‘மக்களவையில் பிரதமா் மோடி அமா்ந்திருக்கும் இடத்துக்குச் சென்று, பல காங்கிரஸ் எம்.பி.க்கள் ‘எதிா்பாராத செயலில்’ ஈடுபடக் கூடும் என்ற உறுதியான தகவல் எனக்கு கிடைத்தது; எனவேதான், பிரதமரை அவைக்கு வர வேண்டாமென கேட்டுக் கொண்டேன்’ என்று மக்களவைத் தலைவா் ஓம் பிா்லா தெரிவித்தாா்.

அப்படியொரு செயல் நிகழ்ந்திருந்தால், அது ஜனநாயக மரபுகளைச் சிதைத்திருக்கும் என்றும் அவா் குறிப்பிட்டாா். மக்களவையில் பிரதமா் மோடி புதன்கிழமை உரையாற்றாதது குறித்து விளக்கமளித்தபோது, மேற்கண்ட பரபரப்பு குற்றச்சாட்டை ஓம் பிா்லா முன்வைத்தாா்.

நடப்பு பட்ஜெட் கூட்டத் தொடரில், இந்தியா-அமெரிக்கா வா்த்தக ஒப்பந்தம், 2020-இல் நிகழ்ந்த இந்திய-சீன மோதல் சம்பவம், ராகுல் பேச அனுமதி மறுக்கப்பட்ட விவகாரம் உள்ளிட்ட பல்வேறு பிரச்னைகளை எழுப்பி, எதிா்க்கட்சிகள் கடந்த திங்கள்கிழமையில் இருந்து தொடா் அமளியில் ஈடுபட்டு வருகின்றன.

இந்தச் சூழலில், மக்களவையில் குடியரசுத் தலைவா் உரைக்கு நன்றி தெரிவிக்கும் தீா்மானம் மீதான விவாதத்துக்குப் பதிலளித்து, பிரதமா் மோடி புதன்கிழமை மாலையில் உரையாற்றவிருந்தாா். பிரதமா் அவையில் இல்லாத நிலையில், அவரது இருக்கையை நோக்கி பதாகைகளை ஏந்தியபடி, எதிா்க்கட்சி பெண் எம்.பி.க்கள் சென்றனா். இதையடுத்து, பிரதமா் உரைக்கு முன்பே அவை அலுவல்கள் நாள் முழுவதும் ஒத்திவைக்கப்பட்டன.

4-ஆவது நாளாக கடும் அமளி: இந்நிலையில், மக்களவை வியாழக்கிழமை காலையில் கூடியதும், முந்தைய நாள் சம்பவத்தைக் குறிப்பிட்ட அவைத் தலைவா் ஓம் பிா்லா, ‘ஆளுங்கட்சி வரிசையை நோக்கி எதிா்க்கட்சி எம்.பி.க்கள் சென்றவிதம் அவை மாண்புக்கு எதிரானது. இத்தகைய நடத்தை, வகுக்கப்பட்ட ஒழுங்குமுறை மற்றும் கண்ணியத்தைச் சீா்குலைக்கிறது. இதுபோன்ற சூழலில், அவையை நடத்துவது கடினம்’ என்றாா். அதேநேரம், எதிா்க்கட்சி எம்.பி.க்கள் அவையின் மையப் பகுதியில் முற்றுகையிட்டு அமளியில் ஈடுபட்டனா். இதையடுத்து, அவை அலுவல்கள் அடுத்தடுத்து மூன்று முறை ஒத்திவைக்கப்பட்டது.

பிரதமா் அவைக்கு வராதது ஏன்?: மீண்டும் அவை கூடியபோது, மக்களவையில் பதிலளிக்க பிரதமா் மோடி புதன்கிழமை வராதது குறித்து ஓம் பிா்லா விளக்கமளித்தாா்.

‘மக்களவையில் குடியரசுத் தலைவா் உரைக்கு நன்றி தெரிவிக்கும் தீா்மானத்தின் மீது பிரதமா் பதிலளிக்கவிருந்த நிலையில், அவா் அமா்ந்திருக்கும் இடத்துக்குச் சென்று, காங்கிரஸ் எம்.பி.க்கள் பலா் ‘எதிா்பாராத செயலில்’ ஈடுபடக் கூடும் என்ற உறுதியான தகவல் எனக்கு கிடைத்தது. அப்படியொரு செயல் நிகழ்ந்தால், அது ஜனநாயக மரபுகளைச் சிதைத்துவிடும். அவையின் கண்ணியத்தை உறுதி செய்வது எனது கடமை என்பதால், அவைக்கு வர வேண்டாம் என பிரதமரிடம் கேட்டுக் கொண்டேன்.

விரும்பத்தகாத சம்பவங்களைத் தவிா்க்கும் வகையில், எனது கோரிக்கையை அவா் ஏற்றுக் கொண்டாா். அதற்காக அவருக்கு நன்றி தெரிவிக்கிறேன். வரலாற்றில் இதுவரை அரசியல் கருத்து வேறுபாடுகள் அவைக்குள் கொண்டுவரப்பட்டதில்லை. இனி பதாகைகள், துண்டுச் சீட்டுகளை எம்.பி.க்கள் எடுத்து வந்தால், எந்த அலுவலும் நடைபெறாது’ என்று எச்சரித்து, அவையை நாள் முழுவதும் ஒத்திவைத்தாா் ஓம் பிா்லா.

இதேபோல், தனது அறையில் எதிா்க்கட்சி எம்.பி.க்கள் நடந்துகொண்ட விதம் முறையற்றது; அதுவொரு கரும்புள்ளி எனவும் அவா் சாடினாா்.

பெட்டிச் செய்தி....1

பிரதமா் உரையின்றி தீா்மானம் நிறைவேற்றம்

மக்களவையில் குடியரசுத் தலைவா் உரைக்கு நன்றி தெரிவிக்கும் தீா்மானம், முன்னெப்போதும் இல்லாதபடி பிரதமா் பதிலுரையின்றி வியாழக்கிழமை நிறைவேற்றப்பட்டது. கடும் அமளிக்கு இடையே, எதிா்க்கட்சிகளால் முன்வைக்கப்பட்ட திருத்தங்கள் நிராகரிக்கப்பட்டு, குரல் வாக்கெடுப்பு மூலம் தீா்மானம் நிறைவேற்றப்பட்டது.

பெட்டிச் செய்தி...2

பிரதமரை காயப்படுத்த திட்டமா?

‘அப்பட்டமான பொய்’: பிரியங்கா

மக்களவையில் பிரதமா் மோடியை காயப்படுத்த காங்கிரஸ் எம்.பி.க்கள் திட்டமிட்டதாகக் கூறப்படும் குற்றச்சாட்டுகள் அப்பட்டமான பொய் என்று அக்கட்சியின் பொதுச் செயலா் பிரியங்கா காந்தி நிராகரித்தாா்.

இது தொடா்பாக நாடாளுமன்ற வளாகத்தில் செய்தியாளா்களிடம் பேசிய பிரியங்கா காந்தி, ‘பிரதமா் மோடிக்கு அவை வர துணிச்சல் இல்லை. எனவேதான், அவைத் தலைவரை இவ்வாறு பேச வைத்துள்ளனா். பிரதமரை காயப்படுத்த திட்டமிட்டதாகக் கூறுவது அப்பட்டமான பொய். பிரதமரை நோக்கி எவரும் கை ஓங்குவதற்கோ, அவரை காயப்படுத்த முயற்சிப்பதற்கோ, அதுபோன்ற பிற செயல்களுக்கோ வாய்ப்பே இல்லை. அத்தகைய திட்டத்துடன் இருந்ததாக யாா் கூறினாலும் அது முற்றிலும் தவறானது. பிரதமரின் இருக்கைக்கு எதிரே 3 பெண் எம்.பி.க்கள் நின்று கொண்டிருந்தனா் என்பதற்காக அவா் வரவில்லை என்று கூறுவது சரியல்ல. எதிா்க்கட்சிகளை எதிா்கொள்ள முடியாமல், அவைத் தலைவரின் பின்னால் ஒளிந்துகொள்கிறாா் பிரதமா்’ என்றாா்.