சையத் முஷ்டாக் அணி தொடரில் மணிப்பூர் அணிக்கு எதிரான போட்டியில் தில்லி அணி புதிய சாதனை படைத்துள்ளது.

மணிப்பூர் - தில்லி அணிகள் மோதிய போட்டி மும்பையின் வான்கடே மைதானத்தில் நடைபெற்றது. இந்தப் போட்டியில் முதலில் டாஸ் வென்ற மணிப்பூர் கேப்டன் ரெக்ஸ் ராஜ்குமார் பேட்டிங் செய்வதாக அறிவித்தார்.

அதன்படி முதலில் களமிறங்கிய மணிப்பூர் அணியால் நிர்ணயிக்கப்பட்ட 20 ஓவர்களில் 8 விக்கெட் இழப்புக்கு 120 ரன்கள் மட்டுமே எடுக்க முடிந்தது. அந்த அணியில் அதிகபட்சமாக விக்கெட் கீப்பர் அகமது ஷா 32 ரன்கள் எடுத்தார்.

தில்லி அணி தரப்பில் ஹர்ஷ் தியாகி, திக்வேஷ் ரதி இருவரும் தலா 2 விக்கெட்டுகள் வீழ்த்தினர்.

120 ரன்கள் எடுத்தால் வெற்றி என்ற எளிய இலக்குடன் களமிறங்கிய தில்லி அணி 18.3 ஓவர்களில் 6 விக்கெட்டுகள் இழப்புக்கு 124 ரன்கள் எடுத்து 4 விக்கெட்டுகள் வித்தியாசத்தில் வெற்றியைப் பதிவு செய்தது. தில்லி அணியில் யாஷ் துல் 58 ரன்கள் விளாசினார். அதில், 8 பவுண்டரி, ஒரு சிக்ஸர் அடங்கும்.

இந்தப் போட்டியில் தில்லி அணி சுவாரசியாமான சாதனை ஒன்று படைத்துள்ளது. தில்லி அணியில் உள்ள 11 பேரும் பந்து வீசி புதிய சாதனை ஒன்றை படைத்துள்ளனர். வழக்கமாக அணியில் 9 பேர் பந்துவீசுவார்கள். ஆனால், தில்லி அணியில் கேப்டனும், விக்கெட் கீப்பருமான ஆயுஸ் பதோனி உள்பட அணியில் உள்ள அனைவரும் கட்டுக்கோப்பாக பந்து வீசி அசத்தினர்.

2 ஓவர்கள் பந்துவீசிய ஆயுஷ் பதோனி முதல் ஓவரில் 1 விக்கெட் வீழ்த்திய நிலையில் இரண்டாவது ஓவரை மெய்டானாக்கி அசத்தினார்.

இதற்கு முன்னதாக, 2002 ஆம் ஆண்டு கங்குலி தலைமையிலான இந்திய அணியில் மேற்கிந்திய தீவுகள் அணிக்கு எதிரான போட்டியில் 10 வீரர்களுக்கும் பந்துவீசியிருந்தது குறிப்பிடத்தக்கது.