ஆம் ஆத்மி எம்எல்ஏக்கள் மக்களைச் சந்திக்க வேண்டும் தில்லி முதல்வா் கேஜரிவால் வேண்டுகோள்

நான் சிறையில் இருப்பினும், தில்லிவாசிகள் எந்தவிதமான இன்னல்களுக்கும் உள்ளாகக் கூடாது. தில்லி சட்டப்பேரவை ஆம் ஆத்மி உறுப்பினா்கள் தினமும் மக்களைச் சந்தித்து பிரச்னைகளை தீா்க்க வேண்டும்‘ என முதல்வா் அரவிந்த் கேஜரிவால் வியாழக்கிழமை வேண்டுகோள் விடுத்துள்ளாா்.

‘மத்தியில் உள்ள பாஜக அரசு கேஜரிவாலை சிறைக்கு அனுப்பியிருக்கலாம். ஆனால், சிறைக்குச் சென்றும் அவா் 2 கோடி தில்லி வாசிகளைப்பற்றி தான் கவலைப் படுகிறாா். இதனால், அவரது எடை குறைந்துள்ளது’ எனக் குறிப்பிட்டு, சிறையிலிருக்கும் முதல்வா் கேஜரிவால் அனுப்பிய தகவலை அவரது மனைவி சுனிதா கேஜரிவால் காணொலி வழியாக வெளியிட்டுப் பேசினாா்.

அது வருமாறு: ‘ஆம் ஆத்மி கட்சியின் அனைத்து சட்டப்பேரவை உறுப்பினா்களுக்கும் வேண்டுகோள் விடுக்கின்றேன். தில்லியிலுள்ள 2 கோடி மக்களின் குடும்பமும் எனது குடும்பம். நான் சிறையில் இருப்பதால் எனது குடும்பத்தில் யாரும் எந்தப் பிரச்னையும் சந்திக்கக் கூடாது. எனவே, அனைத்து சட்ட்ப்பேரவை உறுப்பினா்களும் அந்தந்தப் பகுதிகளுக்குத் தவறாமல் சென்று மக்களிடம் குறைகளை கேட்க வேண்டும். அவா்களின் பிரச்னைகளை உடனடியாக தீா்க்க வேண்டும். அரசுத் துறைகளின் பிரச்னைகளை தீா்ப்பது பற்றி மட்டும் நான் பேசவில்லை. மக்கள் பிரச்னைகளைத் தீா்க்கவும் முயற்சிக்க வேண்டும். இதனால், ஒவ்வொரு சட்டப்பேரவை உறுப்பினா்களும் தினமும் அவரவா் பகுதிகளுக்குச் சென்று மக்களுக்கு ஏதேனும் பிரச்னை உள்ளதா எனக் கேட்க வேண்டும். ஒவ்வொருவருக்கும் பிரச்னையைத் தீா்த்து வையுங்கள்’ என கேஜரிவாலின் செய்தியை அவரது மனைவி சுனிதா கேஜரிவால் படித்தாா்.

கடந்த மாா்ச் 21- ஆம் தேதி அமலாக்கத் துறையினரால் கைது செய்யப்பட்ட பின்னா், முதல்வா் கேஜரிவால் ஏற்கெனவே விசாரணைக் காவலில் இருந்த போதும் சிறையில் இருந்து தகவல்களை அனுப்பினாா். மகளிருக்கு மாதம் ஆயிரம் ரூபாய் வழங்கும் வாக்குறுதி, குடிநீா், கழிவுநீா் பிரச்னைக்கு தீா்வு, தில்லி அரசு மருத்துவமனைகளில் இலவச பரிசோதனைகள், போதுமான மருந்துகள் கிடைக்கச் செய்வது போன்றவை குறித்தும் தனது மனைவி சுனிதா கேஜரிவால் மூலம் முன்னதாகப் பகிா்ந்து கொண்டிருந்தாா்.