அயர்லாந்துக்கு எதிரான ஒருநாள் தொடரில் இந்திய அணிக்கு சிறப்பான தொடக்கம் கிடைத்துள்ளதாக இந்திய வீராங்கனை பிரதீகா ராவல் தெரிவித்துள்ளார்.

இந்தியா மற்றும் அயர்லாந்து அணிகளுக்கு இடையிலான முதல் ஒருநாள் போட்டி ராஜ்காட்டில் உள்ள சௌராஷ்டிரா கிரிக்கெட் மைதானத்தில் இன்று நடைபெற்றது. இந்தப் போட்டியில் இந்திய அணி 6 விக்கெட்டுகள் வித்தியாசத்தில் வெற்றி பெற்றது.

இந்தப் போட்டியில் சிறப்பான ஆட்டத்தை வெளிப்படுத்திய பிரதீகா ராவல் 96 பந்துகளில் 89 ரன்கள் எடுத்து ஆட்டமிழந்தார். அதில் 10 பவுண்டரிகள் மற்றும் ஒரு சிக்ஸர் அடங்கும். சிறப்பான ஆட்டத்தை வெளிப்படுத்திய அவருக்கு ஆட்ட நாயகி விருது வழங்கப்பட்டது.

இதையும் படிக்க: ஒருநாள் போட்டிகளில் ஸ்மிருதி மந்தனா புதிய சாதனை!

நல்ல தொடக்கம்

அயர்லாந்துக்கு எதிரான முதல் ஒருநாள் போட்டியில் வெற்றி பெற்ற நிலையில், இந்திய அணிக்கு நல்ல தொடக்கம் கிடைத்துள்ளதாக பிரதீகா ராவல் தெரிவித்துள்ளார்.

இது தொடர்பாக அவர் பேசியதாவது: இன்றையப் போட்டியில் நான் மிகவும் சிரமமின்றி விளையாடினேன். கேப்டன் ஸ்மிருதி மந்தனா என்னுடன் களத்தில் இருந்தது மிகுந்த உதவியாக இருந்தது. அவர் விளையாடுவதை மறுமுனையில் இருந்து ரசித்து பார்த்துக் கொண்டிருந்தேன். அவர் சிறப்பாக விளையாடியது என் மீது அழுத்தம் ஏற்படாமல் இருக்க உதவியது. எங்களுக்கு நல்ல தொடக்கம் கிடைத்துள்ளது. அதனை அப்படியே அடுத்த போட்டிகளுக்கும் எடுத்துச் செல்ல வேண்டும். ஆட்டத்தின் இறுதியில் தேஜல் நன்றாக விளையாடினார். ஒவ்வொரு போட்டியிலும் என்னுடைய சிறப்பான ஆட்டத்தை வெளிப்படுத்த முயற்சி செய்கிறேன் என்றார்.

இதையும் படிக்க: சாம் கான்ஸ்டாஸுக்கு சிறந்த எதிர்காலம் காத்திருக்கிறது: ஆஸி. மூத்த வீரர்

இந்தியா மற்றும் அயர்லாந்து அணிகளுக்கு இடையிலான இரண்டாவது ஒருநாள் போட்டி நாளை மறுநாள் (ஜனவரி 12) நடைபெறவுள்ளது குறிப்பிடத்தக்கது.