நமது நிருபா்

புது தில்லி: சென்னை அண்ணாநகரில் 10 வயது சிறுமி தொடா்புடைய பாலியல் வன்கொடுமை வழக்கை சிபிஐ விசாரிக்க சென்னை உயா்நீதிமன்றம் பிறப்பித்திருந்த உத்தரவுக்கு உச்சநீதிமன்றம் திங்கள்கிழமை தடை விதித்தது.

சென்னை அண்ணா நகரைச் சோ்ந்த 10 வயது சிறுமி பாலியல் வன்கொடுமைக்கு உள்ளானது தொடா்பாக அவரது பெற்றோா் அண்ணாநகா் அனைத்து மகளிா் காவல் நிலையத்தில் ஆக.29-ஆம் தேதி புகாா் அளிக்க சென்ாகவும், அப்போது பெண் காவல் ஆய்வாளா் தங்களை தாக்கியதாகவும் புகாா் தெரிவித்தனா்.

இந்த விவகாரத்தில் தொடா்புடைய சந்தேகிக்கப்படும் சிறுமியின் பக்கத்து வீட்டில் வசிக்கும் நபரின் பெயரை புகாரிலிருந்து நீக்க தாங்கள் வற்புறுத்தப்பட்டதாகவும்

சிறுமியின் பெற்றோா் குற்றம்சாட்டும் விடியோ வெளியானது.

இந்தக் குற்றச்சாட்டுகள் காவல் துறையின் தரப்பில் மறுக்கப்பட்டது. சம்பந்தப்பட்ட விசாரணை அதிகாரியும் இடமாற்றம் செய்யப்பட்டாா். இந்த விவகாரத்தை சென்னை உயா்நீதிமன்றம் தாமாக முன்வந்து கடந்த செப்.10-ஆம் தேதி விசாரணைக்கு எடுத்துக் கொண்டது. மேலும், இந்த விவகாரம் தொடா்பாக பாதிக்கப்பட்ட சிறுமியின் தாய் தாக்கல் செய்த ஆள்கொணா்வு மனுவையும் உயா்நீதிமன்றம் விசாரித்தது.

கடந்த அக். 2-ஆம் தேதி இந்த விவகாரத்தை விசாரித்த, நீதிபதிகள் எஸ்எம் சுப்ரமணியம், வி. சிவஞானம் ஆகியோா் அடங்கிய அமா்வு ஒரு உத்தரவைப் பிறப்பித்தது. அதில், சிறுமி பாலியல் துன்புறுத்தலுக்கு உள்ளான வழக்கு, சென்னையில் காவல் நிலையத்திற்குள் தாக்கப்பட்டதாகக் கூறப்படும் சிறுமியின் தாய் தெரிவித்த குற்றச்சாட்டு குறித்த சம்பவம் ஆகியவற்றின் விசாரணையை சிபிஐக்கு மாற்றுவதாகவும், பாதிக்கப்பட்ட பெற்றோருக்கு காவல்துறை பாதுகாப்பு வழங்க வேண்டும் எனவும் தெரிவித்திருந்தது. மேலும், பாதிக்கப்பட்ட சிறுமி மற்றும் அவரது பெற்றோா் மருத்துவமனையிலும், காவல் நிலையத்திலும் நடத்தப்பட்ட விதம் போக்ஸோ சட்ட விதிகளை மீறுவதாக இருப்பதாகவும் நீதிபதிகள் குறிப்பிட்டிருந்தனா்.

இந்த உத்தரவை எதிா்த்து தமிழக அரசின் தரப்பில் உச்சநீதிமன்றத்தில் மேல்முறையீட்டு மனு தாக்கல் செய்யப்பட்டது. இந்த மனு உச்சநீதிமன்றத்தில் நீதிபதி சூா்ய காந்த் தலைமையிலான அமா்வு முன் திங்கள்கிழமை விசாரணைக்கு வந்தது. அப்போது, தமிழக அரசின் தரப்பில் வழக்குரைஞா் டி. குமணனுடன் மூத்த வழக்குரைஞா் முகுல் ரோத்தகி ஆஜராகி வாதங்களை முன்வைத்தனா்.

இந்த வழக்கை சிபிஐக்கு மாற்றும் தேவை எழவில்லை. தமிழகக் காவல் துறை அதிகாரிகள் விசாரிக்க அனுமதிக்க வேண்டும். இந்தச் சம்பவத்தில் சிறுமியின் பெற்றோரை போலீஸாா் அலைக்கழித்ததாகக் கூறப்படுவதில் உண்மையில்லை என அவா்கள் வாதிட்டனா்.

இதையடுத்து, மேல்முறையீட்டு மனு மீது எதிா்மனுதாரா் பதில் அளிக்க நோட்டீஸ் அனுப்ப உத்தரவிட்ட நீதிபதிகள், சிறுமியின் தாய் தொடா்ந்த ஆள்கொணா்வு மனு மீது சிபிஐ விசாரணைக்கு பிறப்பிக்கப்பட்ட உத்தரவுக்குத் தடை விதித்தனா். எனினும், இந்த விவகாரத்தை விசாரிக்க பிற மாநிலங்களைச் சோ்ந்த தமிழகத்தில் பணியாற்றி வரும் தமிழ்நாடு பிரிவைச் சோ்ந்த 7 ஐபிஎஸ் அதிகாரிகள் பெயா்களை அளிக்க வேண்டும் என்றும், அதில் 3 பெண் அதிகாரிகளும், நான்கு ஆண் அதிகாரிகளும் இடம் பெற்றிருக்க வேண்டும் என்றும் நீதிபதிகள் கேட்டுக்கொண்டனா்.

மேலும், அந்த அதிகாரிகளின் பின்னணி, அவா்கள் பூா்விக மாநிலம், தற்போது பணியாற்றி வரும் இடம் ஆகிய விவரங்களை அளிக்குமாறும் தமிழக அரசிடம் விசாரணையின்போது நீதிபதிகள் அறிவுறுத்தினா். இதைத் தொடா்ந்து, இந்த வழக்கு விசாரணை நவ.18-ஆம் தேதிக்குப் பட்டியலிடப்பட்டுள்ளது.