பஞ்சாப் கிங்ஸுக்கு எதிரான ஆட்டத்தில் முதலில் பேட் செய்த குஜராத் டைட்டன்ஸ் நிர்ணயிக்கப்பட்ட 20 ஓவர்களில் 8 விக்கெட் இழப்புக்கு 143 ரன்கள் எடுத்துள்ளது.

ஐபிஎல்-இன் இன்றைய (செவ்வாய்க்கிழமை) லீக் ஆட்டத்தில் குஜராத் டைட்டன்ஸ், பஞ்சாப் கிங்ஸ் அணிகள் விளையாடி வருகின்றன. டாஸ் வென்ற குஜராத் டைட்டன்ஸ் கேப்டன் ஹார்திக் பாண்டியா முதலில் பேட்டிங்கை தேர்வு செய்தார்.

தொடக்க ஆட்டக்காரர் ஷுப்மன் கில் 9 ரன்களுக்கு ரன் அவுட் ஆனார். இதன்பிறகு, தமிழ்நாட்டைச் சேர்ந்த 20 வயது சாய் சுதர்சன் களமிறங்கினார். தொடக்கத்தில் ரன் குவிக்க சற்று தடுமாறினார். ரித்திமான் சஹா சற்று பவுண்டரி அடித்தது சுதர்சனுக்கு உதவியது.

இதையும் படிக்க | ஐபிஎல் பிளே-ஆஃப் நடைபெறுவது எங்கு? ஜெய் ஷா தகவல்

இதன்பிறகு, சஹா 17 பந்துகளில் 21 ரன்களுக்கு ஆட்டமிழந்தார். அடுத்து வந்த வீரர்கள் திணறல் ஆட்டத்தை வெளிப்படுத்தி பெவிலியனுக்கு திரும்பினர். ஹார்திக் பாண்டியா (1), டேவிட் மில்லர் (11), ராகுல் தெவாட்டியா (11) ஆகியோர் சொற்ப ரன்களில் வெளியேறியதால் கடைசி நேரத்தில் அதிரடி காட்டுவதற்கு ஆள் இல்லாமல் குஜராத் திணறியது.

மறுமுனையில் நிலைத்து நின்று விளையாடி வந்த சாய் சுதர்சன், அர்ஷ்தீப் சிங் வீசிய 18-வது ஓவரில் சிக்ஸரை பறக்கவிட்டு 42-வது பந்தில் அரைசதத்தை எட்டினார். கடைசி நேரத்தில் அவர் காட்டிய சற்று அதிரடியே குஜராத்தை 140 ரன்களைத் தாண்டச் செய்தது.

நிர்ணயிக்கப்பட்ட 20 ஓவர்களில் குஜராத் அணி 8 விக்கெட் இழப்புக்கு 143 ரன்கள் எடுத்துள்ளது.

இறுதிவரை ஆட்டமிழக்காமல் இருந்த சுதர்சன் 50 பந்துகளில் 65 ரன்கள் எடுத்தார்.