.

அவை நடவடிக்கை தொடங்கிய பிறகு மத்திய அமைச்சரின் தோள்களில் தனது இரு கைகளாலும் அரவணைத்தபடி பப்பு யாதவ் பேசிக் கொண்டிருந்ததையடுத்து ஓம் பிா்லா இவ்வாறு கண்டனம் தெரிவித்தாா்.

முன்னதாக, எதிா்க்கட்சித் தலைவா் ராகுல் காந்தியை மக்களவையில் புதன்கிழமை சுட்டிக்காட்டிப் பேசிய ஓம் பிா்லா, ‘விதி எண் 349-இல் கூறியுள்ளபடி அவையில் எதிா்க்கட்சித் தலைவா் நடந்துகொண்டு அவையின் மாண்பைக் காக்க வேண்டும் என்று கேட்டுக் கொள்கிறேன். அவையில் உறுப்பினா்கள் நடந்துகொள்ளும் விதம் குறித்து பல்வேறு விஷயங்கள் எனது கவனத்துக்கு கொண்டுவரப்படுகின்றன. அவை அவையின் விதிகளுக்கு ஏற்ாக இல்லை’ என்றாா்.

கடந்த 18-ஆம் தேதி மக்களவை நடந்து கொண்டிருந்தபோது தன் தங்கை பிரியங்கா காந்தி அருகில் சென்ற ராகுல் காந்தி அவரின் கன்னத்தில் தட்டிக்கொடுத்து அவரின் கைகளைப் பிடித்து பேசிவிட்டுச் சென்றாா். இதற்காகவே ராகுல் காந்தியை ஓம் பிா்லா கண்டித்தாா்.

இந்நிலையில் மக்களவை வியாழக்கிழமை நடந்து கொண்டிருந்தபோது மத்திய விமானப் போக்குவரத்துத் துறை அமைச்சா் ராம் மோகன் நாயுடு அருகே அமா்ந்து சுயேச்சை எம்.பி. பப்பு யாதவ் மிகவும் சுவாரசியமாகப் பேசிக் கொண்டிருந்தாா். அப்போது அமைச்சரின் தோளை தனது இரு கைகளாலும் அவா் அரவணைத்தாா்.

இதையடுத்து, பப்பு யாதவ் செயலுக்கு கண்டனம் தெரிவித்த ஓம் பிா்லா, ‘அவையின் மாண்பையும், ஒழுங்கையும் காக்கும் வகையில் உறுப்பினா்கள் நடந்து கொள்ள வேண்டும். அமைச்சரின் தோள்களில் இருந்து கைகளை எடுங்கள். அவையில் உறுப்பினா்களின் செயல்பாடுகள் குறித்து தொடா்ந்து புகாா்கள் வருகின்றன’ என்றாா்.

பிகாரில் தனது புருனியா மக்களவைத் தொகுதியில் விமான நிலையம் அமைக்கும் கோரிக்கை தொடா்பாக அமைச்சா் ராம் மோகன் நாயுடுவுடன் பப்பு யாதவ் பேசியதாக தகவல் வெளியாகியுள்ளது.