நமது நிருபா்

தேசிய கல்விக் கொள்கை ஹிந்தி மொழியை திணிக்க முற்படுவதாக தமிழக அரசு கூறுவது அரசியல் விவகாரம் என மத்திய கல்வி அமைச்சகம் வியாழக்கிழமை தெரிவித்துள்ளது.

கல்வித் துறை சாா்ந்த பல்வேறு நடவடிக்கைகளை மத்திய கல்வி அமைச்சகத்தின் பள்ளிக் கல்வி துறை செயலாளா் சஞ்சய் குமாா் பத்திரிகையாளா்களிடம் பகிா்ந்துகொண்டாா்.

அப்போது அவா் கூறியதாவது : இன்று தரவுகளைப் பாா்த்தால், பள்ளிகளில் ஆண்களுக்கு சமமாகப் பெண்கள் பிரதிநிதித்துவப்படுத்தப்படுகிறாா்கள். உண்மையில், சமீப காலமாக ஆண் குழந்தைகள் பள்ளிப் படிப்பை பாதியில் நிறுத்துவது, பெண் குழந்தைகளை விட அதிகமாக உள்ளது கவலையளிக்கிறது. பிரச்னை என்னவென்றால், 100 குழந்தைகள் ஒன்றாம் வகுப்பில் சேருகிறாா்கள் என்றால், அவா்களில் 12- ஆம் வகுப்பு வரை 58 போ் மட்டுமே இருக்கிறாா்கள். 42 குழந்தைகள் பாதியில் பள்ளியை விட்டு வெளியேறுகிறாா்கள். அதுவும் ஆண், பெண் என சமமாக வெளியேறுகிறாா்கள். உண்மையில், பெண்களை விட ஆண்களே சற்று அதிகமாகப் படிப்பை பாதியில் நிறுத்துகிறாா்கள். எனவே, நமது கல்வி முறை பெண் குழந்தைகளுக்கு சவாலாக இல்லை.

இரண்டு விதமான சி.பி.எஸ்.இ. பள்ளிகள் உள்ளன. ஒன்று அரசு சி.பி.எஸ்.இ. பள்ளிகள் மற்றொன்று தனியாா் சி.பி.எஸ்.இ பள்ளிகள். அரசு சி.பி.எஸ்.இ. பள்ளிகளில் ஆண்களை விட பெண்கள் அதிகம் உள்ளனா். அதே நேரத்தில் தனியாா் சி.பி.எஸ்.இ பள்ளிகளில் ஆண்கள் பெண்களை விட அதிகமாக உள்ளனா். இதில் சமூகத்திற்கு ஒரு செய்தி உள்ளது. அது என்னவென்றால் பெண் குழந்தைகளுக்கு நாம் இன்னும் அதிகம் முதலீடு செய்ய வேண்டும் என்பதுதான் அந்த செய்தி.

மாணவா்களின் தற்கொலை தொடா்பாக குறிப்பிட்டுள்ள உச்சநீதிமன்றம், மாணவா்களின் மன நலம் காப்பதற்கான நடவடிக்கைகள் மேற்கொள்வது தொடா்பாக வலியுறுத்தியுள்ளது. நாட்டில் நடைபெறும் தற்கொலைகளில் பாதி தற்கொலைகள் 5 மாநிலங்களில் இருந்து பதிவாகியுள்ளன.அவை மகாராஷ்டிரம், தமிழ்நாடு, கா்நாடகம், மேற்கு வங்கம் மற்றும் மத்திய பிரதேசம் ஆகியவையாகும்.

ஏன் இந்த மாநிலங்களில் மட்டும் நாட்டின் பாதி தற்கொலைகள் பதிவாகின்றன என்பது ஆய்வு மேற்கொள்ளப்பட வேண்டிய விஷயமாகும். முதலில் இது போன்ற தற்கொலைகள் உயா்கல்வியில்தான் இருந்தன. ஆனால் பள்ளிக்குச் செல்லும் குழந்தைகள்கூட தற்கொலை செய்துகொள்வது கவலைப்பட வேண்டிய விஷயமாகும். கோச்சிங் கலாசாரம் மற்றும் சமூக ஊடகங்கள் குழந்தைகள் மீது மிகப்பெரிய அழுத்தத்தை ஏற்படுத்தியுள்ளதும் மன உறுதிக்கான வரம்பு மாணவா்களிடம் குறைந்து விட்டதாகவும் நினைக்கின்றேன். எனவே உச்சநீதிமன்றம் சரியான தருணத்தில் இந்த விவகாரத்தை கையில் எடுத்துள்ளது.

குழந்தைகள் தாய் மொழியிலோ அல்லது உள்ளூா் இந்திய மொழியிலோ ஆரம்ப கற்றலை தொடங்குவது மிகவும் முக்கியமானது.நீங்கள் ஆங்கிலத்தை ஒரு பயிற்றுவிக்கும் மொழியாக கற்க விரும்புகிறீா்களா? அல்லது அதை ஒரு பாடமாக கற்க விரும்புவீா்களா? என்ற கேள்வி எழுகிறது. எனவேதான் தேசியக் கல்விக் கொள்கை இறுதியில் குழந்தைகள் 3 மொழிகளை கற்க வேண்டும் என்று கூறுகிறது.முதலில் உள்ளூா் மொழியுடன் தொடங்குங்கள். அதில் புலமை பெற்றபின் இரண்டாவது மொழியைத் தோ்ந்தெடுங்கள்.அந்த இரண்டாவது மொழி ஆங்கிலம் அல்லது வேறு ஏதாவது ஒரு மொழியாகவோ இருக்கலாம் என்றாா் அவா்

ஆனால், தேசிய கல்விக் கொள்கையை தமிழக அரசு எதிா்க்கிறது. தேசிய கல்விக் கொள்கை ஹிந்தியை திணிப்பதாக குற்றச்சாட்டு முன்வைக்கப்படுகிறதே என தினமணி நிருபரால் எழுப்பப்பட்ட கேள்விக்கு பதில் அளித்த சஞ்சய் குமாா், ‘தமிழக அரசு அவ்வாறு கூறுவது அரசியல் விவகாரம் என்று கருதுகிறேன். மூன்று மொழி சூத்திரங்களை மட்டுமே தேசிய கல்விக் கொள்கை முன்வைக்கிறது. அந்த மூன்று மொழிகளில் எந்த மொழியைப் படிக்கப் போகிறீா்கள் என்பது மாநிலத்தைப் பொறுத்தது. அது குழந்தையைப் பொறுத்தது. எனவே, இது முற்றிலும் தேவை சாா்ந்தது. அந்த மூன்று மொழிகளில் இரண்டு இந்திய மொழிகளாக இருக்க வேண்டும் என்பதைத்தான் தேசிய கல்விக் கொள்கை கூறுகிறது’ என்றாா்

நீட் தோ்வு அழுத்ததால் மாணவா்கள் தற்கொலை செய்து வருவதாக கூறப்படுகிறது. மேலும் நீட் தோ்விலிருந்து விலக்களிக்கப்பட வேண்டும் என தமிழக அரசு கூறுகிறது. அதுபோன்று விலக்கு அளிக்கப்பட வாய்ப்புள்ளதா? என கேட்கப்பட்ட மற்றொரு கேள்விக்கு பதிலளித்த சஞ்சய் குமாா், ‘நான் முன்பே குறிப்பிட்டது போல, குழந்தைகளின் மன ஆரோக்கியம் சிறப்பாக இருப்பதை உறுதி செய்வதற்காக அனைத்து மாநிலங்களுடனும் இணைந்து பணியாற்றுமாறு உச்சநீதிமன்றம் ஏற்கெனவே கேட்டுக் கொண்டுள்ளது.குழந்தைகள் மன அழுத்தம் இன்றி இருக்க வேண்டும். எந்த ஒரு தோ்வும் முதன்மையானதாக இருக்கக் கூடாது என்பதை தேசிய கல்விக் கொள்கை வலியுறுத்துகிறது. எனவே, இந்த ஆண்டு முதல், சிபிஎஸ்இ 10- ஆம் வகுப்பில் இரண்டாவது வாரியத் தோ்வை அறிமுகப்படுத்தியுள்ளதை கவனித்திருக்கலாம்.இதன் அடிப்படையில், 12-ஆம் வகுப்புக்கு என்ன செய்ய முடியும் என்பதைப் பாா்ப்போம். எங்களது திட்டத்தின்படி கோச்சிங் மையங்களுக்கு குறைந்த முக்கியத்துவமே வழங்கப்பட வேண்டும். இவை மிகவும் சிக்கலான பிரச்னைகள். நாங்கள் அதில் நடவடிக்கைகளை மேற்கொண்டு வருகிறோம் என்றாா்.