சந்திரன் உங்கள் இராசியில் இருந்தால் என்ன பலன்?

ஒருவருடைய இராசியில் சந்திரன் இருக்கும் போது பிறந்தவர்கள் அல்லது ராசியில் சந்திரன் வரும் போது அவரின் குண நலன்கள் எப்படி இருக்கும்? என்ன பலன்கள் ஏற்படும் என்பதைத் தெரிந்துகொள்வோம். 

• மேஷ ராசியில் சந்திரன் இருக்கும்போது பிறந்த ஜாதகர் மிகவும் தைரியசாலியாகவும், புத்திசாலியாகவும் திகழ்வர். இவர்கள் எப்போதும் சுறுசுறுப்புடன் செயல்படும் ஆற்றல் கொண்டவர்கள். இவர்கள் பெண்மையை மதிக்கும் குணம் கொண்டவர்களாக இருப்பர். எடுத்த காரியத்தில் போராடி வெல்லும் குணம் கொண்டவர்கள்.

• ரிஷப ராசியில் சந்திரன் இருந்தால் நல்ல உடல் அமைப்பு, மகிழ்ச்சியான வாழ்க்கை மற்றும் நல்ல திறமை உடையவர்கள். இவர்களுக்கு வாழ்வில் மத்திய வயதிலும், வாழ்வின் முடிவுப் பகுதியிலும் அபரிதமான செல்வம் பெருகும். இவர்களுடைய மனம் எப்போதும் அலைபாய்ந்தபடியே காணப்படும். 

• மிதுன ராசியில் சந்திரன் இருக்கும்போது பிறந்த ஜாதகர் நல்ல கல்வியறிவு உடையவராக இருப்பர். நீண்ட ஆயுள், நிம்மதியான வாழ்வு, ஆன்மிக ஈடுபாடு, இசைத்துறையில் வல்லமை மற்றும் எப்போதும் இளமைத் தோற்றத்துடன் காணப்படுவர். இவர்கள் வாழ்வில் அதிக கஷ்டங்களை சந்திக்க மாட்டார்கள். 

• கடக ராசியில் சந்திரன் ஆட்சி பெற்றிருக்கும்போது பிறந்த ஜாதகர் மற்றவர்களிடம் மிகவும் இரக்கமாக நடந்து கொள்வர். பெண்களால் மிகவும் அனுகூல பலன் அடைவர். வீடு, வாகனம், பூமி வாங்கும் யோகம் உண்டு. கடல் கடந்து அந்நிய நாட்டிற்குச் செல்லும் யோகம் கொண்டவர்கள்.

• சிம்ம ராசியில் சந்திரன் இருக்கும்போது பிறந்த ஜாதகருக்கு மிகுந்த தைரியம் உடையவராக இருப்பர். வயிறு தொடர்பான கோளாறு உண்டாக்க வாய்ப்புள்ளது. சில சமயத்தில் மற்றவர்களுக்கு வெறுப்பு ஏற்படும் அளவிற்கு நடந்துகொள்வர். வாழ்க்கை போராட்டம் நிறைந்ததாக அமையும். தற்பெருமை கொண்டவர்களாக இருப்பர்.

• கன்னி ராசியில் சந்திரன் இருந்தால் அந்த ஜாதகர் செல்வந்தராக திகழ்வர். செல்வம், செல்வாக்கு, பெருமை, புகழ் யாவும் தேடி வரும். உண்மை உள்ளவராகவும், ஒழுக்கம் உள்ளவராகவும் திகழ்வர். கலைத்துறையில் நாட்டம் இருக்கும். இவர்களுக்கு ஆண் குழந்தைகளைவிட பெண் குழந்தைகளே அதிகமாக இருக்கும்.

• சந்திர பகவான் துலா ராசியில் இருக்கும் போது பிறந்தவர்கள் எப்போதும் வியாபார நோக்கம் உடையவர்களாகவே இருப்பர். இவர்களுக்கு ஆரோக்கியம் நன்றாக இருக்காது. ஆனால் மிகச்சிறந்த திறமைசாலிகள். எப்படியாவது வாழ்க்கையில் மேன்மையடைய வேண்டும் என்ற நோக்கத்துடன் செயல்படுவர். பார்வைக்கு மிகவும் வசீகரமாக இருப்பர். 

• விருச்சிக ராசியில் சந்திரன் சஞ்சரிக்கும்போது பிறந்தவர்கள் செல்வம் படைத்தவர்களாக திகழ்வர். இவர்களுடைய எண்ணங்கள் மற்றும் செயல்கள் கொடூரம் நிறைந்ததாக இருக்கும். இவர்கள் பெற்றோர்களைப் பிரிந்து தனிக்குடித்தனமாக இருப்பார்கள்.

• சந்திரன் தனுசு ராசியில் இருக்கும்போது பிறந்த ஜாதகர்கள் மகிழ்ச்சியான குடும்ப வாழ்க்கையைப் பெறுவார்கள். இவர்களுக்கு அசையாத சொத்துகள் அதிகம் சேரும். கலைத்துறையில் வல்லவராக திகழ்வர். இலக்கியம், கலைகளில் மிகுந்த ஆர்வம் கொண்டவர்களாக இருப்பர்.

• மகர ராசியில் சந்திரன் சஞ்சரிக்கும்போது பிறந்த ஜாதகர் மனைவி, குழந்தைகளிடம் அன்பு கொண்டவர்களாக இருப்பர். குடும்ப வாழ்வு திருப்திகரமாக இருக்கும். இவர்கள் சுயநலவாதியாகவும், சோம்பேறியாகவும் இருப்பர். சிறந்த நீதிமானாகவும் ஒழுக்கமானவராகவும் திகழ்வர்.

• கும்ப ராசியில் சந்திரன் இருக்கும் போது பிறந்தவர்கள் நல்ல உயரம், சிறந்த உடல் அமைப்பு, மேன்மையான கல்வி, ஆன்மிக ஈடுபாடு இருக்கும். வாழ்வின் பிற்பகுதியில் உயர்ந்த அமைப்பை பெரும் யோகம் யாவும் உண்டாகும். 

• சந்திரன் மீன ராசியில் இருக்க பிறந்தவர்கள் மிகவும் வல்லவர்களாகத் திகழ்வர். உறுதியான மனம் படைத்தவர்களாக இருப்பர். இவர்களுக்கு ஆடை அணிகலன்கள் அபரிதமாக இருக்கும். கடல் மற்றும் நீர் தொடர்புள்ள வியாபாரம் பெறும் அமைப்பை உடையவர்கள்.