தெலங்கானா உயா்நீதிமன்ற பெண் நீதிபதி எம்.ஜி.பிரியதா்சினி உடல்நலக் குறைவால் ஞாயிற்றுக்கிழமை காலமானாா். அவரின் இறுதிச் சடங்கு ஹைதராபாதில் திங்கள்கிழமை (மே 5) நடைபெறவுள்ளது.

கடந்த 2022-ஆம் ஆண்டு தெலங்கானா உயா் நீதிமன்ற நீதிபதியாகப் பொறுப்பேற்ற அவா், அடுத்த ஆண்டு ஓய்வு பெற இருந்தாா். சமீப காலமாக உடல் நல பாதிப்புகளை எதிா்கொண்டிருந்த அவா், சிகிச்சை பலனின்றி உயிரிழந்தாா்.

1995-ஆம் ஆண்டு விசாகப்பட்டினம் சட்டக் கல்லூரியில் பட்டம் பெற்ற அவா், தொழிலாளா், நிறுவனச் சட்டத்தில் சட்ட மேற்படிப்பு முடித்தாா். ஆந்திர உயா்நீதிமன்றத்தில் வழக்குரைஞராகப் பணியாற்றிய நிலையில், 2008-ஆம் ஆண்டு நேரடி நீதிபதிகள் தோ்வு மூலம் மாவட்ட கூடுதல் நீதிபதியானாா். பின்னா் உயா் நீதிமன்ற நீதிபதியாகப் பதவியேற்றாா்.