கடலூர் தொகுதியில் 1998 ஆம் ஆண்டுக்குப்பிறகு 2-வது முறையாக இந்த தேர்தலில் வெற்றிபெற்று அதிமுக சாதனை படைத்துள்ளது.
 கடலூர் தொகுதியில் மொத்தம் பதிவான வாக்குகள் 9 லட்சத்து 85 ஆயிரத்து 127. வெள்ளிக்கிழமை நடந்த வாக்கு எண்ணிக்கையின் படி அதிமுக வேட்பாளர் ஆ.அருண்மொழித்தேவன் 4 லட்சத்து 81 ஆயிரத்து 429 வாக்குகள் பெற்று, தன்னை எதிர்த்துப் போட்டியிட்ட திமுக வேட்பாளர்  கொ.நந்தகோபாலகிருஷ்ணனைக் காட்டிலும் 2 லட்சத்து 3 ஆயிரத்து 125 வாக்குகள் வித்தியாசத்தில் வெற்றிபெற்றார்.
 இதன்மூலம் அதிமுக 2-வது முறையாக கடலூரைக் கைப்பற்றியிருக்கிறது.இதற்கு முன் கடந்த 1998-ம் நடந்த பொதுத்தேர்தலின் போது அதிமுக சார்பில் எம்.சி..தாமோதரன் இத்தொகுதியில் போட்டியிட்டு எம்பியாக இருந்தார். அவருக்கு அடுத்தப்படியாக தற்போது தான் அதிமுக மீண்டும் கடலூரைக் கைப்பற்றியுள்ளது.

15 வேட்பாளர்களுக்கு டெபாசிட்டை காலி செய்த அதிமுக: 
 கடலூர் தொகுதியில் திமுக வேட்பாளர் சேர்ந்த டாக்டர் கே.நந்தகோபாலகிருஷ்ணன் 2 லட்சத்து 78 ஆயிரத்து 304 வாக்குகள் பெற்று 2-ம் இடத்தையும், இவரைத் தொடர்ந்து பாஜக கூட்டணி சார்பில் போட்டியிட்ட தேமுதிக வேட்பாளர் சி.ஆர்.ஜெய்சங்கர் 1 லட்சத்து 47 ஆயிரத்து 606 வாக்குகள் பெற்று 3-ம் இடத்தைப் பிடித்தார்.
 கடந்த தேர்தலில் போட்டியிட்டு வெற்றிபெற்ற காங்கிரஸ் வேட்பாளர் கே.எஸ்.அழகிரி 26 ஆயிரத்து 650 வாக்குகள் மட்டுமே பெற்றார்.  இந்திய கம்யூனிஸ்ட் கட்சி வேட்பாளர் கு.பாலசுப்ரமணியன் 11ஆயிரத்து 122 வாக்குகள் பெற்றார்.
 தேர்தல் ஆணைய விதிமுறைப்படி பதிவான வாக்குகளில் 6-ல் 1 பங்கு வாக்குகளை பெறுபவர் மட்டுமே டெபாசிட் தொகையை திரும்ப பெற தகுதியுள்ள வேட்பாளராக கருதப்படுவார்.
 இதன் அடிப்படையில் பதிவான மொத்த வாக்கான 9 லட்சத்து 85 ஆயிரத்து 127  வாக்குகளில் 6-ல் ஒரு பங்கான 1 லட்சத்து 64 ஆயிரத்துக்கும் அதிகமான வாக்குகளை பெற்றவர் மட்டுமே டெபாசிட் தொகையை திரும்ப பெற முடியும். இதன்படி கடலூர் தொகுதியில் அதிமுக வேட்பாளர் எதிர்த்து போட்டியிட்ட 16 பேரில் திமுக வேட்பாளர் கொ.நந்தகோபாலகிருஷ்ணனை தவிர மற்ற 15 வேட்பாளர்களும் டெபாசிட் இழந்துள்ளனர்.