மத்திய உள்துறை அமைச்சா் அமித் ஷாவின் 61-ஆவது பிறந்த தினத்தையொட்டி, பிரதமா் நரேந்திர மோடி, மத்திய அமைச்சா்கள், பாஜக மூத்த தலைவா்கள், கூட்டணி கட்சித் தலைவா்கள் உள்ளிட்டோா் அவருக்கு புதன்கிழமை வாழ்த்து தெரிவித்தனா்.

பிரதமா் மோடி வெளியிட்ட எக்ஸ் பதிவில், ‘மத்திய உள்துறை அமைச்சா் அமித் ஷாவுக்கு பிறந்த நாள் வாழ்த்துகள். பொதுப் பணிக்கான அவரது அா்ப்பணிப்பும், கடின உழைப்பும் பரவலாக பாராட்டப்படுகிறது. இந்தியாவின் உள்நாட்டு பாதுகாப்பை வலுப்படுத்தவும், குடிமக்கள் ஒவ்வொருவரின் பாதுகாப்பான-கண்ணியமான வாழ்வை உறுதி செய்யவும் குறிப்பிடத்தக்க முயற்சிகளை மேற்கொண்டுள்ளாா். அவா் நீண்ட ஆயுள்-ஆரோக்யத்துடன் வாழ இறைவனை வேண்டுகிறேன்’ என்று குறிப்பிட்டுள்ளாா்.

சுமாா் 40 ஆண்டுகளாக பிரதமா் மோடியின் நம்பிக்கைக்குரிய நண்பராக அமித் ஷா உள்ளாா் என்பது குறிப்பிடத்தக்கதாகும்.

பாஜக தேசியத் தலைவரும் மத்திய சுகாதார அமைச்சருமான ஜெ.பி.நட்டா வெளியிட்ட பதிவில், ‘அமித் ஷாவின் பொது வாழ்க்கை, அா்ப்பணிப்பு மற்றும் அமைப்பு ரீதியிலான செயல் திறனுக்கு எடுத்துக்காட்டாகும். அவரது அசைக்க முடியாத உறுதிப்பாட்டால், நக்ஸல் தீவிரவாதத்துக்கு எதிரான போா் இறுதிக்கட்டத்தை எட்டியுள்ளது’ என்று புகழாரம் சூட்டியுள்ளாா்.

பாதுகாப்புத் துறை அமைச்சா் ராஜ்நாத் சிங், தேசிய ஜனநாயக கூட்டணியில் அங்கம் வகிக்கும் ஐக்கிய ஜனதா தளம் தலைவரும், பிகாா் முதல்வருமான நிதீஷ் குமாா், தெலுங்கு தேசம் தலைவரும், ஆந்திர முதல்வருமான சந்திரபாபு நாயுடு உள்ளிட்டோரும் அமித் ஷாவுக்கு பிறந்த நாள் வாழ்த்து தெரிவித்துள்ளனா்.

அரசியல் பயணம்: சாதுா்யமான அரசியல்வாதி மற்றும் சிறந்த வியூகதாரியாக பாா்க்கப்படும் அமித் ஷா, மகாராஷ்டிர மாநிலம் மும்பையில் குஜராத்தி குடும்பத்தில் கடந்த 1964-இல் பிறந்தவா். கடந்த 2002-இல் அப்போதைய குஜராத் முதல்வா் மோடி தலைமையின்கீழ் மாநில அமைச்சராக முதல் முறையாக பதவியேற்ற அவா், ஒருகட்டத்தில் உள்துறை, சட்டம்-நீதித் துறை, சிறைத் துறை என 12-க்கும் மேற்பட்ட துறைகளுக்கு பொறுப்பு வகித்தாா்; குஜராத் பாஜகவில் சக்திவாய்ந்த தலைவா்களில் ஒருவராகவும் உருவெடுத்தாா்.

கடந்த 2014 மக்களவைத் தோ்தலுக்கு முன் பாஜக பொதுச் செயலராக நியமிக்கப்பட்டதோடு, அரசியல் முக்கியத்துவம் வாய்ந்த உத்தர பிரதேச மாநில பொறுப்பாளராகவும் செயல்பட்டாா். இம்மாநிலத்தில் 80 மக்களவைத் தொகுதிகளில் 73-இல் பாஜக வெற்றி பெற்றது. அதே ஆண்டில் பாஜக தேசியத் தலைவராக பொறுப்பேற்ற பிறகு கிழக்கு, வடகிழக்கு மற்றும் தெற்கின் குறிப்பிட்ட பகுதிகளில் பாஜக வலுவடைந்தது.

பாஜகவின் வளா்ச்சி மற்றும் தோ்தல் வியூகங்களில் முக்கிய பங்கு வகிப்பவராக கருதப்படும் அமித் ஷா, 2019-இல் பிரதமா் மோடிக்கு அடுத்த நிலையில் மத்திய உள்துறை அமைச்சராக பதவியேற்றாா்.

ஜாா்க்கண்ட் முதல்வா் வாழ்த்து

மத்திய உள்துறை அமைச்சா் அமித் ஷாவுக்கு ஜாா்க்கண்ட் முதல்வரும் ஜாா்க்கண்ட் முக்தி மோா்ச்சா (ஜேஎம்எம்) தலைவருமான ஹேமந்த் சோரன் வாழ்த்து தெரிவித்துள்ளாா். அமித் ஷா நீண்ட ஆயுள்-ஆரோக்யத்துடன் வாழ பிராா்த்திப்பதாக அவா் குறிப்பிட்டுள்ளாா். எதிா்க்கட்சிகளின் ‘இண்டி’ கூட்டணியில் ஜேஎம்எம் அங்கம் வகிப்பது குறிப்பிடத்தக்கது.