8 ஐபிஎல் அணிகளுக்கும் வாய்ப்புகள்: பிளேஆஃப் சாத்தியக்கூறுகள் என்னென்ன?
பிளேஆஃப் செல்ல 8 அணிகளுக்கும் வாய்ப்புள்ளது என்பதுதான் ஆச்சர்யத் தகவல்...
ஸ்பெஷல்8 ஐபிஎல் அணிகளுக்கும் வாய்ப்புகள்: பிளேஆஃப் சாத்தியக்கூறுகள் என்னென்ன?
பிளேஆஃப் செல்ல 8 அணிகளுக்கும் வாய்ப்புள்ளது என்பதுதான் ஆச்சர்யத் தகவல்...
நேற்றைய ஐபிஎல் ஆட்டத்தில் ராஜஸ்தானை தில்லி தோற்கடித்ததால் சுவாரசியமான நிலைக்குச் சென்றுள்ளன பிளேஆஃப் வாய்ப்புகள்.
தில்லி அணி புள்ளிகள் பட்டியலில் மெல்ல மெல்ல மேலேறி வருகிறது. இந்த வெற்றியின் மூலம் தில்லி அணி 6-வது இடத்துக்கு முன்னேறியுள்ளது. ராஜஸ்தான் அணி 7-வது இடத்துக்கும், மும்பை அணி கடைசி இடத்துக்கும் தள்ளப்பட்டுள்ளன.
பஞ்சாப் தவிர அனைத்து அணிகளும் குறைந்தது 8 ஆட்டங்கள் விளையாடியுள்ளன. பஞ்சாப் 7 ஆட்டங்களிலும் தில்லி அதிகபட்சமாக 9 ஆட்டங்களிலும் விளையாடியுள்ளன. இதர அணிகள் தலா 8 ஆட்டங்கள் விளையாடியுள்ளன.
இதுவரை பிளேஆஃப் செல்ல 8 அணிகளுக்கும் வாய்ப்புள்ளது என்பதுதான் ஆச்சர்யத் தகவல். இதனால் பிளேஆஃப்-புக்குத் தகுதி பெற எட்டு அணிகளுடம் முனைப்புடன் உள்ளன. தில்லி அணியின் நேற்றைய ஆட்டம் ஓர் உதாரணம்.
ஐபிஎல் 2018 - புள்ளிகள் பட்டியல்
| வரிசை எண் | அணிகள் | ஆட்டங்கள் | வெற்றிகள் | தோல்விகள் | புள்ளிகள் | நெட் ரன்ரேட் |
| 1. | சென்னை | 8 | 6 | 2 | 12 | 0.553 |
| 2 | ஹைதரபாத் | 8 | 6 | 2 | 12 | 0.514 |
| 3. | பஞ்சாப் | 7 | 5 | 2 | 10 | 0.228 |
| 4. | கொல்கத்தா | 8 | 4 | 4 | 8 | 0.110 |
| 5. | பெங்களூர் | 8 | 3 | 5 | 6 | -0.301 |
| 6. | தில்லி | 9 | 3 | 6 | 6 | -0.450 |
| 7. | ராஜஸ்தான் | 8 | 3 | 5 | 6 | -0.726 |
| 8. | மும்பை | 8 | 2 | 6 | 4 | -0.059 |
* சென்னையும் ஹைதராபாத்தும் 8 ஆட்டங்களில் 6-ல் வெற்றி பெற்று தலா 12 புள்ளிகளுடன் உள்ளன. இந்த இரு அணிகளும் மீதமுள்ள 6 ஆட்டங்களில் 2-ல் வென்றால் போதும். 16 புள்ளிகளுடன் பிளேஆஃப்புக்குத் தகுதி பெறமுடியும்.
* பஞ்சாப் அணி 7 ஆட்டங்களில் 5 வெற்றிகளுடன் 10 புள்ளிகளுடன் ஜம் என்று 3-ம் இடத்தில் உள்ளது. அந்த அணிக்கு மீதமுள்ள 7 ஆட்டங்களில் 3 வெற்றி கிடைத்தால் போதும். பிளேஆஃப் சென்றுவிடலாம்.
* 8 ஆட்டங்களில் நான்கு வெற்றி பெற்று பாதுகாப்பான நிலையில் உள்ளது கொல்கத்தா. ஆனால் அந்த அணி மீதமுள்ள 6 ஆட்டங்களில் 4-ல் வென்றாக வேண்டும். மிகமோசமாக விளையாடினால் மட்டுமே அந்த அணியால் பிளேஆஃப்-புக்குத் தகுதி பெறமுடியாமல் போகும்.
* பெங்களூரும் ராஜஸ்தானும் 8 ஆட்டங்களில் 3-ல் மட்டுமே வெற்றி பெற்றுள்ளன. இந்த இரு அணிகளும் பிளேஆஃப் செல்ல வாய்ப்புண்டா? மீதமுள்ள 6 ஆட்டங்களில் 5-ல் வெற்றி பெறவேண்டும். அப்படி நடந்தால் பிளேஆஃப் உறுதியாகிவிடும். அதற்குப் பதிலாக 4-ல் மட்டும் வெற்றி பெற்றால் பிறகு நெட் ரன்ரேட்டின் அடிப்படையிலேயே செல்ல நேரிடும்.
* தில்லி அணி 9 ஆட்டங்களில் 3-ல் மட்டுமே வெற்றி பெற்றுள்ளது. அந்த அணி மீதமுள்ள 5 ஆட்டங்களிலும் வென்றால் மட்டுமே பிளேஆஃப்-புக்குச் செல்லமுடியும். 5-ல் 4-ல் மட்டுமே வெற்றி பெற்றால் நெட் ரன்ரேட்டை நம்பியிருக்க வேண்டியிருக்கும்.
* ஐபிஎல்-லில் அதிகதடவையாக மூன்று முறை சாம்பியனாக உள்ள மும்பை அணி தற்போது புள்ளிகள் பட்டியலில் கடைசி இடத்தில் உள்ளது. 8 ஆட்டங்களில் 2-ல் மட்டுமே வெற்றி பெற்று 4 புள்ளிகள். ஆனால் மீதமுள்ள 6 ஆட்டங்களிலும் வெற்றி பெற்றால் மும்பை அணியால் எந்தச் சிக்கலும் இல்லாமல் பிளேஆஃப்-புக்குச் செல்லமுடியும்? அது சாத்தியமா?
8 அணிகளுக்கும் பிளேஆஃப் வாய்ப்புகள் இருந்தாலும் தில்லி, மும்பை ஆகிய இரு அணிகள் மட்டுமே மீதமுள்ள எல்லா ஆட்டங்களிலும் வென்றாக வேண்டிய கட்டாயத்தில் உள்ளன. அப்போதுதான் 8 வெற்றிகளுடன் பிளேஆஃப்-புக்குச் செல்லமுடியும். ஆனால் இதில் ஒரு சிக்கல் என்னவென்றால் மே 20 அன்று தங்களுடைய கடைசி லீக் ஆட்டத்தில் மும்பை - தில்லி அணிகள் மோதுகின்றன. எனவே இவ்விரு அணிகளில் 8 வெற்றிகளுடன் பிளேஆஃப் செல்ல ஓர் அணிக்குத்தான் வாய்ப்பு கிடைக்கும்.
மேலே சொன்ன அனைத்தும் 8 வெற்றிகளின் அடிப்படையில் தீர்மானிக்கப்பட்டவை. 7 வெற்றிகளுடனும் பிளேஆஃப் செல்லமுடியும். ஆனால் நெட்ரன்ரேட் என்கிற அதிர்ஷ்டம் ஒத்துழைக்க வேண்டும்.
7 வெற்றிகளுடன் பல அணிகள் பிளேஆஃப்-புக்குத் தகுதி பெறாமல் இருந்துள்ளன. ஆனால், ஐபிஎல்-லில் 8 வெற்றிகள் பெற்ற அனைத்து அணிகளும் பிளேஆஃப்-புக்குத் தகுதி பெற்றுள்ளன. எனவே 8 புள்ளிகளை அடையவே அனைத்து அணிகளும் முயற்சி செய்கின்றன.
ஏழு வெற்றிகள், 14 புள்ளிகளுடன் பிளேஆஃப்-புக்குத் தகுதி பெற்ற அணிகள்:
2008 - தில்லி
2009 - தில்லி
2010 - சென்னை, பெங்களூர்
2014 மும்பை
ஆனால், ஏழு வெற்றிகளுடன் 14 புள்ளிகள் ஏன் 15 புள்ளிகள் எடுத்தும்கூட நெட் ரன்ரேட் அல்லது குறைந்த புள்ளிகள் ஆகிய காரணங்களால் பிளேஆஃப்-புக்குத் தகுதி பெறாமல் போன அணிகளும் உண்டு.
ஏழு வெற்றிகளுடன் 14 புள்ளிகள் எடுத்தும் (2015-ல் கொல்கத்தா 15 புள்ளிகள் எடுத்தும்) பிளேஆஃப்-புக்குத் தகுதி பெறாத அணிகள்:
2008 - மும்பை
2009 - பஞ்சாப்
2010 - தில்லி, கொல்கத்தா
2011 - பஞ்சாப்
2014 - ராஜஸ்தான்
2015 - கொல்கத்தா, ஹைதராபாத்
2016 - மும்பை, தில்லி
2017 - பஞ்சாப்.
கடந்த மூன்று வருடங்களாக ஐபிஎல் அணிகள் எட்டு வெற்றிகளுடன் 16 புள்ளிகள் பெறவே மெனக்கெடுகின்றன. இந்த மூன்று வருடங்களிலும் 16 புள்ளிகள் எடுத்த அணிகள் மட்டுமே பிளேஆஃப்-புக்குத் தகுதி பெற்றுள்ளன.
இந்த வருடம் என்ன நடக்கப்போகிறது?
இந்த நிமிடம் வரை பிளேஆஃப்-புக்குத் தகுதி பெற 8 அணிகளும் வாய்ப்புண்டு. இதை அந்த அணிகள் எப்படிப் பயன்படுத்திக்கொள்ளப் போகின்றன? ஏற்கெனவே ஐபிஎல் வெகுசுவாரசியமாகச் சென்றுகொண்டிருக்கிறது. இந்நிலையில் பிளேஆஃப்-புக்கான போட்டிகள் கூடுதல் பரபரப்பை உண்டுபண்ணும் என்று நிச்சயம் எதிர்பார்க்கலாம்.