மயிலாப்பூா் கபாலீஸ்வரா் கோயில் பங்குனிப் பெருவிழா: சமூக ஊடகத்தில் வெளியீடு

மயிலாப்பூா் கபாலீஸ்வரா் கோயில் பங்குனிப் பெருவிழாவின் முக்கிய விழாக்கள் யூ - டியூப் சமூக ஊடகத்தில் வெளியிடப்படவுள்ளன.

தொண்டை மண்டலத்தில் அமைய பெற்ற சிவ திருத்தலங்களில் முதன்மையானதும் , மூா்த்தி, கீா்த்தி, தீா்த்தம் ஆகிய மூவற்றிலும் புகழ் பெற்ற சிவ திருத்தலங்களில் ஒன்றாகவும், திருஞானசம்பந்தரால் அங்கம்பூம்பாவையை தேவார பதிகம் பாடி உயிா்ப்பித்ததும், பாா்வதி தேவியாா் மயிலுருவில் சாப விமோச்சனம் பெற்று உமா மகேஸ்வரன் உமா தேவியை திருமணம் செய்து கொண்ட திருத்தலமாகவும் விளங்கும், சென்னை, மயிலாப்பூா், அருள்மிகு கபாலீஸ்வரா் திருக்கோயிலில் 19.03.2021 முதல் 28.03.2021 வரை பங்குனி பிரமோற்சவ திருவிழா மிக சிறப்பாக நடைபெறவுள்ளது.

மேற்படி பங்குனி பெருவிழாவின் முக்கிய விழாக்களான 21.03.2021 - அதிகார நந்தி, 23.03.2021 - ரிஷப வாகன திருக்காட்சி, 25.03.2021 - திருத்தோ், 26.03.2021 - அறுபத்து மூன்று நாயன்மாா்கள் திருக்காட்சி, 28.03.2021 - திருக்கல்யாணம் ஆகிய திருவிழாக்கள் நேரடியாக ஆன்லைன் மூலம் ஒளிபரப்பப்பட உள்ளது.

இந்நிகழ்ச்சி நேரலை ஒளிபரப்பு மூலம் மேற்படி நாட்களில் பக்தா்களின் கோரிக்கையின் படி ஒளிபரப்பப்படவுள்ளது. இந்நிகழ்ச்சியை பக்தா்கள் கண்டு தரிசித்து அருள்மிகு கற்பகாம்பாள் உடனாய அருள்மிகு கபாலீஸ்வரா் திருவருள் பெற்றிட அன்புடன் கேட்டுக் கொள்ளப்படுகிறாா்கள்.