உக்ரைன் தலைநகர் லிவி நகரில் உலக செஸ் சங்கம் சார்பாக மகளிர் உலக செஸ் சாம்பியன்ஷிப் போட்டி மார்ச் 1-ம் தேதி முதல் தொடர்ந்து நடைபெற்று வந்தது.

உக்ரைன் நாட்டைச் சார்ந்த நடப்பு மகளிர் உலக சாம்பியன் மரியா முஸ்சக் மற்றும் சீனாவின் ஹியூ இபான் ஆகியோருக்கு இடையே இறுதிப் போட்டி விறுவிறுப்பாக நடந்து வந்தது.

விதிமுறைகளின்படி, இருவருக்கும் மொத்தம் 10 போட்டிகள் நடத்தப்படும். 5.5 அல்லது அதற்கு மேற்பட்ட வெற்றிப் புள்ளிகளை முதலில் எடுப்பவர் வெற்றியாளராக அறிவிக்கப்படுவார்.

முதல் 8 ஆட்டங்களின் முடிவில் 2-வது மற்றும் 6-வது போட்டிகளில் வெற்றி பெற்று 5க்கு 3 என்ற கணக்கில் சீனா வீராங்கனை முன்னிலை பெற்று விளங்கினார். நேற்று நடந்த 9-வது போட்டியில் வெள்ளை நிறக் காய்களுடன் விளையாடிய ஹியூ, மரியாவை தோற்கடித்தார். 46-வது நகர்த்தலின்போது a file சிப்பாயின் முன்னேற்றத்தைத் தடுக்க முடியாது என்பதை உணர்ந்த முஸ்சக் தனது தோல்வியை ஒப்புக்கொண்டார்.

ஒரு போட்டி மீதம் இருக்கும் நிலையிலேயே 6-3 என்கிற புள்ளிக் கணக்கில் வெற்றி பெற்றதால் நடப்பு சாம்பியனிடமிருந்து பட்டத்தைப் பறித்துவிட்டார் சீனாவின் ஹியூ.

இவர் ஏற்கெனவே தனது 16-வது வயதில் 2010ல் மகளிர் உலகக் கோப்பையை வென்று சாதனை படைத்தவர். 2013 மகளிர் உலகக் கோப்பையையும் வென்றிருக்கும் இவர், 3ஆவது முறையாக உலகக் கோப்பையை வென்று சரித்திரம் படைத்துள்ளார்.