இந்திய  வரைபடத்தை கிண்டல் செய்த ஆஸ்திரேலிய பத்திரிக்கையாளர்: டிவிட்டரில் வறுத்தெடுத்த நெட்டிசன்கள்! 

சிட்னி: இந்திய  வரைபடத்தை அநாகரிகமான முறையில் கிண்டல் செய்த ஆஸ்திரேலிய பத்திரிக்கையாளருக்கு சமூக வலைத்தளமான டிவிட்டரில் பயனாளர்கள் பாடம் புகட்டிய சம்பவம நிகழ்ந்துள்ளது.

ஆஸ்திரேலியாவைச் சேர்ந்த பிரபல பத்திரிக்கையாளர் டெனிஸ் பிரீட்மன். இவர் கிரிக்கெட் விளையாட்டு தொடர்பான கட்டுரைகள் எழுதி புகழ்பெற்றவர். இவர் சில நாட்களுக்கு முன்னால் தனது டிவிட்டர் பக்கத்தில் புகைப்படம் ஒன்றினைப்  பகிந்திருந்தார். அதில் தனக்கு பெண் ஒருவர் அனுப்பியதாகக் கூறி,  பெண்கள் அணியும் உள்ளாடை புகைப்படம் ஒன்றுடன் இந்திய வரைபடத்தினை இணைத்து வெளியிட்டு இருந்தார். அத்துடன் இங்கு எதற்காக இந்திய வரைபடத்தினை அவர் அனுப்பியிருக்கிறார் என்று தெரியவில்லை என்றும் கு றிப்பிட்டிருந்தார்.

அவர் இதனை வெளியிட்டவுடன் உலகெங்கும் உள்ள டிவிட்டர் பயனாளர்கள் பலரும் அவரைக்  கண்டித்துப் பதிவுகள் இட்டனர். அதில் அவரை கடுமையாகக் கிண்டல் செய்தும், அவருக்கு புத்திமதி கூறியும், அவரது அநாகரிகமான செயலைக் கண்டித்தும் எழுதப்பட்ட பதிவுகளும் அடக்கம்.

அதிலும் ஒரு பயனர் டெனிஸ் பிரீட்மன் செய்தது போலவே ஆஸ்திரேலிய வரைபடத்தினை விலங்கு ஒன்றின் சாணத்துடன் ஒப்பிட்டு படம் ஒன்றினை பகிர்ந்திருந்தார்.

டெனிஸ் பிரீட்மன் சில நாட்களுக்கு முன்னதாக இந்திய கிரிக்கெட் அணி கேப்டன் விராட் கோலி 'ஸ்வச் பாரத்' திட்ட நிகழ்ச்சி ஒன்றில் பங்கேற்கும் புகைப்படத்தினை வெளியிட்டு 'தெருக் கூட்டுபவர்கள்' என்று கிண்டல் செய்து பதிவிட்டிருந்தார் என்பது குறிப்பிடத்தக்கது.