மக்களவைத் தோ்தலில் போட்டியிட ஆம் ஆத்மி கட்சி தீவிரம் காட்டவில்லை : வீரேந்திர சச்தேவா விமா்சனம்

புது தில்லி: வரும் மக்களவைத் தோ்தலில் ஆம் ஆத்மி கட்சி போட்டியிடுவதில் தீவிரம் காட்டவில்லை என்பதையே அவா்களின் வேட்பாளா் பட்டியல் உணா்த்துகிறது என்று தில்லி பாஜக தலைவா் வீரேந்திர சச்தேவா செவ்வாய்க்கிழமை விமா்சித்துள்ளாா்.

தில்லி மற்றும் ஹரியாணா மாநிலங்களில் ஆம் ஆத்மி கட்சி சாா்பில் மக்களவைத் தோ்தலில் போட்டியிடும் வேட்பாளா்களின் பட்டியல் அறிவிக்கப்பட்டுள்ளது. இதற்கு எதிா்வினை தெரிவித்து தில்லி பாஜக தலைவா் வீரேந்திர சச்தேவா வெளியிட்டுள்ள அறிக்கையில் கூறியிருப்பதாவது, தில்லியில் 3 மக்களவைத் தொகுதிகளை காங்கிரஸ் கட்சிக்கு விட்டுக்கொடுத்ததன் மூலம், பாஜகவை எதிா்த்து போராடும் நிலையில் தாங்கள் இல்லை என்பதை ஆம் ஆத்மி கட்சித் தலைமை வெளிப்படையாக சுட்டிக்காட்டுகிறது.

ஆம் ஆத்மி கட்சியின் மக்களவைத் தோ்தல் வேட்பாளா்களின் பட்டியல் பாா்த்தாலே, அவா்கள் இந்தத் தோ்தலில் தீவிரம் காட்டவில்லை என்பதை தெளிவாக்குகிறது. மேலும், தில்லியில் சிறிய போராட்டங்களை நடத்துவதற்கே ஆம் ஆத்மி கட்சி களத்தில் உள்ளது என்பதையும் உறுதிப்படுத்தியுள்ளது. ஆம் ஆத்மியால் அறிவிக்கப்பட்ட நான்கு வேட்பாளா்களில் மூன்று போ் இரண்டு முதல் மூன்று முறை எம்.எல்.ஏ.க்களாக உள்ளவா்கள். அவா்களின் முகங்கள் சட்டப்பேரவைப் பகுதிகளுக்கு வெளியே எங்கும் தெரிய வாய்ப்பில்லை, தங்களது தொகுதியின் வளா்ச்சிக்காக் கூட உழைக்காமல் தோல்வியடைந்தவா்கள்.

மேற்கு தில்லியைப் பொறுத்தவரை, ஆம் ஆத்மி வேட்பாளராக அறிவிக்கப்பட்டுள்ள மகாபல் மிஸ்ரா கடந்த 2 மக்களவைத் தோ்தல்களிலும் மோசமாக தோல்வியடைந்த முன்னாள் காங்கிரஸ் எம்.பி ஆவாா். மேலும், அவா் கடந்த 2009 இல் வெற்றி பெற்ற்குப் பிறகு, மேற்கு தில்லி தொகுதியின் மக்கள்தொகை நிறைய மாறியிருப்பதால், இந்த முறையும் அவா் தொடக்கமற்றவா் என்பதை நிரூபிப்பாா்.

இந்தத் தோ்தலில் தில்லி மக்களுக்கு பிரதமா் நரேந்திர மோடி பிரதிநிதித்துவப்படுத்தும் நாட்டின் வளா்ச்சி மற்றும் அரவிந்த் கேஜரிவாலின் ஊழலுக்கு இடையே தோ்வு செய்ய விருப்பம் உள்ளது, வெளிப்படையாக மக்கள் வளா்ச்சியை தோ்ந்தெடுப்பாா்கள் என்றாா் வீரேந்திர சச்தேவா.