நியூயார்க்கில் இந்த ஆண்டு நவம்பர் மாதம், சதுரங்க உலகக்கோப்பை இறுதிப்போட்டி நடைபெறவுள்ளது. இப்போட்டியில் நடப்புச் சாம்பியன் மேக்னஸ் கார்ல்ஸனுடன் மோதுவதற்குத் தகுதியான வீரரைத் தேர்வு செய்வதற்கான உலக கேண்டிடேட்ஸ் சதுரங்கப் போட்டி மாஸ்கோவில் நேற்று தொடங்கியது.

முதல் போட்டியில் இந்தியாவின் விஸ்வநாதன் ஆனந்த், பல்கேரியாவின் டாபலோவுடன் வெள்ளை நிறக் காய்களுடன் மோதினார்.

டாபலோவ், ரய்லோபஸ் பெர்லின் டிபென்ஸ் முறையில் ஆனந்தை எதிர்கொண்டார். ஆனந்த் தொடக்கம் முதலே தனது சிப்பாய்களை முன்னெடுத்துச் செல்லும் நுட்பத்துடன் அதிரடியாகவே ஆடினார். ஆட்டத்தில் இருபதாவது நகர்த்தலின்போது டாபலோப் செய்த தவறு காரணமாக, ஆனந்தின் ஆட்டம் வலிமை பெற்றது.

டாபலோவ் தனது 20 நகர்த்தலின்போது 20….Bxf2!  21.Kxf2 Qh4, 22.g3 Ne4+ என்று ஆட்டத்தைத் தொடர்ந்திருந்தால், ஆனந்துக்குச் சிக்கல் இருந்திருக்கும். ஆனால் தனது 20-வது நகர்த்தலின்போது 20….Nb3?   என்று விளையாடியதால், ஆனந்த் வெற்றிகரமாக ஆட்டத்தைத் தொடர முடிந்தது என்று அமெரிக்காவின் கிராண்ட் மாஸ்டர் சாம்வேல் சாக்லண்ட் குறிப்பிட்டுள்ளார்.

இறுதிக் கட்டத்தில், வழக்கமான தனது மேட்டிங் அச்சுறுத்தல் நுட்பத்தைப் பயன்படுத்தி, டாபலோவை ஆனந்த் நிலை குலைய வைத்தார். தனது யானையைத் தியாகம் செய்து, ஆனந்தின் அச்சுறுத்தலில் இருந்து தப்பிக்க நினைத்த டாபலோவின் நகர்த்தல்கள் பயனற்றுப் போகவே, தனது 49-வது நகர்த்தலின்போது தனது தோல்வியை ஒப்புக்கொண்டார்.

இன்றைய இரண்டாவது சுற்றில், அர்மீனியா நாட்டைச் சார்ந்த கிராண்ட் மாஸ்டர் ஆரோனியனுடன், கருப்புக் காய்களுடன் ஆனந்த் மோதுகிறார்.

கேண்டிடேட்ஸ் போட்டியின் முதல் ஆட்டத்தில் வெற்றியுடன் ஆனந்த் தொடங்கியுள்ளதால், இந்திய சதுரங்க ரசிகர்கள் அதிக எதிர்பார்ப்புடன் உள்ளனர்.

ஆனந்தும் டாபலோவும் மோதிய ஆட்டக் குறிப்புகளின் விவரம் பின்வருமாறு -

- சி. சரவணன் (9976252800)