தமிழக வீரர் ஜெகதீசனை ஹைதராபாத்துக்கு எதிரான ஆட்டத்தில் சேர்க்காதது குறித்து சிஎஸ்கே கேப்டன் தோனி விளக்கம் அளித்துள்ளார்.

சன்ரைசர்ஸ் ஹைதராபாத் அணிக்கு எதிரான ஆட்டத்தில் சென்னை சூப்பர் கிங்ஸ் 20 ரன்கள் வித்தியாசத்தில் வென்றது. சென்னைக்கு இது 3-வது வெற்றி. ஹைதராபாத்துக்கு 5-வது தோல்வி. 

துபையில் செவ்வாய்க்கிழமை நடைபெற்ற இந்த 29-ஆவது ஆட்டத்தில் முதலில் பேட் செய்த சென்னை 20 ஓவர்களில் 6 விக்கெட் இழப்புக்கு 167 ரன்கள் எடுத்தது. அடுத்து ஆடிய ஹைதராபாத் 20 ஓவர்களில் 8 விக்கெட் இழப்புக்கு 147 ரன்களே அடித்தது. சென்னை வீரர் ஜடேஜா ஆட்டநாயகன் ஆனார். 

இந்த வெற்றியின் மூலம் புள்ளிகள் பட்டியலில் சிஎஸ்கே அணி 6-ம் இடத்துக்கு முன்னேறியுள்ளது.

இந்நிலையில் இந்த ஆட்டத்தில் தமிழக வீரரான ஜெகதீசன் விளையாடவில்லை. கடந்த ஆட்டத்தில் அவர் சிறப்பாக விளையாடிய பிறகும் அணியில் இல்லாதது ரசிகர்களிடையே குழப்பத்தை ஏற்படுத்தியது. அவருக்குப் பதிலாக பியூஷ் சாவ்லா தேர்வானார். இதுபற்றி தோனி கூறியதாவது:

ஒரு இந்திய பேட்ஸ்மேன் சரியாக விளையாடவில்லை என்பதால் கூடுதலாக ஒரு சுழற்பந்து வீச்சாளரைத் தேர்வு செய்தோம். அதனால் தான் தொடக்க வீரராக சாம் கரண் விளையாடினார். ஜெகதீசனை 7-ம், 8-ம் நிலை வீரராக விளையாடும்படி சொல்வது நியாயமாக இருக்காது. இந்த வெற்றியின்மூலம் நாங்கள் இரு புள்ளிகளைப் பெற்றுள்ளோம். எங்களுடைய பேட்ஸ்மேன்கள் சிறப்பாக விளையாடினார்கள். ஒரு குறிக்கோளுடன் விளையாடி ரன்கள் எடுத்தார்கள். சூழலை நன்குப் புரிந்துகொண்டார்கள் என்றார்.